A Ezayi 66 - SEBR SÕNGO

Sɩda la zirẽ tũudem

¹ Ad Soaala-Wẽnd sẽn gomde: «Yĩngra ya m zaoore, tẽnga ya m nao teegr zĩiga; doog ninga y sẽn na n me m yĩngã, do-kãng buud na n yɩɩ wãn wãna? Yaa zĩ-bʋgo la m vʋʋsga rooga na n ti?

² Y sẽn ne wã fãa yaa mam nug tʋʋmde, fãa gill yaa maam n so, yaa maam n gomde. Mam sẽn pẽgd a soaba, yaa naong soaba, yaa nimbãan-neda, sẽn kelgd m goama n yɛɛsdẽ la a rigd dabeem.

³ La yaa bõe la m ne yã? Kẽer maoong rũng sã n ya naafo, kẽer dẽnd yaa ninsaala, tɩ kẽer ya pesgo. Kẽer me yaa baag la b wẽeda; kẽer wata ne zom wamde, tɩ kẽer wat ne kurkur zɩɩm; kẽer yaa wisd la b yõogda. Kẽer yaa wẽn-naands la b waoogda. La bãmb sẽn yãk b so-yoog n tũudẽ wã, b sẽn bas maam n pʋgd yel-yoodã b yetame tɩ rẽ n tat bãmb yam.

⁴ Ad-y mam me sedame tɩ m na sɩbg b tʋʋm yoodã, tɩ m na tak b zugu b sẽn zoet bũmb ninga wa fãa-fãa wã. Sɩda, mam boolame la ned pa sak ye, mam gomame la ned pa wʋm ye, mam sẽn get bũmb ning wa bõn-wẽngã ad-y yaa bõn-kãng la b maan yã, sẽn ka noom maama la b yãk yã.»

Wẽnd lʋɩɩsda b toogo

⁵ Kelg-y Soaala-Wẽnd gomde, yãmb fãa sẽn yɛs ne rigbu m koɛɛga sã n lʋɩ y tʋbẽ. Kelg-y tɩ y sẽn nong maama yĩnga, y tara saam-biis sẽn kis yãmba, sẽn lebsd yãmb poorẽ. Bãmb n gomd n laadẽ la b yetẽ: «Soaala-Wẽnd ziira pukr daare, sãnd d ka na yãend y sũ-noog langre!» Ad-y yaa bãmb dãmb n na n paam yãnde.

⁶ Kelg-y koɛɛg ning sẽn sãta, bʋʋr ning sẽn yit tẽnga pʋgã, sẽn yit wẽnd doogẽ wã. Yaa Soaala-Wẽnd n dond b bɛɛba b sẽn tog ne rolb ningã.

⁷ Yɛ la pag rog biiga n ka reng n kũm dogem, n dog bi-ribla n ka tol n dig rogem waoodo?

⁸ Ãnda n zoe n wʋm yell a woto buudu, ãnda n zoe n yãend yell a woto buudu: tẽng sẽn tiig vugr n lebg tẽn-kãsenga? Buud yikda vugri n lebg bu-yaleng bɩ? Yaool n na n yɩɩ woto ne Siõ: a na n doga a kamba t'a pa yãe n kũm dogem ye.

⁹ «M sã n sak tɩ pag pʋg bɩ, yaa Soaala-Wẽnd n gomde, m na gɩdg biiga rogem sɩda? Maam, Naaba-Wẽnd, kõn bɩɩs pʋga la m le kẽ sʋk n sãamd dogem ye.»

¹⁰ Dɩlla, yãmb fãa sẽn nong Zerizalɛɛm bɩ y naag-a n kɩdem sũ-noogo, bɩ y naag-a n lange. Yãmb fãa sẽn da yãend a bʋko n zoe n kelem a kʋʋrã, naag-y-yẽe marsã n bas y sũ-nooga t'a fudg n daale.

¹¹ Woto a na bels yãmb n gãneg y sũuri, y na lebg wa kom-peelse b ma rãmb sẽn bugd b yãoogẽ tɩ bĩisim noog ka le tõe n paoog-b ye.

¹² Ad Soaala-Wẽnd sẽn yete: «M na n teesa Zerizalɛɛm m kũun sõma wã, n tees-a bu-zẽmba arzɛgsã, tɩ b fõd wa kʋɩl-bɛɛga, n madg-a zãnga. M na n gesa y yelle wa ma sẽn get a bi-pɛɛlg yelle, n bugd-a, n gãnegd-a a naoẽ, n laad ne-a.

