A Mark Sõng 14 - SEBR SÕNGO

A Zezi namsgo, b kũum la b vʋʋgre

¹ Da keta rasma a yiib bala tɩ bur sẽn pa le ningd bɩlle la Pak kibs ta. Maan-kʋʋdba kãsem dãmba la Sɛb-mitba fãa baoo b sẽn na n maan toto n yõk a Zezi n kɩt tɩ b kʋ-ba.

² B ra yeta taaba: «D da saag rẽ Kibsa raare tɩ tẽnga tõe n wa wulumda me.»

³ A Zezi da bee Betani, wãoor a yembre sẽn boond t'a Simo zakẽ, n dɩtẽ. Pag a ye waa zakẽ be ne kug peesem yʋbl pɛɛlga. Yʋbla ra pida ne yũ-noog ka-neem sẽn daad toogo. Paga wãaga yʋblã n daag kaama a Zezi zugu.

⁴ Rẽ puuga neb wʋsg sũuri tɩ b ra gomd ne taaba n yetẽ: «Yaa bõe yĩng tɩ b sãamd yũ-noog kaam a woto?

⁵ B ra tõe n koosa kaama n paam wakɩ koeems kobs-tã n dɩk n kõ naong rãmba.»

⁶ B ra pa gomd noog ne paga ye. A Zezi yeel-b lame: «Bas-y paga laafi. Yaa bõe yĩng la y sãamd y sũuri? A tʋma tʋʋmd sõngo mam yĩnga.

⁷ Naong rãmb na n kell n zĩnda yãmb sʋk daar fãa. Y sẽn dat wakat ning fãa, y na tõog n sõng-ba. La sã n ya maam, mam pa na n zĩnd ne yãmb daar fãa ye.

⁸ Pʋg kãnga maana a sẽn da tõe n maan bũmb ninga. A sẽn zɛ mam yĩnga ne kaama, a zoe n beoolame n segl m mumbu.

⁹ Sɩd-sɩda mam yeta yãmb tɩ dũni wã fãa pʋgẽ, b sẽn na n togs Kibar nooga zĩig ning fãa, b na gom pʋg kãnga sẽn maana me yelle.»

A Zɩɩda zãmbo

¹⁰ Dẽ poore, piig la a yiiba nin-yend sẽn boond tɩ Zɩɩda, Iskariyot tẽng neda, kẽngame n tɩ yẽs ne maan-kʋʋdba nanamse n yet t'a na yõk a Zezi n kõ-ba.

¹¹ B sẽn wʋm woto, b sũur yɩɩ noog wʋsgo tɩ b kãab-a ligdi. A Zɩɩda ra baooda marsã, wakat ning a sẽn na n yõk a Zezi.

Pak dɩɩb seglgo

¹² Bura sẽn pa le ningd bɩlla sɩngr daare, pe-bila kʋʋb daare, karen-biisa soka a Zezi: «Yãmb datame tɩ d segl pak rɩɩb yɛɛlẽ?»

¹³ A Zezi tʋma bãmb neb a yiibu: «Kẽng-y tẽnga pʋgẽ tɩ y na seg rao a ye sẽn zɩt yʋʋre ne koom.

¹⁴ Bɩ y pʋg-a n kẽ a sẽn na n kẽ zĩig ningã la beene, y na yeel zaka soaba: ‹Soaala n tʋm tõndo tɩ d wa sok yãmba n ges yaa do-bʋgo la b na n paam n dɩ pak rɩɩbo ne b karen-biisã?›

¹⁵ A na n wilg-y-la do-kãsenga sẽn dog a to zugu la sẽn be neere. Do-kãng pʋg zoe n manegame n sɛ. Segl-y paka rɩɩb be.»

¹⁶ Sẽn tʋm b rãmba yii n loogame la b yãee fãa w-a a Zezi sẽn pĩn n togsã la b segla paka rɩɩbo.

Zɩɩda zãmbgo

¹⁷ Zaabr sẽn ta, a Zezi waa ne b Tʋʋm-tʋmdb piig la a yiibã.

¹⁸ B sẽn waa n dɩtẽ, a Zezi yeel-b lame: «Ade m yeta yãmba tɩ yãmb nin-yend n na n zãmb maam. Yẽ soab rɩta ne maam marsã.»

¹⁹ Bãmb fãa ra zĩi ne sũ-sãanga la ned kam fãa ra sokdame: «Soaala, yaa maam bɩ?»

²⁰ A Zezi yeel-b lame: «Yaa yãmb piig la a yiibã nin-yende, yaa ned sẽn naaga maam n tʋmd a nug laagẽ.

²¹ Ned Biiga sɩd na n looga wa b sẽn da pĩnd n gʋls a poorẽ, la yell na pak Ned Biiga zãmbdã. Nin-kãng sã n da pa rogẽ n são.»

²² B sẽn waa n dɩtẽ, a Zezi rɩka bur n ning-a barka n wes n pʋɩ b karen-biisã n yetẽ: «Deeg-y tɩ woto yaa mam yĩnga.»

