A Luk Sõng 1 - SEBR SÕNGO

Sebra tʋɩɩsgo

¹ Ad-y yɛl niyns fãa sẽn maan tõnd sʋka, neb wʋsg n yik n na n gʋls ba,

² n gʋls-b tɩ tũ wala pipi Koe-nooga moandb sẽn yãend ne b nini.

³ Bãmb nao la m pʋgyã, n le vɛɛs yɛla fãa, al b sɩngrẽ n na n gʋls-b fo yĩnga, m nin-sõngo Teofil.

⁴ La woto wã f na bãng tɩ f sẽn paam zãmsgo ninga ka naag ne zirẽ lɛ-lɛ.

A Zã rogem kibare

⁵ Zɩɩde naab a Erod zamaanẽ, maan-kʋʋd a ye n da be, a Abia sakẽ, n boond t'a Zakari, t'a pag sẽn boond t'a Elizabɛt yaa Aarõ yagenga.

⁶ Bãmb b yiiba da yaa nin-sõma Wẽnnaam taoore n da tũud Soaala noya la b raaba fãa, tɩ wɩdg ka ye.

⁷ B ra pa tar biig ye, t'a Elizabɛt ra yaa pɩg-kiiri; la bãmb b yiiba fãa ra kʋʋlame.

⁸ Sẽn waa n beẽ, maan-kʋʋra tʋʋmd gilgame n ta a Zakari saka. B poeesa wala b sẽn mii n maandẽ,

⁹ la lʋɩɩ yẽ zug, t'a kẽ Sõmblem Naab meng roogẽ n yõog wisdu.

¹⁰ Wisda yõogr wakato, zãma wã paa yɩnga n pʋsdẽ.

¹¹ La Soaala malɛka lika a Zakari, wisda maan-kugra rɩtgo.

¹² A Zakari sẽn yãe-a, a yɛɛsame la rabeem yõk-a lame.

¹³ Tɩ malɛka yeel-a: «Ra zoe rabeem ye, Zakari, tɩ f pʋʋsg reegame, fo pag na n doga biig n kõ-fo la f na n pʋda a yʋʋr a Zã.

¹⁴ A rogma na n pidsa fo menga la neb wʋsgo ne sũ-noog la na yɩ kɩdengo.

¹⁵ A Zã na n yɩɩ nin-kãseng Soaala taoore; a kõn yũ rãam la toos ye. A na n pida ne a Vʋʋsem Sõngo t'a ket a ma pʋgẽ.

¹⁶ A na n talla Israyɛl kamb wʋsgo tɩ b lɛɛg n wa kẽ Soaala, bãmb Wẽnnaam.

¹⁷ A na n lʋɩɩ Soaala taoore ne a Eli yam la a pãnga; a na wẽnemda ba rãmb la kamba sũur n tees taaba. A na n kõo kɩɩsdba nin-sõma wã yam sõngo, la woto a na n segl buud sõngo n kõ Soaalã.»

¹⁸ A Zakari yeela malɛkã: «Bõe n na n sõng-m tɩ m bãng rẽnna? M yaa nin-kẽema, m pag me kʋʋlame.»

¹⁹ La malɛka leok-a lame: «Mam la a Gabriyɛl sẽn yɛs Wẽnnaam taoore, la b tʋm-m lame tɩ m wa gom ne foo la m togs-f koe-noog kãnga.

²⁰ La ade, fo na n lebga muka, fo kõn le tõog n gome, n tol n tãag yɛl kãensa fãa taasg raare, fo sẽn pa tẽ m goama yĩnga, la b yaool n na n pidsame, b raara sã n ta.»

²¹ La neba fãa yaool n da gũuda a Zakari, tɩ b pɛlens yɩgda a sẽn kaoosd wẽnd doogẽ wã.

²² A sẽn waa n yi, a makame t'a na n gom ne nebã, n konge. Dẽ la b bãng t'a paama likr wẽnd doogẽ. Yẽ menga ra kong n bilgda ne nugu, la a kell n yɩɩ muka.

²³ A Zakari sẽn maan a tʋʋmna n pids a raare, a leba a yiri.

²⁴ Sẽn yɩ bilf rẽ poore, a paga, a Elizabɛt, dɩka pʋga; a solga a meng kiis a nu. La yẽ meng n waa n gomda:

²⁵ «Ad-y Soaala yaa n maana bũmb m yĩnga. Yaa n ta-la b raabo tɩ b rok m yãnd ninsaalb sʋka!»

