A Ezayi 65 - SEBR SÕNGO

Beoog raare bʋʋdo

¹ M da rat n leokame la b pa sok-m tɩ bũmb ye. M da ratame n sõnge la ned pa kos-m sõngr ye. Dẽ la m yeel yã: «Ad-ma, m watame,» mik yɩɩ waa m goma ne buud a to, ne buud sẽn da ka gomd ne maam ye.

² M da tuta m nugu buud sẽn nak a kãare, sẽn tũud sor sẽn ka so-sõngo, sẽn maanda a sẽn date.

³ Yaa buud sẽn da baood m noore, dẽ yɩɩ vẽenega, la rẽ yɩɩ wakat fãa. Buud kãng n da kʋʋd maand tɩɩs sẽn gũmẽ, la a yõod tɩdare wẽn-naandsa yĩnga.

⁴ Buud kãng ra kẽed n zĩi yaadẽ, n gãe bogdẽ, n wãbd kurkuri, tɩ b laas reegd nemdo, la nemd dɩɩb sẽn da kisi.

⁵ Buuda kamb ra yeta sẽn segd-b bãmbã: «Pa-y yɩɩga, da sɩɩs-y-d ye ka rẽ d sõmblema na wa ne y kũum.» Ad-y m sã n ne Wẽnd tũudem a woto buudu, m sũur puugdame n yõogd-ma.

⁶ Ade, m gesa b manesma n tɩge la m ka na n le sĩnd ye, dẽnd m dok m sũuri, n kõ ned kam fãa a sẽn tog ne, pʋs n na n zʋʋga a sẽn dat menga.

⁷ Maam a Naaba-Wẽnde, n gomd woto: m naagame n sõta b mensã la b ba rãmba yel-wẽna. Bãmb me ra yõoda wisdu b wẽn-naandsa yĩnga, tãms sẽn lug zutu, b kunkuba zutu, la yaa woto la b ra baood m noore. Dẽ me yĩng la m na n sɩbg-ba, la m na n sɩbg-b lame n bãge.

⁸ F sã n yãend bugsuntung willi sẽn tar biis sẽn bɩ n sakd dɩɩbo, f yetame: «D da kaoog-a ye, tɩ yaa rãam sẽn na n tall pãnga la a na n wa kõ-d tɩ d yũ.» Yaa woto la m na n maan ne m nebã, Soaala-Wẽnd n gomde, m nug ka na n sɩɩs-b ye.

⁹ M na n kõo yagense a Zakoob, n kõ yagens a Zɩɩda; bãmb n na n soog m sẽn kõt-b tãms niynsã, bãmb n na n soog-b zãnga, bãmb zut la m neba na n wa ti b zagse.

¹⁰ Sẽn na n lɛɛg-ba n kẽ maama Sariõ bãg-faagã n na n lebg b rũmsa wãbneg zĩiga, Akor bãooga la b na n wẽ yãgre b rũmsa yĩnga.

¹¹ La yãmb sẽn basd maama, yãmb la m na n leok marsã, n leok-y tɩ y ka le rɩkd ba bilfu sor ning sẽn dʋʋsd yãmb m tãn-sõnga zuga ye. Y sẽn mi marsã yaa y sam rɩ-noodo a Gad, y zu-noog wẽndã, wa y sẽn gomdã. Y sẽn mi marsã, yaa y pul rã-toose n kõ a Meni, la y yetame tɩ y pʋlemd nooga be-la a Meni nugẽ.

¹² Yaa kũ-toog la m pʋlemd y fãa gili. Y fãa na n pãs n lʋɩɩme tɩ b kood yã. M boolame la yãmb pa sak ye, m gomame la yãmb pa wʋm ye, m sẽn get tɩ ya wẽnga la yãmb maan yã, sẽn ka noom maama n noom yãmb sũuri.

¹³ Yaa rẽ yĩnga, Naaba-Wẽnd n gomde, m kamba na rɩtẽ tɩ kom kʋʋd yãmba, m kamb na yũud tɩ ko-yũud kʋʋd yãmba. M kamba na kɩdem sũ-noogo, tɩ yãmb zĩ ne yãnde.

¹⁴ B sũ-nooga sẽn na n pid zãng yĩnga, b na n zodga yɩɩn noodo la yãmb kɛlenga na n yɩɩ toog waasgo; yãmb na n waasame, y na n basa raoodo.

¹⁵ Y na n basa y yʋʋre t'a yɩ kãab-beed yʋʋre m kamba nengẽ, tɩ b na n gomd woto: «Bɩ Soaala-Wẽnd bas-f tɩ f looge wala a Zagla bɩ a Zagla!» Yʋʋr ning m kamba sẽn na n sakã na n yɩɩ toore.

¹⁶ B tẽngẽ wã, ned ninga sẽn dat-a n kãab a to kãab noogo, yaa bãmb b ye bal sẽn ya Wẽnda yʋʋre la b na n pʋde. Sẽn dat-ba n wẽene, yaa Wẽnde, sɩd Naaba, yʋʋr bal la b na n wẽene. N-ye! Yel-beed niyns sẽn loogã Soaala-Wẽnd na n yĩm-b lame, b na luda Wẽnd nifẽ. Yaa Soaalã n gomde.

Sa-paalle, tẽm-paalle

¹⁷ M na n naana yĩngri la tẽnga, b na n yɩɩ paala. B kõn le tẽeg yĩngr la tẽnga sẽn looga yell ye,

¹⁸ Bɩ y kɩdem sũ-noogo, bɩ y ra vʋʋs ne kilsgu ye; ad-y bũmb la m na n maane, m na n naana Zerizalɛɛm sẽn mi kɩdengo, t'a kamba me pid ne sũ-noogo.

¹⁹ M sũur yaa noogo ne Zerizalɛɛm, m sũur yaa noogo m sã n tẽegd m buuda yelle. B kõn le n wʋm yãbr dãamd ye, b kõn le wʋm waasg ye.

²⁰ Bi-pɛɛlg sẽn na n doge n wẽneg n pa ne dasem a wãna kõn le zĩnd ye; bi-bɩɩg me kõn loog t'a pa reng n kʋʋl ye. F sã n ki f yʋʋm kobaga, f kii pẽbgo. F sã n ki n pa ta yʋʋm koabga, b na n ges-f-la wa b kãab-f-la wẽnga.

²¹ B sã n me roto, b na kẽ b pʋsẽ, b sã n sel bugsuntundu, b na rɩ b yõodo,

²² B kõn le me tɩ ned a to wa reeg n kẽ ye, b kõn le sel tɩɩse tɩ ned a to wa rɩ b biis ye; m neba na kaoosame wala b tɩɩsã sẽn kaoosde, m kamba na n dɩ-la b tʋʋma yõodo.

²³ Nams zaalem kõn le zĩnd ye, b kõn le rog kamba sẽn na n wẽneg n kɩ b nifẽ ye. Bãmb n na n lebg buud ning sẽn paamd m barkã.

²⁴ M na sake, tɩ b nan ka bool-m meng ye, b ka na n gom n baase, tɩ m zoe n wʋma b sẽn date.

²⁵ Digd-n-yĩidg ne pe-bila na n naaga taab bãoog a ye, bõnyẽeg na n wãba yamdo wa naafo, waaf rɩɩb na n kong n yɩɩ tẽnga tom bala. Tãn-sõnga zugu, sãoong buud kõn le sãam ye, wẽng buud me kõn le tʋm ye, Wẽnd n yeele.