A Ezayi 53 - SEBR SÕNGO

¹ Ãnda n deeg sẽn lʋɩ tõnd tʋbrẽ, tõnd sʋka, ãnda n tagse tɩ yaa Soaala-Wẽnd n lʋɩɩs b toogo?

² Bãmb nifẽ, b tʋʋm-tʋmda bɩɩme, a bɩɩ wala will sẽn tão tɩɩg sɛɛga, wala tɩɩg sẽn kɩ a yẽgna zĩ-koɛɛngẽ. A ka tar yagd sõngo la rasãndlem ye.

³ Yẽ la dũni rãmba sãbs yã, yẽ la b bas kɛɛnga, yẽnda n yãe toogo la fare. F pa yãet-a n pa lud f neng ye, yaoolgo la paoor bala n yɩ a rɩɩbo.

⁴ Yaool n yaa tõnd namsgo la a reeg n namse, a wʋma toogo sẽn da tog n yɩ tõnd dẽnna. Tɩ tõnd bas n tẽed tɩ Soaala-Wẽnd n sɩbg-a, tɩ Wẽnd, n wẽ-a, tɩ Wẽnd n ning-a yãnde.

⁵ Mik yaa tõnd yel-wẽna yĩnga la b da paoogd-a mik yaa tõnd yel-wẽna zɩslem n to-a teoogẽ. A yãee toogo tɩ tõnd yãend laafi, a noadã n maag tõnd dẽnna.

⁶ Tõnd da kẽeda moogo wala piisi. Ned kam fãa da tũuda a meng sore, dẽ la Soaala-Wẽnd dogl a zug tõnd fãa yel-wẽna.

⁷ B talla a lengre, t'a bas a menga, a pa yaag a noor ye. Wala pe-bila b tall-a lame n na tɩ kʋ, wala pe-yãanga b tall-a lame n na n tɩ wõrs a kõbdo t'a pa yaagd a noor ye. Tʋʋm-tʋmda me pa yaag a noor ye.

⁸ B paalg-a-la pãn-tõog bʋʋdo, la a zamaana ned pa gom n yiis-a wĩirẽ ye. N-ye! B yiis-a-la nin-vɩɩs sʋka, yɩɩ buuda yel-wẽna yĩng la b kʋ-a.

⁹ B bao-la a gãag zĩig nin-wẽns yaadẽ, b bao-la a yaoog arzɛk rãmb sʋka. A yaool n zɩ n maan kegre, a noor zɩ n togs zirẽ-beed ye.

¹⁰ Yaa Soaala n da yalse tɩ b sõgna yãend toogo la b waa n sãoog-a lame, t'a sɩd kɩsa a vɩɩma a taab yĩnga. A yõor na n yɩɩ woko la a na n le roga kamba. Soaala-Wẽnd na n tũ yẽ maasem n pids b raabo.

¹¹ «A namsga sẽn yɩ wʋsga poore, Soaala n gomde, m tʋʋm-tʋmda na n vɩɩndame la a vɩɩm na n yɩ-a-la noogo. Ninsaalba taoore m na n yals-a-la wa nin-sõngo t'a sak n tʋka b yel-wẽna a zugẽ.

¹² Yaa rẽ yĩnga la m na n zẽk a zugu nin-bɛda sʋka la a na n naaga pãn-dãmbã n deeg a raood pʋɩɩre. Bãng-y t'a rɩka a menga n bas ne kũum tõogo, t'a basame tɩ b sõd-a yel-maandb sʋka. La yaool n yaa zãma wã beegre la a tʋk yã, yaool n yaa yel-maandba yĩnga la a ra yõkd sɛɛga.»