A Ezayi 62 - SEBR SÕNGO

Zerizalɛɛm tekre

¹ Fo nonglem yĩnga, Zerizalɛɛm, f nonglem yĩnga Siõ, m kõn le sĩnd ye, m kõn zĩi n ka maand bũmb ye, n tãag wakat ning f fãagra sẽn wat n puk wa sõore, bɩ n wit wa bug-vɩlenga.

² Bu-zẽmba na yãende tɩ Soaala-Wẽnd fãag-f lame, dĩm dãmba na yãend f ziiri. B na n boola f yʋ-paalã Soaala-Wẽnd sẽn pʋd-fã.

³ Soaala f Wẽnnaama nugẽ f na n wẽnega wa naam zu-vindga n wẽneg pugl sẽn yiis kibs yĩnga.

⁴ B kõn le bool foom tɩ pʋg-beoog ye, b kõn le bool foo abada, tɩ tẽng sẽn lebg raboog ye. B na n boola foom a rʋmde, n bool f tẽngã tɩ pag sẽn paam sɩd sõngo. Soaala na n pidsa f tẽnga ne sũ-noogo, f tẽnga na n wẽnega pag sẽn paam sɩd sõngo.

⁵ N-ye! Wala rasãng sẽn kẽed kãadem ne bi-pugla, woto me, sẽn le maneg n meta fooma, na n yɩ-la f sɩda. La wala pʋg-bil sẽn noogd a sɩd sũuri woto me foo n na yɩ f Wẽnda sũ-noogo.

⁶ Zerizalɛɛm, f lal-gũbra zugu, neb la m ning tɩ b gũ tẽngã, la wĩndg bɩ yʋngo b pa tog n sĩnd b noor ye. M yeel-b lame: «Yãmb tʋʋmd yaa y tẽeg Zerizalɛɛm yelle, n tẽeg y Soaala-Wẽnd tẽnga yelle; dẽnd yĩng bɩ y ra vʋʋs ye.

⁷ Da bas-y Wẽnd ne laafi ye, n tãag wakat ninga b sẽn na n le maneg n me Zerizalɛɛm n kɩt t'a lebg dũni wã tõr zu-zẽkre.»

⁸ Soaala-Wẽnd wẽena woto: «Wala sẽn ya sɩda la sɩd bala tɩ tõog buud fãa be-la m nugẽ, m wẽenda ne foo, m buudu, tɩ m kõn le bas bɛɛba tɩ b rɩ f sẽn ko ye, la ned kõn le yi kɛɛnga, n wa yũ f yʋʋmda rãam f sẽn nams f meng n paam ye.

⁹ Yaa sẽn na n tigs-b koodã n na dɩ-a la b naag n pẽg Soaala-Wẽnde; yaa sẽn na n fãs-b bugsuntunga biisi n na yũ rãama, Wẽnd sɩmannẽ.»

¹⁰ Zerizalɛɛm dãmba, yi-y, yi-y la y bas y tẽngã! Pak-y tɩ sẽn wat-ba tõog n kẽ; maneg-y n yẽd-y sora londo, yiis-y kuga zãnga, la rʋʋs-y tãb-kaoor tɩ bu-zẽmba yãende.

¹¹ Ad Wẽnd na n kõo noore, dũni wã yaang la a taoor dãmba. Yeel-y Siõ rãmba: «Ad-y Fãagda sẽn wate, a wata ne a sẽn zab n deeg b rãmba, a wata ne a sẽn nams n paame.»

¹² B na boola yãmb ne bãmba tɩ buud sõngo, Soaala-Wẽnd sẽn fãag b rãmba. La foo Zerizalɛɛm, b kõn le bool foo tɩ tẽng b sẽn zoe n bas ye, b na n bool-f lame: tẽng b sẽn nonge.