²³ B rɩka laog neere ne rãam n pʋʋs bark pʋʋsgo n yaool n dɩk n kõ-ba. Ned kam fãa reegame n yũ.

²⁴ A Zezi yaool n yeel-b lame: «Woto yaa m zooda zɩɩm, Zooda sẽn yõg ne zɩɩma m sẽn daag neb fãa yĩnga.

²⁵ Sɩd-sɩda mam yeta yãmba tɩ m kõn leb n yũ bugsuntung sõng biis rãam n tol n ta raar ning m sẽn na n leb n wa yũ a rã paalga Wẽnd Rĩunga pʋga.»

A Piyɛr kɩɩsgã wilgri

²⁶ B sẽn yɩɩl bark yɩɩl n sɛ, b yiime n dɩk Oliviye tãng sore.

²⁷ A Zezi waa n yeel-b lame: «Yãmb fãa na n basa raood ne mam pʋgbo tɩ b gʋlsame: M na pãba pe-kɩɩma la pe-yãansa na n sẽegame.

²⁸ La m sã n wa vʋʋge, m na reng yãmb Galile.»

²⁹ T'a Piyɛr na n leok-ba: «Ba m taaba fãa sã n na kɩɩs tɩ b ka mi yãmba, kõn yɩ maam ye.»

³⁰ A Zezi yeel-a lame: «Sɩd la m sẽn yet fooma: yʋnga bala no-raoog kõn kelem naoor a yiibu tɩ foom, a Piyɛr, pa kɩɩs naoor a tã tɩ f ka mi-m ye.»

³¹ La a Piyɛr le yeela ne pãnga n yɩɩd pĩnda: «Ba m na naag yãmba n ki, m kõn yeel abada tɩ m ka mi yãmb ye.» La karen-biis a taaba me yeela wa a Piyɛr.

A Zezi pʋʋsgo Zɛtsemani

³² B taa zĩig a ye sẽn boond tɩ Zɛtsemani la beene a Zezi yeela b karen-biisã: «Zĩnd-y ka tɩ m zãag n pʋʋs la m wa.»

³³ B peega a Piyɛr, a Zak ne a Zã n zãag bilfu. Wakat kãnga sũ-sãang la yɩɩr yõk-b lame.

³⁴ Dẽ la b yeel b karen-biisã: «Sũ-sãang n tar maam la sũ-sãanga seka m kũum. Bɩ y zĩnd ka la y ra gũs ye.»

³⁵ B zãaga bilfu n lʋɩ tẽng n sɩng pʋʋsgo, n kotẽ tɩ namsga wakata zãag ne-ba, sã n tõe.

³⁶ B ra pʋʋsda woto: «M Ba, bũmb ka be n ya toog ne yãmb ye. Y sã n dat bɩ y zãag namsg kãnga ne maam, la baasg fãa, bɩ y maan y sẽn dat la y ra tũ mam daab ye.»

³⁷ Dẽ poore b le waa b karen-biisa nengẽ la b mikame tɩ b gõe. A Zezi neka a Piyɛr n yeel-a: «Piyɛr, fo gõeeme laa? Fo ka tõe f meng wakat a ye pʋgẽ bal n ka gũsi?

³⁸ Bas-y gõeem la y pʋʋse n da wa lʋɩ kʋɩɩbg pʋgẽ ye. Ninsaal wɩɩda pãng a raabẽ, la yĩngẽ wã, a pãng paooda.»

³⁹ B leba b pʋʋsga zĩigẽ la b pʋʋsame n le togs pĩnd goama.

⁴⁰ B sẽn le lɛɛg n wa karen-biisa nengẽ, b le mikame tɩ b ket n gõe. Gõeem da tar-b la wʋsgo la b ra ka mi b sẽn leokd bũmb ning ye.

⁴¹ A Zezi le waa b nengẽ naoor a tãab soaba la b yeel-b lame: «Y sã n dat bɩ y gũs marsã la y vʋʋse tɩ fãa sɛɛme. Wakata taame; yaa marsã la b na n yõk Ned Biiga n kɩs yel-wẽn-maandba.

⁴² Aya! Yik-y tɩ d loog tɩ sẽn na n zãmba Ned Biiga kolgame.»

A Zezi yõkre

⁴³ A Zezi da ket n gomdame t'a Zɩɩda wẽneg n ta ne neb ka tɛk sẽn zãad sʋʋs la rasaba. Yaa tẽnga kãsem dãmba la maan-kʋʋdba nanamse n da tʋm-ba.

⁴⁴ Zãmbda ra pĩnd n kõ-b la makre: «Mam sẽn na n mobg ned ningã, yaa yẽ, bɩ y yõk-a la y tall-a ne gũusgu.»

⁴⁵ A Zɩɩda sẽn ta bala, a wẽneg n kolga a Zezi n yetẽ: «Soaala, m pʋʋsda yãmba.» La a mobg-b lame.

⁴⁶ La neba yõka a Zezi.

⁴⁷ Ned a yembr sẽn da be a Zezi sɛɛgẽ wõoga a sʋʋga n kɛ maan-kʋʋd kãsenga sõgen tʋbre n fiuugi.

