A Ezayi 7 - SEBR SÕNGO

Dĩma Akaz tog n maana gũusgu

¹ Da yaa a Akaz zamaanẽ. A Akaz ba la a Zotam, a Zotam ba la Zɩɩda dĩm a Oziyas. Dɩlla a Akaz zamaanẽ, dĩm dãmb a yiibu n sed ne taaba n na zab n deeg Zerizalɛɛm la b ka tõog ye. Dĩm a ye la a Resin, yẽ yaa Aram dĩma; la a waa ne Israyɛl dĩm a Peka, a Remaliya biiga.

² B wa n yeela a Akaz, a Daviid yagenga, yẽnda ne a poorẽ dãmba tɩ Aram dĩma kẽe Efrayim. La dĩma ne a neba sɩnga rigbu, wa sobgo sẽn kẽ kãoongo tɩ tɩɩsa vãad lengdẽ.

³ Wẽnnaam yeela a Izayi: «Kẽnge, fo ne f biiga a Sear-Yasub, n tɩ seg rĩma. A bee zugẽ ko-baoora ko-sora sɛtmẽ. Yaa fu-pɛgdba pʋʋga sor zugu.

⁴ Ad-f sẽn na n yeel-a: Gũus n da yɛɛs ye, da zoe rabeem ye, da bas raood ye. Da zoe Aramga a Resin, la a Remaliya biiga sũur sẽn puuga ye. Yaa ra-giis a yiib sẽn nukd bug-zõos bala.

⁵ M miime tɩ Aramsa, ne a Peka la a Efrayim tãb-biisa baood n na n taka zabr ne foo. D wʋma b sẽn yeele:

⁶ d bob zabre n kẽ Zɩɩda! D kẽes-a rabeem; d modg-a t'a wa naag tõndo, d kẽes-a a Tabeyɛl biiga soolmẽ.

⁷ La ad Soaala-Wẽnd sẽn yete: Dẽ kõn saage, dẽ kõn tõog ye.

⁸ Aram na-tẽnga yaa Damas, la a Resin yaa dĩm Damas pʋgẽ bala. — Ka ne yʋʋm pisoob la a nu tɩ Efrayim yell sɛɛme.

⁹ A Efrayim na-tẽng yaa Samari, la a Remaliya biiga yaa dĩm Samari pʋgẽ bala. Y sã n pa teeg Soaala-Wẽnd bala yãmb me yell sɛɛme.»

A Wẽnd-bee-ne-do

¹⁰ La Soaala-Wẽnd le yeelame tɩ b wilg a Akaz woto:

¹¹ «Kos f Soaala-Wẽnd tɩ b kõ-f makre, n wilg tɩ b be-la f poorẽ. F ratame tɩ makra yi tẽnga, togse; f ratame t'a yi sa-gãnẽ, togse.»

¹² A Akaz leokame: «M kõn saag n kos makre, m kõn saag n kʋɩɩb Soaala-Wẽnd ye.»

¹³ T'a Izayi na n yeele: Kelg-y ka, Daviid doogo neba, pa sek tɩ y lak ninsaalb yam tɩ y rat n lak m Soaala-Wẽnd dẽnna?

¹⁴ Yaa Soaala meng n na n kõ-y makre. Ade: Pa-kuli n dɩk pʋga n na n dog a biiga la a na pʋd-a-la a Emmanwɛl, Wẽnd bee ne-do.

¹⁵ Biiga rɩɩb na n yɩɩ bĩisim la sɩɩdo, n tãag wakat ninga a sẽn wat n mi wẽng kisgu la neer baoobo.

¹⁶ La ka ne rẽ, tɩ tẽns a yiibã fo sẽn digd b dĩm dãmba taoorã lebga we-raoogo.

¹⁷ Sã n ya foo, sã n ya f buudã la f naama roogo, Soaala-Wẽnd na n sika a zugu yel-beedo wa b sẽn zɩ n yãend a taare, al Israyɛl ne Zɩɩda welgra tɛka. — Wã gom n yegda Asiri.

Fãadba n na n wa kẽ tẽngã

¹⁸ Daar n wate, Soaala-Wẽnd na n peeba wɩɩga la neb sẽn ya wa zõose, n ka tõe n sõde, na n dʋʋga Ezipt kʋɩlgã n wa, la neb sẽn ya toos wa sĩ na n yi Asiri n wa.

¹⁹ B fãa na n wa kẽe tãmsa londẽ la pĩisa bogdẽ, n kẽ tuuda fãa n kẽ bãadã fãa.

²⁰ Daar n wate, Soaala-Wẽnd na n dʋʋga Efrat kʋɩlga n peng barga n põng y zug zoobdo la kõbg fãa la toɛɛnga.

²¹ Yaa dasem kãense la ned kam fãa na n gʋʋl nag-yãang a ye la bʋ-yãans bɩ pe-yãans a yiibu.

²² Rũmsa sẽn tar bĩisim wʋsgo yĩnga, ned fãa na n tõog n dɩɩ bĩs-naare. Sẽn pa-b tẽnga fãa dɩɩbo na n yɩɩ bĩs-naare la sɩɩdo.

²³ Dasem kãense, pʋʋg sẽn sel bugsuntungu, bugsuntung tɩɩs na ta tusri, n da tõe n koos n paam ligd ka tɛka, pʋ-kãng na n piuuga ne kãgre la gõose.

²⁴ Tãbda rãmb na n wa tãoosa be. Tẽnga gill na n lebga gõos ne gõose.

²⁵ Tãmsa pend sẽn da ya pʋtã, ned ba a ye wãk kõn le kõrg be, sɩlg-nao-yẽes la gõosa yĩnga. B na n lebga niis la piis wãbnego zĩiga.