A Ezayi 47 - SEBR SÕNGO

Babilon sikri

¹ Aya! Zĩnd tomẽ, Babilon bi-pugla, b sẽn deeg a soab naama zĩnd tẽnga, Kalde biiga, zãag ne naam goeele n zĩnd tẽnga; f kõn le paam tɩ b bool foom Tɩg-põnegre, bada.

² Kẽ neerẽ n wer f zom, yidg f zoobdo, kool f fuugu, kool-a n ta rũma, rʋʋg kʋɩlga,

³ Sẽk f fuugu, yals f zaala tɩ yãnd yõk fo. M dat n sɩbg-f lame n dok m sũuri, la ned a to kõn gɩdg-m ye.

⁴ Tõnd Fãagda, sẽn boond a soab tɩ dũni fãa Wẽnde, n boond tɩ Israyɛl Nin-Sõngã, n gome.

⁵ Zĩnd-y sɩɩ, pa-y likẽ, Kalde rãmba, b kõn le bool Kalde tɩ dũni wã soaal ye.

⁶ M sũur da puuga ne m neba tɩ m yãk b barka, m da rɩk-b lame n bas fo nugẽ, la fo me wilgame tɩ f yaa ned sẽn ka be sugri. M nin-kẽemba, fo zɩlg-b-la zɩ-bedre.

⁷ Fo ra yetame: m yaa dĩma la m naam kõn zĩnd sɛɛb ye; fo ka zĩnd n tags yɛla neer ye, fo ka zĩnd n bao b sẽn na n baas to-to ye.

⁸ Kelg marsã, nong-m-meng soaba, nonga-noog soaba, fo zĩime tɩ f sũur ka kiuusdẽ ye, tɩ f yetẽ: «Maam, maam bal la neda, sẽn keta yaa zaalem; m kõn tol n yɩ pʋg-kõore, m kamba me kõn loog n bas-m ye.»

⁹ Bãng tɩ yɛl a yiibã fãa na n lʋɩɩ f zugu daar a ye, vugr bala, f kamb na n kiime, f na n lebga pʋg-kõore. F sẽn na maan bɩ f maane, f bagba ne f tɩta rãmb me yik n guri tɩ põasg kõn põs ye.

¹⁰ Fo ra teega f wẽnema n yetẽ: «Ned ka ne-m ye.» Ad yaa f sɩlma la f bãngr-yaalsã ad yaa bãmb n kẽes-f moogo, tɩ f na n yeel f sũurẽ: «M ka tar mak-n-taag ye!»

¹¹ Yel-beedo, f sẽn ka tõe n põse, n na n lʋɩ f zugu, wɩɩbdo, f sẽn ka tõe n gili n na n lʋɩ f zug vugr bala; zɛɛbo n na n zɛ la ka bũmb sẽn tõe n bilg ye.

¹² Pa ne f tɩtã, f tɩt kʋʋma, fo sẽn pʋg b rãmba f yãadmẽ n sɛɛs f pãng zãnga, pa ne bãmba tɩ daare, f na rɩ b yõodo, tɩ daare, f na le wa ne neb yɛɛsgo.

¹³ Fo yɛɛme ne sẽn da sagend-b fooma laa? Bool-b tɩ b wa, n wa fãag-fo, bool f karen-saam-dãmbã, bool sẽn mi-b yĩngr ween-vɩɩs a naasã, bool sẽn karemd-b ãdsa gʋlsem, la b wilgd kiu-paal fãa sẽn wat ne a pʋɩɩr ningã.

¹⁴ B na n yɩɩ wala moodo la bugum n na n zomb-ba, b kõn tõog n fãag b yõore tɩ bugma gũbg-b lame, la ka bugum sẽn zems kolg n wood ye.

¹⁵ Yaa bãngr bɛda rãmb nengẽ la fo sẽn sɛɛs f pãngã; yaa bãmb n dɩt foom al f yãadmẽ la ned kam fãa yeebda a yeebgo, sẽn ya-a fo fãagd ka ye.