A Ezayi 60 - SEBR SÕNGO

Vẽenem paalg buida Zerizalɛɛm

¹ Zerizalɛɛm yiki, yik n yãge tɩ f vẽenem waame, yik tɩ Soaala-Wẽnd ziira buid-f lame, a buiid-f-la wa sõore.

² Tẽnga gill zĩi ne lika, bu-zẽmba zĩi ne yʋngo, tɩ Soaala-Wẽnd ziirã yaool n puk foom wa sõore. B vẽenema puka f zugẽ.

³ Vẽenem ninga fo sẽn deeg n tãoosdẽ wã vẽenem kãng n na n tak bu-zẽmba dĩm dãmba.

⁴ Zẽk f nenga, karg n ges f taoore, ges f kamba fãa sẽn wate, ges b sẽn wat n tigimd f sɛɛgẽ. F kom-dibli yita tẽn-zãorgẽ f kom-pugli wã, b tat-b lame n watẽ.

⁵ F na yãend-ba, f na n kɩdmame, f sũur na yɩ noog wʋsgo, f sũ-nooga na pusgame n lebg langre, tɩ mogra pʋgẽ arzɛka, ne bu-zẽmba rẽnna, fãa tigmame n wat f nengẽ.

⁶ Yʋgma ka tɛka n na n pid f tẽn-peelma. Yaa Madiã la Efa yʋgma, la b fãa yita Saba la b fãa wata ne sãnem la tɩdare, la b fãa watame la b pẽgd Soaala-Wẽnde.

⁷ Kedar rũmsã fãa na n tigma f sɩmannẽ, Nebayot pe-raadã wata f yĩnga. B na n tall-b lame n wa Soaala maan-kugra zugu, la b maoonga na reege; la woto me la b na n zẽk b buuda yʋʋre.

⁸ Yaa yɛ rãmb la woto fãa, tɩ ya wa sawadg n maand zĩ-boogo, tɩ ya wa malwal n sigd b roogẽ?

⁹ N-ye! Koom-kogend tigma taaba al yɩɩga koom-kogend bɛdã n lʋɩt b taoore. Yaa al tẽn-zãorgẽ la b wat ne f kamba, n wat ne f kamba wanzurf la b sãnem, n wat n na n waoog Soaala-Wẽnde, n wat n na n waoog Israyɛl Wẽnnaama, la b kos tɩ b kõ-f sũ-noogo, Zerizalɛɛm.

¹⁰ Sãamba n na n le yik f lalse, b dĩm dãmb na n lebga f sõgen-kamba. Dẽ yaa Soaala n togse. Yaa mam sũur n dag n puugi tɩ m wẽ-fo, Israyɛl, la noom-m lame marsã tɩ m wilg foom m nonglem.

¹¹ F kʋɩlensã kõn le pag ye, wĩntoog bɩ yʋngo b kõn le sog ye, sẽn na n yɩ-la tɩ b kẽes-f pʋgẽ bu-zẽmba arzɛgsã, tɩ b dĩm dãmba yaool n pʋgd a yeyn-ye.

¹² Tẽng ninga la rĩung ninga sẽn ka na n kẽ-a foom, na n menemame, b fãa na n wãa zãnga.

¹³ Sẽn ya Libã googa faong la a zu-zẽkre tɩɩs sẽn wẽnd kʋgse, noense, ãoose, fãa na n wa paasa wẽnd dooga neerem. Woto b sẽn waoogd maam zĩig ningã m na pids zĩ-kãng ne m ziiri.

¹⁴ Sẽn da maan b foom pãnga, ad-b kamb sẽn kũudi n wat fo nengẽ, ad sẽn da sãbsd-b fooma sẽn yĩg f taoore. B na n bool-f lame tɩ Soaala-Wẽnd tẽnga, t'a Israyɛl Nin-sõnga Siõ.

¹⁵ B ra basa foom, ned da ka le nong-f ye, ned da ka le lɩkd n get-f ye. Rẽ sɛɛme, tɩ marsã tɛka m na n kɩtame tɩ f zug zẽk wakat buud fãa, m na n kɩtame tɩ f lebg sũ-noog bũmb tɩ yʋʋm tong taab n tõt sɛɛbo.

¹⁶ Bu-zẽmba ne b nanamsã n na n dɩlg-foo. Dẽ marsã la f na n bãnge tɩ maam f Soaala la f Fãagda, tɩ m sẽn pid ne pãnga, maam n yaa a Zakoob Wẽndã, maam n na n ges f yelle.

¹⁷ Yaa sãnem la m na n tall n wa f nengẽ kõn le yɩ zũud ye, yaa wanzurfu n na n deeg kut zĩiga, zũudu n na n deeg raoog zĩiga, kutu n na n deeg kugri zĩiga. Sẽn na n deeg pãng zĩiga, la ad-y pãn-tõog zĩiga, na n lebga laafi la zemsgo. Bãmb n so taoore.

¹⁸ B kõn le wʋm tɩ ned maand a to pãng tẽnga pʋgẽ ye; b kõn le gom sãoongo la wãab yelle f tẽn-peelmẽ wã ye. F na n tõog n boola f lal-gũbrã tɩ Wẽnd fãagre, n bool f kʋɩlensã tɩ Wẽnd Pẽgre.

¹⁹ Ka wĩntoogã n na n le vẽneg f raar ye, ka kiuugã n na n le kõ-f vẽenem yʋng ye, na n yɩɩ maam, f Soaala-Wẽnde, maam n na n kõ-f vẽenem wakat buud fãa la f na n yãga vẽenem tɛka.

²⁰ Fo vẽenema kõn tol n menem wa wĩndg sẽn pukd la a lʋɩtẽ ye; vẽenem kõn paoog f yʋngo wa ki-lik wakat ye. Maam, f Soaala-Wẽnde, n na n yɩ f vẽenem wakat buud fãa. M na wa ne kʋ-yãbra me tɛkem-tɛkem.

²¹ F tẽnga kẽedba na n yɩɩ nin-sõma bala, bãmb n na n soog tẽnga zamaan sẽn wate tɩ bãmb la m yag ne m nusi tɩ b puk m ziiri; b na n yɩɩ wa tɩɩse m sẽn sel m zẽedẽ.

²² Zak ninga sẽn ka weka wʋsgo na paam neb tusri la nug sẽn pa zãada soaba, a buuda na n lebga pãn-dãmb buudu. Yaa woto la maam, Soaala-Wẽnd meng yãgd n na n pidsi, wakata sã n ta.