A Luk Sõng 8 - SEBR SÕNGO

A Zezi tũud-n-taase

¹ Dẽ poore a Zezi da saada tẽn-bɛd la tẽn-bõonego n gomd Wẽnd Rĩung yelle la b moond b Koe-noogo. Tʋʋm-tʋmdb piig la a yiibã n da tũud-ba,

² n paas pagb kẽere. Yaa sʋtãan dẽgd la b ra yiis b pʋsẽ, bɩ yaa b bãas la b ra sãoog yã, wala a Mari b sẽn da boond a soab t'a Madelɛn; Sʋtãamb a yopoe la b yiis a pʋgẽ,

³ wala a Zan, a Erod ligd naab a Kuza paga, la pagb a taab wʋsgo sẽn da sõngd-b ne b paoongo.

Bʋt yelbũndi

⁴ Neb kʋʋng tigma taaba n waa a Zezi nengẽ tɩ b na n tão-b yelbũndi:

⁵ «Bʋt a ye n yi n na n tɩ bʋd a pʋʋgo. A sẽn waa n fẽedã a bõn-buudã, bɛɛl kẽer lʋɩɩ sor zugu; neb tab-b lame, yĩngr luiili rɩ-b lame.

⁶ Kẽer lʋɩɩ zĩ-kʋɩgdgẽ, b sẽn yi, b wẽneg n kiime, tɩ b ra pa tar bʋgsem ye.

⁷ Kẽer lʋɩɩ gõosẽ la b sẽn yi gõosa sʋkã, gõosa wulumd-b lame tɩ b ki.

⁸ Kẽer lʋɩɩ zi sakdgẽ, bãmb yiime n wom biisi, a ye fãa koabg koabga.» A Zezi sẽn yeel woto, b mooname: «Sẽn tar-a tʋb n tõe n wʋm bɩ a wʋm!»

⁹ Tʋʋm-tʋmdba sok-b la yelbũnda võore,

¹⁰ tɩ b leok-ba: «B kõo yãmb tɩ y bãng Wẽnd Rĩunga yɛl-solgdi la sã n ya neb a taabã, yaa ne yelbũna la b gomd ne bãmba, sẽn na yɩlẽ ‹tɩ b sã n getẽ bɩ b ra neẽ ye, tɩ b sã n kelgdẽ bɩ b ra wʋm võor ye.›

¹¹ Ad yelbũnda võore: bõn-buuda yaa Wẽnnaam Gomde.

¹² Sẽn lʋɩ-b sora zugu makda sẽn kelg-ba tɩ Sʋtãan yaool n wa yiis Gomdã b sũurẽ, tɩ b ra wa tẽ n fãag b mens ye.

¹³ Sẽn lʋɩ-b zĩ-kʋɩgdgẽ wã makda sẽn kelg-b Wẽnnaam Gomdã n deeg-a ne sũ-noogo la b pa kɩ yẽgen ye, b tẽeda wakat yɛng bala; kʋɩbg sã n wa, b basda raoodo.

¹⁴ Sẽn lʋɩ-b gõos sʋka makda sẽn kelg-b Gomdã, la sora zugu, zu-loees buud fãa, arzɛka la dũni wã bõn-nooda tʋlsem wulumd-b lame tɩ b ka tõe n bɩ n taas ye.

¹⁵ Sẽn lʋɩ-b zĩ-sakdgẽ wã makda sẽn kelg-b Gomdã ne yẽesem la sũ-tɩrga, la b reeg-a ne sũ-keelem t'a womd biisi.

Fitil yelbũndi

¹⁶ Ned kõn yõgen fitila n dɩk rʋk n fõgen-a bɩ n dɩgl-a a gãag tẽngr ye; a dogend-a-la a zĩigẽ, tɩ sẽn kẽed-b fãa yãe a vẽenem.

¹⁷ Sẽn lill ka be sẽn ka na n puk ye, sẽn solg ka be sẽn ka na n wa por yɩng ye.