Krista rogem wiligri

²⁶ Kiis a yoob sẽn sõd dẽ poore, Wẽnnaam tʋma malɛk a Gabriyɛl Galile tẽng a ye sẽn boond tɩ Nazarɛt,

²⁷ bi-pugl a yembr nengẽ, b sẽn da kõ sɩd sẽn boond t'a Zozɛf n yaa a Daviid buud neda. Bi-pugla yʋʋr da boondame tɩ Maryam.

²⁸ La malɛka sẽn kẽ a nengẽ, a yeelame: «M pʋʋsda yãmba, pid ne kũun soaba! Soaala bee ne yãmba, yãmb paama barka, pagba fãa sʋka.»

²⁹ La a Maryam sẽn wʋm gomdã, a yɛɛsame; a ra bilgdame n baood pʋʋsg a woto võore.

³⁰ Malɛka yeelame: «Da zoe-y rabeem ye, Maryam, yãmb paama bark Wẽnnaam taoore.

³¹ Ade, yãmb na n dɩka pʋga, yãmb na n doga bi-ribla la y na pʋda a yʋʋr a Zezi.

³² Bãmb na n yɩɩ nin-kãsenga, la b na n bool-b lame tɩ yĩngr soab Biiga. Wẽnnaam na n kõ bãmba b saamba, a Daviid, zaoore,

³³ la b na n dɩ naam a Zakoob zakẽ daar fãa la b naam kõn zĩnd sɛɛb ye.»

³⁴ A Maryam soka malɛkã: «Dẽ na n yɩ-la a wãna, tɩ m ka mi rao ye?»

³⁵ Malɛka leokame: «A Vʋʋsem Sõng na n siga yãmb zugu la yĩngr soab pãng na n bui yãmba. Dẽ n so tɩ sõmblem biiga yãmb sẽn na n dogã, b na n bool-b lame tɩ yĩngr soab Biiga.

³⁶ Bɩ y gese! Yãmb doagda, a Elizabɛt, dɩka pʋga n na n dog biig a kʋʋlem pʋgẽ, lebga kiuusa yoob marsã, b sẽn da ket n boond-a tɩ pʋg-kiiri;

³⁷ tɩ bũmb ka be sẽn yɩɩd Wẽnnaam nug ye.»

³⁸ La a Maryam yeelame: «Mam yaa Soaala yem-poaka, bɩ kell n yɩ ne maam wala yãmb sẽ yeelã.» La malɛka bas-a lame n looge.

A Elizabɛt gesgo

³⁹ A Mariyam waa n yika ne yãgbo n tees tẽng a yembre, Zɩɩda tãmsẽ.

⁴⁰ A tɩ kẽe a Zakari yiri n pʋʋs a Elizabɛt.

⁴¹ A Elizabɛt sẽn wʋm a Maryam pʋʋsma, biiga sẽn da be a pʋgẽ wã yĩng sidgame. La a Elizabɛt pida ne a Vʋʋsem Sõngo,

⁴² t'a zẽk a koɛɛg n moonẽ: «Fo paama barka, pagba fãa sʋka, la f pʋgẽ biiga me paama barka.

⁴³ Mam bee yɛ, tɩ m Soaala ma wat m nengẽ?

⁴⁴ Ade, fo pʋʋsma sẽn lʋɩ m tʋbrẽ la m biiga yĩng sẽn sidgi, sũ-noog keelem yĩnga.

⁴⁵ Foom la zu-noog soaba, tɩ fo tẽeme tɩ gomna b sẽn leok foom, Soaala yʋʋr yĩnga, na n taasame.»

⁴⁶ La a Maryam yeelame: «Mam sɩɩga pẽgda m Soaal,

⁴⁷ la m sũur kɩdemda sũ-noogo, Wẽnnaam m Fãagda yĩnga.

⁴⁸ Bãmb gesa b biiga paoodlem. Ad marsã tɛka ninsaal buud fãa na n boola maam tɩ zu-noog soaba.

⁴⁹ Tɩ Pãng soab maana yɛl kãsens mam yĩnga, la b yʋʋr yaa sõngo.

⁵⁰ Dũni sẽn yet t'a yaa dũniya, b nimbãan-zoeer bee sẽn zoet-b bãmb zutu.

