A Ezayi 57 - SEBR SÕNGO

¹ Nin-sõma loogdame la yaa wa rẽ ka lam ned ba a ye. Nin-sõma kiidame tɩ ned ba a ye ka mi tiir ye. N-ye! Nin-sõma loogdame, la yaa sẽn na n yɩ-la tɩ b põs yel-beedã.

² Laafi wã na n waame, nin-tɩrg na n gũsa ne laafi.

Zabr ne wẽn-naandsa pʋgdba

³ Kolg-y, wa-y, dat-b-wẽng kamba, da-taase la pʋg-yoaadb kamba!

⁴ Ãnda la yãmb belgda, ãnda noor la y baooda, ãnda la y laada? Yãmb buuda yaa yel-maandb buudu, yaa zirẽ-be-rãmb buudu.

⁵ Yãmb saa n vigla y tẽn-kugã tɩ bɛd tẽngre la maasem sẽn beẽ. Yãmb kooda y kamba kʋɩls noorẽ la pĩis pẽgsẽ.

⁶ Yãmb sẽn baood wa fãa-fãa yaa kʋɩlsa kug saala, yaa bãmb sɛɛgẽ la f sũur nooma, Israyɛl, Bãmb yĩnga la f tũnugd rãam la kũun a taaba. M tõe n saka rẽ sɩda? Soaalã n sokde.

⁷ Fo rɩgla f gãag tãn-wok zugu, be la f rʋ yã n na n kʋ f maandã.

⁸ F rignoorẽ, f kʋɩlenga sɛɛga la f yasl f wẽnda togsende, f solgda f meng maam n yees f futã n maneg n dʋ f gãaga n bao ligd n yao f roellã la f yaal f yaalgo.

⁹ Fo zoe n pʋga a Melɛk ne kaam fo kõ-a-la yũ-nood kaam fo tʋma f neba al tẽn-zãorgẽ fo sika f meng n ta bʋg-tẽnga.

¹⁰ F wa n yɛɛ ne f so-wogdã la f ka saag n yeele: m kõn le kẽn ye. F le yẽega f pãnga wa bi-bɩɩga wa yaams ka tol n kẽ-f ye.

¹¹ La m sok n gese, fo sẽn bas maama, f ra zoeta ãnna rabeem, f ra zoeta ãnda nifu. Fo ka tẽeg maam yell ye, fo ka kees vɩʋʋg bilfr menga mam yĩnga, f sũurẽ ye, la rẽ wã m sĩnda m noore, m muma m nini; yaa rẽ la f ka zoe m nifu.

¹² F wẽnema na n vẽnegame la f kõn dɩ f tʋʋma yõod ye.

¹³ Toogã sã n wa tar-fo, kelem tɩ sãde tɩ daare wẽn-yoodã sẽn tigim f sɛɛgẽ wã na naag taaba n wa fãag-fo. Bãng tɩ sobgo n na loog ne b fãa. Sẽn teega maam, yẽnda n na soog m tẽnga, n soog m tãn-sõngã.

Wẽnd buuda sãoogre

¹⁴ Daar n wate tɩ b na n yeele: «Maneg-y sore, tuk-y sorã yalengo, tɩ m neba tõog n looge naana-naana.»

¹⁵ Yaa woto la Wẽnd ninga sẽn zʋʋga bũmb fãa wã, sẽn kẽed-a roog sẽn kõn wã abada, la sẽn tar yʋ-sõngã, gomda: «Maam, Sõmblem naaba sẽn zao yĩngrã, ad-y m bee ne nimbãan-dãmba, n be ne neng sẽn sur-a tẽngã, tɩ m datame n keng b sũuri, m datame n doog b nenga la m vʋʋg tooga sẽn zɩsg b rãmbã.

¹⁶ M ka na n yɛs n tar no-koeemde daar fãa, n tar zab la m puugd m sũur ye. Ka rẽ m neba sʋka, ned ba a ye kõn põs ye.

¹⁷ A Israyɛl n beege tɩ m sũur puug wakat yɛnga tɩ m nug zẽk n wẽ, tɩ m da ka rat n le yãend-a ne m nif ye. Yaa bãmb n kell n yɩ tõatba n bao sor ning b sẽn dat n dɩke.

¹⁸ M mi-la a Israyɛl tʋʋm wẽnsã la ne rẽ fãa, ad-m sẽn na n maane: M na sãoog-a lame, m na n wilg-a-la sore, m na maasa a kamba sũuri:

¹⁹ M na n kɩtame tɩ b yɩɩl sũ-noog yɩɩla, Wẽnd n yeele. Sẽn pẽ-ba zĩnd ne laafi, sẽn zãr-ba zĩnd ne laafi, m na n waa ne laafi!»

²⁰ Bas-y tɩ m mak nin-wẽnsã ne mogre: Mogrã dãmbame n ka le tõe n sigs ye, t'a wʋkd a noorẽ, rẽgdo la begdo.

²¹ Soaala-Wẽnd n yeele: «Nin-wẽnsa kõn paam laafi abada.»