A Ezayi 49 - SEBR SÕNGO

Wẽnd Tʋʋmd-tʋmda yɩɩl a yiib soaba

¹ Tẽn-zãorgẽ dãmba, kelg-y, tẽnga sɛtmẽ dãmba, kelg-y! Soaala-Wẽnd boola maam, tɩ m nan ka rog ye, b boola m yʋʋre tɩ m ket m ma pʋgẽ.

² B saasa m noore wa sʋ-rɩtga, b solg-m-la b nug pʋga, b sɩlsa maan wala pĩim, n dɩk n solg b lokẽ.

³ Soaala yeel-m lame tɩ m taas a Israyɛl: «Fo yaa m sõgne, na n tũu ne foom a Israyɛl, tɩ m puk m ziiri.»

⁴ M da yeta m sũurẽ tɩ m namsa zaalem, tɩ m sɛ-la m pãng zaalem, mik m pʋɩɩr da keta m Soaala nengẽ, m dolb da keta Wẽnnaam nengẽ.

⁵ Marsã wã Soaala-Wẽnd sɩd gomame, bãmb yeelame tɩ b naana maam m ma pʋgẽ, tɩ m yɩ b tʋʋm-tʋmda, la m sõnge t'a Zakoob lɛɛg n wa, n sõng t'a Israyɛl lɛɛg n wa tigime. Woto wã m be yõodo Wẽnd nifẽ, la m Soaala-Wẽnd meng la m pãnga.

⁶ Bãmb n yeel maam: «Ka sek tɩ f yaa m tʋʋm-tʋmd ninga sẽn na yik a Zakoob kamba sẽn lʋɩ wã la f tall a Israyɛl kamba sẽn kellã n wa ye. M datame tɩ f lebg bu-zẽmba fãa vẽenem, tɩ m fãagrã ta dũni wã yaanga.»

Pa-weta lebgre da kãsenga

⁷ Soaala-Wẽnd gomda ne foo, a Israyɛl Fãagda, a Israyɛl Nin-Sõnga gomda ne ned ninga sẽn ka yãe waoogre, ne dũni ninsaalba sẽn ges a soab wa wɩɩbdã, ne ned ninga na-toosã sẽn kẽes yembdã: «Ad-y dĩm dãmb sã n yãend-fo, b na n yika b zaoorẽ n yals yĩngri, na-komsa na n wõgemda f taoore.» Woto la b na n wilg tɩ b waoogda Soaala, Israyɛl Nin-Sõngã, ned ninga sẽn tũusa foom la b pids b pʋlemde.

⁸ Naaba-Wẽnd yeta woto: «M nimbãan-zoeera wakatã, m deega f kosgo, f fãagra raare, m wa n sõng-f lame, m welg-f-la toore la m segl-f lame, la m yalsa f poorẽ tɩ zooda na n le tõog n yõge. M na le yik tẽn-sõngã, sẽn sãam n dɩgã n le maneg-a n pʋɩ.

⁹ M na yeel b sẽn pag b rãmb doogo: ‹Yi-y-yã!› M na yeel sẽn be-b likẽ: ‹Wa-y vẽenemẽ!› La soya zutu, tãmsa zutu, b na yɩ wa rũms sẽn kẽnd la b wãbdẽ la sẽn paamd yamdo kunkuba fãa zutu.

¹⁰ Kom sɛɛme, ko-yũud sɛɛme, wĩnto-raase, pemsem sẽn yõogd wa bugum sɛɛme. B sẽn zoe b nimbãanegã, b na tees-b ko-vɩɩs zĩiga.

¹¹ Tãmsa fãa na n lebga sore londa fãa na n pidsame.

¹² Ad-b sẽn wate, la yaa yɩɩg la b yita; kẽer yita nug goabg sẽnẽ, tɩ kẽer dʋʋg mogre, nin-taoore, tɩ kẽer yit Ezipt sẽnẽ.»

¹³ Yĩngri dãmba, kaas-y sũ-noogo, tẽng zug rãmba, kɩdem-y! Sẽn be-b tãmsa zutu, tãs-y sũ-noogo! Wẽnd wa n maaga b neba sũuri, Wẽnd kũma b neba nimbãanega.

Mam ka yĩmd f yell ye

¹⁴ A Siõ da yetame: «Soaala-Wẽnd yĩma m yelle, Soaala-Wẽnd bas-m lame.»

¹⁵ M sok n gese: pag tõe n yĩma a biiga a sẽn yẽsem bɩ? Pag tõe n kisga biig sẽn dog a pʋgẽ bɩ? La rẽ sã n da beẽ, mam yẽ kõn yĩm f yell abada.

¹⁶ Gese Siõ, m gʋlsa foom m nuga pʋga, f tẽnga lalse la m nina karg n getẽ.

¹⁷ Sẽn wat-b n na n le yik fo lalsã, ad-b sẽn wat ne yãgbo, fo wãadbã la f zɛɛdba loogame.

¹⁸ Wẽneg f neng n gese, ad-f kamba fãa gilli sẽn tigim taab n watẽ, n wat f nengẽ. La m wẽenda, yaa Wẽnd n gomde, m wẽenda, tɩ b na n yɩɩ fo yĩnga wala faong bũmbu sẽn tar neerem, wala sẽbdg b sẽn sogd pʋg-paala.

¹⁹ Ade, fo tẽnga sẽn ka tar zãma la sẽn ya raboogã, fo tẽnga sẽn wã wã ka na n sek a kẽedba, wãadba sã n wa looge.

²⁰ La fo sẽn da tẽed tɩ b menemame wã, bãmb dãmb n na n walem foom: «Zĩiga paooda wʋsgo, yalg-a tɩ d tõog n zĩndi.»

²¹ Fo na n yeela f sũurẽ: «Ãnna n dog woto fãa n kõ-ma, m da yaa pʋg-kiiri, n ka tar kamb ye, ãnna n wub bãmba tɩ b bɩ? B ra basa maam tɩ m zĩ m ye; dɩlla bãmba yita yɛ?»

²² Soaala-Wẽnd yeela woto: «M na n kamsa dũni wã rãmba, m na n dʋʋsa m tãb-kaoore b yĩnga. B na n yondga kom-dibli b futẽ n wa kõ foom, la b na n tʋka kom-pugli wã gʋbla n wa kõ foom.

²³ Dĩm dãmb na n yɩ-la f ba-wubdsi, tɩ dĩm-pogsã yɩ f ma rãmba. B na n wõgemda fo taoore, b na n lelma f nao wã tom. Woto f na bãnge tɩ maam la Soaala-Wẽnde. Sẽn teeg-b maam kõn paam yãnd abada.»

²⁴ Gãndaoogo a bõe n tar a bũmbu tɩ b le reege? Na-toaag a bõe n yõk a bɛyã n le bas tɩ looge?

²⁵ Ade, Soaala-Wẽnd yeta woto: «B na n deega zabr gãndaooga nugẽ a sẽn da yõk a soaba n pag roogo, n deeg nin-toaaga nugẽ, a sẽn da fãag laog ningã! Zerizalɛɛm, ad yaa mam meng n na n zab n sõng-fo, la m fãag f kambã.

²⁶ Sẽn tar-b foom toogã, m na kɩt tɩ b wãb b meng nemdo, m na kɩt tɩ b yũ b zɩɩm n gãeeme wala b yũu rã-paalga, la ninsaalb fãa na n bãngame tɩ maam, Naaba-Wẽnd, la Fãagda, b na bãng tɩ m lʋɩɩsa m toogo, maam, a Zakoob Wẽnd pãng soabã.»