A Ezayi 8 - SEBR SÕNGO

Wudg n deeg f pʋɩɩre, wudg n zɛ f zɛɛbo

¹ Soaala kõ-m-la noor kãnga: «Dɩk bũmb sẽn ya gilga la sẽn bedme, dɩk f sẽn paam kut ninga n gʋls woto a zugu: A Wudg-n-deeg-f-pʋɩɩre, a Wudg-n-zɛ-f-zɛɛbo.»

² M wilga gʋlsma kaset dãmb a yiibu sẽn ya pʋ-peelem dãmba, maan-kʋʋd a Uriya, n paas a Yeberekiya biiga a Zakari.

³ Mam sẽn yõk m pag nugu, bãngd poaka nugu, a tedgame. A waa n tol n doga biiga tɩ Soaala yeel-ma: «Pʋd a yʋʋra woto: Wudg-n-deeg-f-pʋɩɩre, Wudg-n-zɛ-f-zɛɛbo.

⁴ Ad biiga sẽn wat n na n bãng a ba la a ma boolgo, tɩ Damas la Samari arzɛka fãa wʋk n tɩ sama Asʋr dĩma taoore.»

Asiri rãmb na n wa wẽe tẽngã

⁵ La Soaala-Wẽnd le kõ-m-la koɛɛga:

⁶ «Nin-bãmba sẽn ka pẽgd Siloe kooma koom sẽn zoet n ka maand bʋʋre, n long n n pẽgd a Resin, n long n pẽgd a Remaliya biigã,

⁷ m na n kɩtame tɩ Efrat kʋɩlga fõde n wa rɩ yã; yaa kʋɩlg sẽn tar ko-wiiga la sẽn zulme, kʋɩlg sẽn ya Asiri dĩma la a pãnga makre. Efrat kʋɩlgã na wukame la a na n gãndga a koagsã,

⁸ a na lima a Zɩɩda n tãag yubla n lɛɛg n daale, n yɛdg n saag zĩis fãa, n saag f soolma fãa wɛ, Emmanwɛl.»

Bu-zẽmba makdame la b kõn tõog ye

⁹ Bãng-y-yã, Adem biisi, y nong bɩ y sũ taaba ad-y yaa yɛɛsg la y na n yɛɛse. Tẽn-zãorgẽ dãmba, gũus-y! Y nong bɩ y yiis y zab-teedo, yɛɛsg bal la y na n sege. N-ye, y nong bɩ y yiis y zab-teedo, yɛɛsg bal la y na n sege!

¹⁰ Y sẽn sed bũmb ning fãa, y kõn tõog n pids-a ye. Yẽs-y ne taaba wala y sẽn date, bũmb kõn maan a to. Tõnd sẽn teeg a soaba la a Emmanwɛl, a Wẽnd bee ne-do.

Lakr pĩiga

¹¹ Ade, Soaala-Wẽnd sẽn gãd maam b yeel-m lame tɩ m modge n da togs buuda manesma ye. Ad-b sẽn yeel-ma:

¹² Da togs-y nin-bãmba n boond tɩ sudum b sẽn zoet bũmb ning rabeem n boond tɩ sudum mengã.

¹³ Gãd-y bala tɩ yaa dũni fãa Soaala n tõe n teem bũmb la yaa ne bãmb la y na n maan rabeem, yaa bãmb la d tog n yɛɛse.

¹⁴ Soaala-Wẽnd na n teka bũmb a Israyɛl soolma a yiiba pʋgẽ. B na n yɩɩ kugri tɩ neb na n lakdẽ, b na yɩɩ pĩiga tɩ neb na n lakd n lʋɩtẽ.

¹⁵ Wʋsg na n lak n lʋɩɩme la b na n kaoome. Yaa bẽdgo n na n gãneg Zerizalɛɛm dãmb yĩnga; a na n koomda wʋsg nao la b kõn tẽb n põs ye.

Bãngda na n sĩnda a noor n gũ bilfu

¹⁶ M na n baoo zĩiga n gãneg m sẽn da rat n togsã; kʋɩlen-doogẽ la m na n pag n sẽn tog n wilgã; m karen-biisa bal la m pa na n solge.

¹⁷ M gũuda Soaala-Wẽnde. La yaa wa b pa rat a Zakoob buuda gesg ye. M yaool n maaga m meng n ket n teeg bãmba.

¹⁸ Maam ne kamb niyns Soaala sẽn kõ maama, tõnd lebga makre la bãnde Israyɛl yĩnga; dẽ yaa Wẽnd daabo, bãmb la dũni fãa Soaala. Bãmb n ti b zak Siõ tãnga zugu.

¹⁹ B na n wa yeela yãmba tɩ y sogs kũum, tɩ kẽer tõe n walem-y-la beoog yelle. B yetame tɩ segdame tɩ buuda gom ne a wẽnd dãmba, tɩ segdame tɩ b gom ne kɩɩmsã, n yõk b sɛɛg sẽn vɩ-ba yĩnga. B sã n gom-y boto,

²⁰ bɩ y yeele: Yaa Soaala-Wẽnd sẽn wilga la d na n lɛɛg n tũ. Sẽn ka rata n tũ boto me, beoog kõn vẽeg-a ye.

Lik la yʋngo

²¹ Tẽnga kẽedb zĩi ne pɛta, n zĩ ne pʋ-vɩʋʋgo. Koma namsd-b lame tɩ b tʋʋd dĩma la Wẽnde. B nakdame n ges yĩngri,

²² n le wẽneg n sulg tẽnga, la b sẽn ne yaa pɛt bala, b sẽn ne yaa lik bala n paas sũ-weoogre la yʋng sẽn pid yʋngo.

²³ Yʋng a woto buud ka tar beoog n vẽegdẽ ye. Soaala-Wẽnd deng n basame tɩ yãnd dɩ Zabulõ la Neftali tẽn-peelem, la beoog raarã b na n le pids-a ne b ziiri mogra noorẽ dãmba, Zʋrdẽ yaang rãmba, la Galile rãmba, tẽns sẽn da lebg bu-zẽmba soolem.