¹⁸ Dẽnd yĩnga, bɩ y modg ne kelegre, tɩ sẽn tar-a, b na n paas-a lame la sẽn pa tara b na n deega a sẽn tẽed t'a tara bũmb ningã.»

A Zezi ma la b saam-biisi

¹⁹ A Zezi ma ne b saam-biis waame, la b ka tõog n ta b nengẽ, zãma wã yĩnga.

²⁰ Tɩ b wa yeel-ba: «Y ma la y saam-biis n be yɩnga n baood yãmba.»

²¹ Tɩ b leoke: «Mam ma, mam saam-biisi, yaa neb niynsi sẽn kelgd-b Wẽnnaam Gomde la b reegd-a.»

A Zezi sigsda ko-wiisi

²² Daar a ye a Zezi kẽe koom koglgo ne b karen-biisi. B yeel-b lame: «Wa-y tɩ d kẽng mogra rʋʋnde.» La b looga ko-sʋka.

²³ B sẽn waa n dabda, a Zezi gũsame. Mik sob-raoog kaooga mogra zugu, tɩ koglga kẽed koom, tɩ rabeem beẽ.

²⁴ La karen-biisa kolga a Zezi n nek-ba n yetẽ: «Karen-saamba, Karen-saamba, d na n ki wɛ!» B nekame, n tãs sobga la ko-wiisã tɩ b yõke, tɩ fãa lebg sɩɩ.

²⁵ Tɩ b na n yaool n yeel-ba: «Yãmb tẽeba bɛɛ?» Dabeem kãseng yõk-b lame tɩ b pɛleng yɩk; la b ra yeta taaba: «Bãmb yaa ãnna n kõt al ba sobg la mogr noor tɩ b sakdẽ?»

Gadar Zĩn soab sãoogre

²⁶ B taa Gadar dãmb tẽnga sẽn tot ne Galile.

²⁷ A Zezi sẽn yi koglga pʋga, tẽnga rao a yembre n wa n seg-ba. Sʋtãamb wʋsgo n da be nin-kãng pʋgẽ. Al daar zãra a ra pa le yeelgd fuug ye, a ra ka gãe yir ye, dẽnd yaadẽ.

²⁸ A sẽn yãe a Zezi la a sẽn kelme, n wõgemd b taoore n zẽk a koɛɛg n moon woto: «Bõe n be maam ne yãmb sʋka, Zezi, Wẽnnaam Yĩngr soab Biiga? Y sugri la y ra nams-m ye!»

²⁹ Dẽ t'a Zezi ra kõta Sʋtãan dẽgda noore t'a yi la a bas raoã. Sɩda, yaa naoor yaka la a ra yõk daoã, tɩ b mii n sẽb-a n gãneg ne wĩ la bãeense, la a kaooda fãa. Sʋtaana ra kẽesd-a la weoogo.

³⁰ A Zezi sok-a lame: «Fo yʋʋr la a bõe?» T'a leok: «Kʋʋma» tɩ yaa Sʋtãamb wʋsgo n da kẽ raoã pʋgẽ.

³¹ Sʋtãamba yõka a Zezi sɛɛg tɩ b ra yiis ba n lebs-b bog zulungẽ wã ye.

³² Kurkuy ka tɛk n da wãbd yamdo tãnga zugu; Sʋtãamba kosa a Zezi sore n na n yi n kẽ kurkuya; tɩ b kõ-b sore.

³³ Sʋtãamba basa raoã n yi n kẽ kurkuya la kurkuya zãnga siga tãnga n wudg n tɩ lʋɩ mogra pʋga, n pa koomẽ.

³⁴ Sẽn da gũud-b kurkuya sẽn yãe yellã, b zoe n tɩ togsa tẽnga pʋgẽ la tẽn-kɩremsã.

³⁵ Neba yiime n wa ges yella sẽn maana. B taa a Zezi nengẽ n mik Sʋtãamba sẽn yi n bas rao ninga t'a zĩ a Zezi taoor ne laafi n yeer fuug la a mi a nenga. La rabeem yõk-b lame.

