A Ezayi 50 - SEBR SÕNGO

Welgr ka Wẽnd ne b buuda sʋk ye

¹ Soaala-Wẽnd tara b sokre n na n sok yã: «Sã n yaa sɩda tɩ m yiisa Zerizalɛɛm, yãmb ma wã, wa-y ne sebr ninga m sẽn gʋls n yiis-a wã, ka rẽ bɩ y wilg maam ned ninga m sẽn koos yãmb ne a soabã tɩ y lebg a yem-daadã, tɩ m paam ligdi n yao m sama. Ade, b sã n koos yãmba yaa y yel-wẽna yĩnga la b koos-y-yã. La m sã n yiis y ma wã, yaa a tõdgra yĩnga, yaa y tõdgra yĩnga.

² M sẽn wa yirã, yaa bõe yĩng la m pa yãe neda? Bõe tɩ m bool tɩ ned pa leok-ma? Yao ligd n deege yaa toog ne maam bi? M konga pãng sẽn na n fãag-y bi? M gomd a ye bala tɩ mogr kʋɩ, m gomd a ye bala tɩ kʋɩlg lebg dasempʋɩɩga, m gomd a ye bala tɩ zĩma kong koom, n ki ko-yũudu n põoge.

³ Ad-y m datame n yeelg saaga fu-sablga, n yeelg-a kʋʋr futu.»

Wẽnd tʋʋmd-tʋmda yɩɩl a tãab soaba

⁴ Soaala-Wẽnd kõ-m-la karen-biig zelemde, n wilg mam sẽn tog n togse, n wilg mam sẽn na n yiis gomd ninga, n le yẽeg sẽn basd-b raooda gĩini. Yibeoog fãa b nɛkd-m lame, yibeoog fãa b yoogda m tʋbre tɩ m le kelg wa karen-biig sẽn tog n kelge.

⁵ Soaala-Wẽnd yoogda m tʋbre, tɩ m kelge la m ka zãgs ye, m ka tar n leb poorẽ ye.

⁶ M sulga m poore n kɩs pãbdba, m teesa m yɛgdga tɩ b gʋs m toɛɛnga, m basame tɩ b tʋbs m neng kolkoodo, m sakame tɩ b paoog-m ne tʋʋre.

⁷ Soaala-Wẽnd wa-la m sõngre, yaa rẽ me la m pa bas raoodo, m wɩsga m nenga wa wãre, la m saagdame tɩ maam n na n tõoge.

⁸ Soaala-Wẽnd be-la m sɛɛgẽ la b na n kõ-m-la bʋʋm. Ãnda n na n sak n bool-m bʋʋdo? A soab wa tɩ d babs bʋ-kaooda! Ãnda n dat n yɩ m bʋʋd-n-taaga? A soab wa tɩ d seg taaba!

⁹ Soaala-Wẽnd wa-la m sõngre, ãnda n na paalg-ma? M bʋʋd-n-taasa na n kʋdga wa fuugu, wa fuug sẽn kẽ bugdu n tõosd kʋdse.

¹⁰ Ned sã n be yãmb sʋka n zoet Soaala-Wẽnd nifu, bɩ a kelg Wẽnd tʋʋm-tʋmda koɛɛga! Ned ninga fãa sẽn kẽnda likẽ n pa tol n ne vẽenem wa sẽn paoode, a soab rɩk a meng n bas ne Wẽnde, a soab teeg Soaala-Wẽnde!

¹¹ La sã n ya yãmb fãa sẽn yõgen bugma, tɩ y logd pid ne pɛ-zẽnema, ad bũmb ning sẽn gũud yãmba: Yaa yãmb menga bugum n gũud yã yaa yãmb menga pɛɛma, yaa pɛɛm niyns yãmb sẽn zẽna n gũud-y. Soaala-Wẽnd sẽn bĩng yãmba la rẽnna, y na n kii kũ-toogo.