¹³ Wala ma sẽn belgd a biiga, mam me na belg yã, Zerizalɛɛm pʋgẽ, m na belg yã.

¹⁴ Y na n yãee rẽnna la y sũur na n yɩɩ noogo la y vɩɩma na n le yãnga y pʋgẽ, tɩ y wuk wa sẽoog moogo.» Soaala-Wẽnd na n wilga b pãnga b kambã la b sũura na n fudgame n yõog b bɛɛba.

¹⁵ Soaala-Wẽnd zomba bugum sawadgo, b sẽn zomba wẽnda sɩlmande. Ad-y b pida ne sũ-puuri, b wata wa bugum sẽn zomb tʋgre n na n wilg b sũ-puuri la b pids b kãab beedo.

¹⁶ Wẽnd na n bʋʋ ninsaalba fãa, ne bugum la sʋʋga. Sẽn na n pa-b Wẽnd nugẽ wã na n yɩɩ wʋsgo.

¹⁷ M gomda neb niyns sẽn yɩlgd b mense n na n kẽ tɩɩs sẽn gũmẽ la b gũbg b wẽn-naanda sẽn yɛs tẽnsʋkã, n naag ne sẽn zĩ n wãbd-b kukuri nemdo, bɩ laoose, bũmb fãa sẽn ya wɩɩbdo. Ad-y nin-bãmba fãa na n menema vugri!

¹⁸ Soaala-Wẽnd mi b sẽn maanda fãa, Wẽnd mi b sẽn tagsd b yamẽ. M watame, yaa Soaala-Wẽnd n gomde, n na tigim ninsaalba buud toɛ-toɛyã la zɛlma buud toɛ-toɛyã. M yeelame tɩ b wa tɩ m puk bãmb m ziirã.

Tigsg kãsenga raare

¹⁹ M na ning makre b tẽngẽ tɩ b bãng tɩ maam n so-ba. M sẽn na n kao b rãmb bʋʋdo n bas-b ne yõore, m na n tees-b-la Tarsis, Ypl la Lud tẽnse. Tẽn kãens neba tãp ka yãagd n tão n yõsg ye. M na n tees-b-la Tubal la Yavã tẽnse. M na n tees-b-la al tẽn-zãorgẽ, al zĩis niyns b sẽn zɩ n wʋm tɩ b gomd m yelle, zĩis niyns b sẽn zɩ n yãend m ziirã. M sẽn na n tʋm neb niynsã n na n puk-a.

²⁰ Tẽn kãens na n le talla y saam-biisa fãa sẽn da be ne bãmbã n wa. B na n zombg-b-la wiidi, bilim-bilm, bõones la bɛda, n zombg-b bõn-wees bɩ yʋgma, n dʋʋs m tãn-sõnga zugu, Zerizalɛɛm. Soaala-Wẽnd n gomde. Dẽ n na n yɩ kũun b sẽn na n wa kõ maam; la m na reeg b kũuna wala m sẽn maand ne a Israyɛl kamba sẽn wat ne b kũuni, la-sõma pʋsẽ, m do-sõngẽ.

²¹ M na tũus kẽer meng bu-zẽmba sʋka n maan m maan-kʋʋdba, n maan maan-kʋʋdba sõangdba. Soaala-Wẽnd n gomde.

²² Ad-b sẽn le paase: m na n le naana bõn-paala, sa-paalga la tẽn-paalga. La al n gũud sa-paalgã la tẽn-paalga yikri, yãmb yagensã na kell n pa m taoore ne yʋʋr sẽn tar pẽgre.

²³ Kiuug na n pʋga kiuugu, tɩ vʋʋsg raar pʋg vʋʋsg raare, tɩ ninsaal buud fãa wat n yĩgend m taoore. Dẽ yaa Soaala-Wẽnd n yeele.

²⁴ La wakat kãng marsã la b na n yi n ges neb niyns sẽn zãgs-b maama n ki n dɩgã. Zũnzũra sẽn dɩt-ba pa kiidi, bugma sẽn dɩt-ba me ka na n wẽneg n ki ye. B gesgo na n yaala ninsaal buud fãa sũuri.