A Ezayi 46 - SEBR SÕNGO

A Israyɛl Wẽnda la Wẽnd bala!

¹ A Bel kɩldame, a Nebo wata tẽnga. B rɩka b togsendã n zɩlg b rũmsi, n tʋk zɩɩb zɩtba; wẽn-naanda sẽn zoe n zɩt bãmb yɩɩrã la b kong n dɩk n tʋk rũmsã; sɩd ya bõn-zɩsd menga la rũmsa tʋk n yõrdẽ.

² La ad-a Bel sẽn kɩllde, ad-a Nebo sẽn wat tẽnga. Ka tʋk-b tɩ b yi n kaag moog ye; b ka tõe n fãag sẽn zɩt-b bãmba meng ye, yaa yembdo la bãmb meng dabda.

³ Kelg-y-ma, Zakoob doogo, kelg-y-ma sẽn ket-ba, a Israyɛl zaka! Mam buga yãmba al y ma pʋgẽ, mam gesa y yelle al y yãadmẽ.

⁴ Yãmb na waa n kʋʋle la y na mik tɩ m pa teem ye, yãmb na kʋʋle tɩ m ket n lobd m toogo; yãmb zug na pɛlge tɩ m ket n be y poorẽ. Yaa bũmb sẽn zoe n maane, m zoe n bug-y lame, m na kell n bug yã, m na kell n fãag yã.

⁵ Ãnda la y na yãe n mams maam? Ãnda la y na n yet tɩ m wẽnda a soaba? Ãnda la y na yeele t'a soab tõe n maka ne maam?

⁶ Ges-y neb sẽn sãamd b ligdi b magda b sãnem la b wanzurf n dɩkd n kɩs yõaka t'a na n maan wẽnde, tɩ b sã n dõog-a n sɛ, bɩ b wẽneg n wõgemd a taoore n waoog-a.

⁷ Ad-b sẽn tʋkd-a, ad-a sẽn zɩsgd b bãgdo, ad-b sẽn baood zĩig n na n sik-a n pemse, wala a yɛɛ ne kẽnde la a yaool n pa kẽn ye. Zĩ-kãnga a kõn le serg ye, la b sã n pʋʋsd-a, a sĩndame, la yell sã n pak-a, a ka fãagd a meng ye.

Fãagra raar ka le zãr ye

⁸ Tẽeg-y dẽnna tɩ yãnd yõk yã, yel-maandba, teem-y zʋgo.

⁹ Maan-y tẽegre ne yɛl niyns fãa sẽn looge, maam la a ka be taar soaba Wẽnde, Maam la Wẽnd sẽn ka tar mak-n-taaga.

¹⁰ Al sɩngrẽ m wilga sẽn na n yaool n wa, m togsame tɩ nan ka ta ye, m gomame la m sẽn yeelã n yalse, m sẽn dat fãa pidsame.

¹¹ M boola m sɩl-bedr, yaanga, m boola ned al zĩig sẽn zãre, la yẽ soab n na n pids m daabã. M boond-a-la al zĩig sẽn zãre, a na n wẽneg n waame, m sẽn tʋlge wẽnegd n pidsame.

¹² Kelg-y maam, kõn-teem-zʋg rãmba, yãmb fãa sẽn ket n zãr ne y bɛɛba lubri!

¹³ M fãagra kolgame, a kõn le kaoos ye, a ka le zãr ye. A Siõ na n paama fãagre, a Israyɛl na yãenda m ziiri.