⁴⁸ La a Zezi goma ne nebã n yetẽ: «Yãmb waa ne sʋʋse n na n yõk maam, wala mam yaa so-gɩta.

⁴⁹ Daar fãa mam da bee wẽnd doogẽ n zãmsd neba, la yãmb pa yõk maam wakat kãng ye. Dẽ fãa yaa sẽn na yɩla tɩ bãngdba gʋlsg tõog n taase.»

⁵⁰ Wakat kãnga karen-biisa fãa basa a Zezi n zoe.

⁵¹ Bi-bɩɩg a yembr n da pʋgd a Zezi. Yaa fu-goabg bal la a ra pil yã. Tãb-biisa sẽn yõk-a,

⁵² a fãagame n zoe a bɩlgemde, n bas fu-goabga bãmb nusẽ.

A Zezi bʋʋdo

⁵³ B talla a Zezi n kẽng maan-kʋʋd kãseng yiri. Maan-kʋʋdba nanamse, tẽnga kãsem-dãmb la Sɛb-mitba fãa ra tigma be.

⁵⁴ A Piyɛr pʋg-b la yɩɩga n wa tol n kẽ kãsma zakẽ n tɩ zĩ ne tãb-biisã n woot bugum.

⁵⁵ Maan-kʋʋdba nanamse la tẽnga kãsem dãmba ra baooda yell sẽn na n dogl a Zezi zugu n yaool n tõog n kao b kũum bʋʋdo, la b ra pa yãet fɩ.

⁵⁶ Kaset-zirẽ dãmb wʋsg waa be, la b toagsga ra pa segd taab ye.

⁵⁷ Neb kẽer yikame n yagd zirẽ n yetẽ:

⁵⁸ «Tõnd wʋma a sẽn yeele: mam na n wãa wẽnd do-kãnga, neb nus sẽn me, la dasma a tãab pʋgẽ bala m na lebs n me a to sẽn pa na n yɩ ninsaal nug tʋʋmd ye.»

⁵⁹ Yell kãnga poorẽ me b yelsma da pa zemsd taab ye.

⁶⁰ Dẽ la maan-kʋʋd kãsenga yik a toore neba sʋka n sok a Zezi: «Y pa leokd tɩ bũmb laa? Yaa bõe kaset la b kõt yãmb poorẽ woto?»

⁶¹ A Zezi sĩnda b noore n pa leok tɩ bũmb ye. Maan-kʋʋd kãsenga yeela a Zezi: «Yaa foom la Wẽnnaam sẽn tʋm a soba bɩ?»

⁶² A Zezi leokame: «N-yẽe! Yaa mam menga. La yãmb na yãend Ned Biiga t'a zĩ Wẽnnaam pãng soab rɩtgo, la a yit sawat zug n watẽ.»

⁶³ Dẽ la maan-kʋʋd kãsenga kẽes a fut n yetẽ: «Tõnd tara kaset dãmb tʋʋmd yɛs bi?

⁶⁴ Yamb wʋma a sẽn tʋʋs Wẽnnaam yʋʋre, yãmb tagsdame tɩ bõe?» La b fãa yeelame t'a toga ne kũum.

⁶⁵ Neb kẽer sɩngame n tʋbsd a Zezi neng ne kolkoodo. B pila b neng ne pɛɛla n pãbd-b pegse n yetẽ: «Bɩ f bãng sẽn ya ned ninga n wẽ fooma!» Naab ka loog ka rãmba pãb-b la wʋsgo.

A Piyɛr kɩɩsgo

⁶⁶ A Piyɛr sẽn waa n be zakẽ wã, maan-kʋʋd kãseng zakẽ, bi-pugl n wa be.

⁶⁷ A yãenda a Piyɛr sẽn da zĩi n woot bugma, a gesa a neng n yetẽ: «Fo me ra bee ne a Zezi, Nazarɛt nedã.»

⁶⁸ A Piyɛr kɩɩsame n yetẽ: «Mam pa mi-a ye. Mam pa wʋmd fo sẽn dat n yeel tɩ bũmb ning ye.» A Piyɛr yiime n leb zãongẽ, la wakat kãnga no-raoog kelmame.

⁶⁹ Bi-pugla sẽn paam n ges neere, a yeela neb niyns sẽn da be-b be wã: «Ad-a sɩd yaa bãmb neda.»

⁷⁰ La a Piyɛr le kɩɩsame. Sẽn yɩ bilfu rẽ poore, sẽn da be-b be wã fãa yeela a Piyɛr: «Sã n ya sɩda, fo yaa bãmb neda, fo yaa Galile neda.»

⁷¹ La a Piyɛr sɩngame n kãabd a meng la wẽene: «Mam ka mi ned ning yãmb sẽn gomd a soab yella ye.»

⁷² La wakat kãng bala no-raoog kelma naoor a yiib soaba. A Piyɛr tẽega a Zezi sẽn da yeel yẽnd gomd ninga: «No-raoog kõn kelem naoor a yiibu tɩ fo pa kɩɩs maam naoor a tãab ye.» La a sɩnga yãbre.