A Ezayi 52 - SEBR SÕNGO

¹ Zerizalɛɛm neke, nek tao! La wɩsg f menga, Siõ, tẽn-sõngo, yeelg f fu-neeba. Ad sãan la nin-dẽgdo kõn le tag f sɩmand ye.

² Fo rẽgma ne wubsgu, fugumd wubsgã, Zerizalɛɛm, Yik yĩngri, leb f zĩigẽ, Siõ, foom b sẽn yõk n pag roogo, kao wĩ wã sẽn pid f yublã.

³ N-ye! Woto la Soaala-Wẽnd gomd ne buudã: «B ka ra yãmb ne ligd ye, dẽ yĩnga mam me na reeg yã tɩ ka tũ ne ligd ye.»

⁴ N-ye, woto la Wẽnd gomda: «M buuda neba da kẽnga Ezipt n na n tɩ zĩnd be, la rẽ loogr poore yɩɩ Asʋr n tall-a toogo.

⁵ La woto wã m yõoda la bʋgo? Naaba-Wẽnd meng n sokde. B looga pa-weer ne m buuda zaalem, m pa reeg lagfr ye. B sẽn be b rãmb nugẽ wã kaasdame tɩ bãmb n maan raoodo. Ket n yaa Soaala-Wẽnd n gomde. Beoog sẽn vẽege m yʋʋra tara sãoong n dabda!

⁶ Yaa rẽ yĩnga la raar a ye, m buuda na bãng m sẽn yaa a soaba la raara zoe n waame.»

Soaala na n lɛɛg n waa Zerizalɛɛm

⁷ Zu-noog soaba la sẽn dʋ-b tãnga zugu ne kiba-noogo, n na wilg laafi la sũ-noog zamaan paalga, n wilg fãagre, n na n yeel a Siõ: «Wẽnd sɩnga b naama rɩɩbo.»

⁸ Bʋʋr n sãte, yaa tẽnga gũudba koees n sãte, b naaga taab n kelemd sũ-noogo, tɩ b nin nee Soaala-Wẽnd sẽn kẽed Zerizalɛɛm.

⁹ Naag-y taaba n kils y sũ-noogo Zerizalɛɛm dot sẽn da sarem, Soaala-Wẽnd maagda b kamba sũuri, Soaal le deega Zerizalɛɛm.

¹⁰ Soaala-Wẽnd wilgda b pãnga, n wilgd b sõmblem ãndũni rãmba, ba sẽn be-b mooga sɛtmẽ, na n yãenda fãagre ninga Wẽnd sẽn wa ne a soaba.

Y tog n yii Babilon

¹¹ Yik-y, yik-y, yi-y n loog-y, yãmb fãa sẽn zɩt-b Soaala-Wẽnd waoogr teedã, yi-y Babilon tao-tao. Da sɩɩs-y bũmb sẽn ya rẽgd ye, woob-y y rẽgda fãa n base.

¹² La y ka na n zoe yãgb zoees ye, y ka na yi wa b rigd-y lame ye; sẽn pakda y sorã yaa Soaala-Wẽnde, sẽn le be a poorẽ n gũusdẽ le yaa Israyɛl Wẽnnaam.

Wẽnd tʋʋm-tʋmda yɩɩl a naas soaba

¹³ Ad Soaala sẽn le gomde: «M tʋʋm-tʋmda yell na n manegame, a yʋʋr na n yiime, a pẽgr na n paasame.

¹⁴ Neb wʋsgo da yãee-a lame n yɛɛse t'a nenga da sãama zãnga, t'a ra ka le tar ninsaal wẽneg ye.

¹⁵ Marsã wã b pɛleng na n yɩkame tɩ b nee dĩm dãmba sẽn sur a taoore n ka yaagd b noore, tɩ b nee b sẽn zɩ n yãende, la yaa wa b kelgda b sẽn zɩ n wʋme.»