A Ezayi 64 - SEBR SÕNGO

¹ Y yɩtẽ-la wa bugum sẽn dɩt tuudu, wa bugum sẽn na n kɩt tɩ koom kɛɛge; la woto y bɛɛba na bãngẽ y sẽn ya Wẽnd ninga. Bu-zẽmba me na digẽ dabeem y taoore,

² tɩ yaa bõn-bãna la y na n maanẽ. Y sã n sigda, tãmsa mens na rigimd y taoore.

³ Ned zɩɩ n wʋm tɩ b gomda, ned nif zɩɩ n gese, bɩ n yãende, tɩ wẽnd a to sẽn ka yãmba tõog n maan, a neba yĩnga, a teegdba yĩnga, bõn-bãn a woto buud ye.

⁴ Yãmb yikd n sega sẽn maand-b yãmb raabo, sẽn maand-b yãmb raab ne sũ-noogo, la b sak n dɩkd sor ning y sẽn tuk b yĩnga. Yãmb sũur waa n puuga ne tõndo, la rẽ yɩɩ tõnd n konge. Marsã d sã le rɩk d pĩnd so-sõngã, d na paam fãagre.

⁵ D fãa da lebga wa nin-dẽgdo n ka le tõe n maan bũmb y yĩng ye. D tʋʋma fãa ra yaanda y sũuri wala fuug sẽn kõd ne zɩɩm. D wẽnema tall-d lame n looge wa sobgo sẽn loogd ne tɩɩg vã-koeemse.

⁶ Ned ba a ye ka le ket sẽn yõkd y sɛɛg ye, sẽn dat-a n le maneg a yelle la a le rɩk a meng n kõ yãmb ye. D neeme tɩ y ka le get d neng ye, la y bas-d-la d yel-wẽna maasmẽ.

⁷ Ne rẽ fãa, Soaala-Wẽnde, yãmb bala la tõnd ba. Tõnd yaa yagdo, tɩ yãmb ya d yagda, tõnd yaa yãmb nug tʋʋmde.

⁸ Da puug-y y sũur tɩ loog ye, Soaala-Wẽnde, da zĩi n tar d yel-wẽna tẽesg ye, n tar d kongra tẽegr ye. Lʋɩɩs-y taoor bala d sẽn ya y buudã.

⁹ Y tẽn-sõma wã lebga raboodo, Zerizalɛɛm lebga zĩ-peen-daaga Siõ lebga vɩʋʋgo,

¹⁰ Doog ning sẽn da ya y rẽnna, d ba rãmba sẽn da waoogd-y zĩig ningã, d wẽnd do-neerã, b ning-a-la bugum. Zĩ-kãng la d ra nonga la a lebga raboogo.

¹¹ Yãmb tõe n nee raboogã n sĩnda, Soaala-Wẽnde, n sĩnd tɩ tõnd yãnd paasdẽ n dabda? A pus n zoe n looga toaag menga.