A Ezayi 9 - SEBR SÕNGO

Bi-pɛɛlg n dog d yĩnga

¹ Buud ninga sẽn da kẽnda likẽ wã yãee vẽenem kãsenga: vẽenem n yik n yãgd sẽn vɩ-b lik tẽngẽ.

² Soaala, buuda sũ-noog paasa zembala, buuda kɩdeng lebga wʋsgo. Buuda langenda yãmb taoore wala koaad sẽn langd kooda rɩkr daare, wala te-zɛɛdem pʋɩɩb daare.

³ Wala y sẽn maan pĩnda, y sẽn waa n dig Madianitsã n sẽege, y le maanda boto rũnna. Y sika zɩɩb ning sẽn da zɩlg a bãgdo wa raoog sẽn palg nag-koods yubla, y kaoo gʋlg ning tʋʋma gɛta sẽn da yulumd a nugẽ.

⁴ Zabr sɛɛme tɩ neooda la fut sẽn mad zɩɩm na n los bugmẽ tɩ b rɩ zãnga.

⁵ Biig n doge, bi-ribl la b kõ-do, dũni wã soolem la b zɩlg a bãgdo, a yʋʋr la woto: a Mi-saglgo, Pãng soaba Wẽnde, Zamaan sẽn wat beoog Ba, Laafi-Dĩma.

⁶ A soolem na n yɩɩ kãsenga, a naama na n yɩɩ laafi tõt sɛɛb naam, a Daviid naama zaoor la a rẽnna, a Daviid soolma n na n yɩ a soolem. A na n vigla a naam, la a na n paasa a naama pãnga, la naama na n tũu zemsg sore. Na n yɩɩ woto dũnna la wakat fãa, la yaa Wẽnd sẽn ka mi yaamse, Soaala sẽn ka yɛɛd ne ninsaal pʋgbã, yaa bãmb n yals rẽnna.

Wẽnd nug le rat n wẽeme

⁷ Soaala-Wẽnd kãaba a Zakoob beedo, sẽn pa sakd kelgre la b togs a Israyɛl.

⁸ Beeda pʋgda a Efrayim a pʋgda Samari rãmba tɩ b neẽ. B yikame n yeele ne wʋglem la tɩtaam:

⁹ Tan-koɛɛm sẽn wʋm bugmẽ roto la b tus n lubi, la d na maneg n pees kug n lebs n me. Rota bɛɛnd ra paga ne ra-pegd pãng sẽn zemse, d na bɛ marsã ne kʋgs ra-pegdo.

¹⁰ Ad-y Soaala kɩtame tɩ b bɛɛba kaoog zabr ne-ba, b kɩtame t'a Resin kaoog zabr ne-ba.

¹¹ Sɩnga yaanga ne Aramsã tɩ Filisti rãmb pʋgda. B sɛɛ Israyɛl zãnga. Soaala sũur ket n na n pa maag ye, b nug ket n zẽkame n na n wẽ.

¹² Ne rẽ fãa a Israyɛl pa lɛɛg n wa a poorẽ, a ka kẽ dũni fãa Soaal sẽn sɩbgd yẽnda wã ye.

¹³ Dẽ la Soaala-Wẽnd fiuug zugu la b kʋʋg zʋʋre, n yãk vãoog la willi, daar a ye.

¹⁴ Zuga yaa nin-kẽemba la taoor dãmba, zirẽ-be-bãngdba la zʋʋrã.

¹⁵ Sẽn da tog n wilg-b sorã kẽe moogo, bãmb n deng menengo.

¹⁶ Yaa rẽ yĩnga, la Soaala-Wẽnd ka na n bas kom-bɩɩbã. B pa na n zoe kɩɩb-bi nimbãanega, b ka na n zoe pʋg-kõap nimbãaneg ye. Buuda yaa zãmb la nin-wẽns buudu, b goama fãa yaa gãeen-goama. Dẽ la Soaala sũur ket n pa maage, b nug ket n zẽkame n na n wẽ.

¹⁷ Sɩda wẽnem dɩta wa bugum; a na n sɩnga kãgre la gõose, n wa tat tʋga gilli, tɩ bug-zõos na n tão yĩngri, n tão wala sɩlmande.

¹⁸ Dũni Soaala-Wẽnd sũ-puura bugum n dɩt tẽnga ne a nebã. Ned ka le rat a to ne yõor ye.

¹⁹ F sã n paam f yaka yaa rɩɩb bala, fo wẽnegda rɩtgo n wãag tɩ kom ket n tar-fo, tɩ f yĩig goabga, n ket n pa tɩgd ye, ned kam lɛɛg n dɩta a menga.

²⁰ A Manase zɛɛda a Efrayim, a Efrayim zɛɛda a Manase, t'a Manase ne a Efrayim naag taaba n digd a Zɩɩda. La Soaala sũur ket n pa maag ye, b nug ket n zẽkame n na n wẽ.