³⁶ Sẽn yãend-b yellã togsa raoã sẽn paam a menga toto.

³⁷ Gadar tẽng rãmb fãa sũu taaba n kos a Zezi tɩ b loog n yi b tẽngẽ. Rabeem kãseng da tar-b lame. A Zezi kẽe koom koglgo n lebe b sẽn yiẽ.

³⁸ Sʋtãamba sẽn yi n bas rao ninga yõka a Zezi sɛɛg n na n pa ne bãmba; a Zezi kʋls-a lame n yete:

³⁹ «Leb f yiri la f tɩ togs Wẽnnaam sẽn maan bũmb ning ne foo.» Daoã kẽngame n tɩ moon tẽnga fãa a Zezi sẽn maan bũmb ning a yĩnga.

A Zayir bi-pugl vʋʋgre

⁴⁰ A Zezi lɛɛg n waame. Neb kʋʋng reeg-b lame tɩ b ra gũud-b lame

⁴¹ la ade, rao a ye n wa. A ra boondame t'a Zayir, n ya pʋʋsg roog naaba. A wõgemda a Zezi taoore n yõk b sɛɛga tɩ b wa kẽe a zakẽ.

⁴² A ra tara a bi-pugl yende sẽn zems yʋʋm piig la a yi. Biiga ra yaa bãada la bãaga ra lebga toogo. A Zezi rɩka a zaka sore, tɩ neba sɩng b pẽdgre.

⁴³ Pag a ye me n da bẽed mende, yʋʋm piig la a yiibu; ned ba a ye ka tõog n sãoog-a ye.

⁴⁴ A kolga poorẽ n sɩɩs a Zezi fuug zerdo. Zĩig pʋgẽ bala a zɩɩma yõkame.

⁴⁵ La a Zezi sokame: «Anna n sɩɩs maam?» La ned ba a ye pa saag n yeel tɩ yaa yẽ ye. T'a Piyɛr leok-ba: «Karen-saamba, zãma wã n sũ taaba n dɩdgd yãmba.»

⁴⁶ T'a Zezi yeele: «Ned n sɩɩs maam, tɩ m bãngame tɩ pãng n yi m nengẽ.»

⁴⁷ Paga sẽn mik t'a yella pukame, a waame n digda, n wõgemd a Zezi taoore la a togsame tɩ neb fãa wʋm a sẽn sɩɩs-ba võore, la a sẽn wẽneg n sãoog zĩig pʋgẽ balã. A Zezi yeel-a lame:

⁴⁸ «M biiga, fo tẽeb fãag-f lame, kẽng ne laafi.»

⁴⁹ B sẽn da ket n gomda la ned yi naaba yiri n wa yeele: «Y biiga kiime, da le nams-y karen-saamb ye.»

⁵⁰ La a Zezi ra wʋmame tɩ b na n yeel pʋʋsga roog naaba: «Da maan-y rabeem ye, yãmb ye n tẽ bala, biiga na n tɩlgame.»

⁵¹ B sẽn ta yiri, b pa sak tɩ ned ba a ye tũ bãmb n kẽ sã n kaa a Piyɛr la a Zã, la a Zak, n paas bi-pugla ba la a ma.

⁵² B fãa ra yãbdame la b tood b yãoogo, kũuma yĩnga. T'a Zezi yeele: «Da yãb-y ye, biiga pa ki ye, a gõeeme.»

⁵³ Neba ra laada a Zezi tɩ bãmb yẽ ra miime t'a kiime.

⁵⁴ A Zezi yõka biiga nugu, n zẽk b koɛɛg n yeele: «Biiga yiki!»

⁵⁵ Biiga vɩɩm le waame; vugr bala a yikame. A Zezi yeelame tɩ b kõ-a rɩɩbo.

⁵⁶ Bi-pugla ba ne a ma yɛɛsame; a Zezi sagl-b lame tɩ b ra togs ned ba a ye yella sẽn maana ye.