⁵¹ B wilga b kang pãnga. B riga wakr dãmba n sẽege.

⁵² B sika pãens rãmb b zaoorẽ, b zẽka talse.

⁵³ Kom sẽn tar b rãmba, b tɩgs-b la ne kũuni, tɩ arzɛk rãmb yaool kul zaalem.

⁵⁴ B kogla b biig, a Israyɛl; tɩ b tẽega b nimbãan-zoeerã

⁵⁵ n na n pids zamaan woo zamaana b sẽn da kãab d saam-dãmba, a Abraam ne a kamba!»

⁵⁶ A Maryam zĩnda ne a Elizabɛt sẽn zems kiis a tã n yaool n kul a yiri.

⁵⁷ A Elizabɛt dogem taame; a roga bi-ribla.

⁵⁸ A yags la a buud dãmb wʋmame tɩ Soaala zoe-la a nimbãanega, tɩ b lagem ne-a, n kɩdemnẽ.

⁵⁹ Dasem a nii daare, b kẽesa bi-pɛɛlga bãongo. B pʋd-a la a ba yʋʋre: Zakari.

⁶⁰ T'a ma yeele: «Ayoo! A Zã la b na n bool-a.»

⁶¹ Tɩ b yeel-a: «Fo buudẽ wã, ned ka be sẽn pʋd yʋ-kãng ye.»

⁶² La b bilsa ne nus n sok biiga ba a sẽn dat tɩ b pʋd biiga yʋʋr ninga.

⁶³ A Zakari kosa walga n gʋls woto: «A yʋʋr la a Zã.» La b fãa pɛleng yɩkame.

⁶⁴ Wakat kãng bala, a Zakari yaaga a noor t'a zelemd lak t'a na n gom n pẽg Wẽnnaam.

⁶⁵ Dabeem yõka a yagsa fãa. A Zɩɩda soolma fãa tɛka, neba sõasg ra yaa yell kãnga.

⁶⁶ La neb niyns fãa sẽn wʋm-ba, yella kɛ-la b sũurẽ tɩ b ra yetẽ: «Bi-kãnga na n wa yɩɩ bõe?» Sɩd me Wẽnnaam nug ra tika biiga zugu.

⁶⁷ La biiga ba, a Zakari, ra pida ne a Vʋʋsem Sõngo, t'a gom bãngr goama n yeele:

⁶⁸ «Soaala, Israyɛl Wẽnnaam, paam pẽgre, tɩ b waa n gesa b buudu n fãag-a.

⁶⁹ Tõnd yĩnga b yiisa Fãagda, Pãng soaba, b biiga Daviid zakẽ.

⁷⁰ Wala b sẽn da pĩnd n togs ne tẽn-kʋdem wẽnnẽ bãngdb sõma noore,

⁷¹ yaa Fãagd sẽn na fãag tõndo d bɛɛba la sẽn kis-b tõnda nusẽ.

⁷² Yɩɩ woto la b maan b nimbãan-zoeere ne d yaab rãmba. B tẽega b bark zoodã,

⁷³ b tẽega kãabg ningã, b sẽn da kãab d ba, a Abraam.

⁷⁴ B kãabame tɩ b na zãag-d ne d bɛɛba, n zãag-d ne rabeem buud fãa, tɩ d tõog n waoog-ba,

⁷⁵ ne sõmblem la pʋ-peelem, bãmb maasmẽ, la d vɩɩma tõre.

⁷⁶ La foom, bi-pɛɛlga b na bool foom tɩ Yĩngr soab no-rɛɛsa, tɩ foom n na n lʋɩ Soaala taoore n segl b soya;

⁷⁷ n kɩt tɩ buuda bãng t'a na n paama fãagre ne a yel-wẽna yẽesgo,

⁷⁸ tõnd Wẽnda sũuri pida ne nimbãan-zoeer bala, b nimbãan-zoeer yĩnga, b yĩngr Ãdga

⁷⁹ na puki la a vẽneg sẽn zĩ-b likẽ sẽn zĩ-b kũum maasmẽ tɩ b nao wa paam n dɩk laafi so-tɩrga.»

⁸⁰ Biiga ra bɩtame t'a yam da paasdẽ. A zĩnda weoogẽ n tãag daar ning a sẽn vẽneg a meng a Israyɛl kamba.