A Ezayi 44 - SEBR SÕNGO

¹ M tʋʋm-tʋmda, Zakoob, kelg neer marsã: Israyɛl, m sẽn tũus a soaba, yoog f tʋba.

² Yaa woto la sẽn naana fooma, sẽn yaga foom f ma pʋgẽ wã, sẽn sõngda fooma, gomd ne foom: Da maan dabeem ye, Zakoob, m tʋʋmd-tʋmda, da maan dabeem ye, Israyɛl m sẽn maneg a soab yelle.

³ M na n daaga koom n yiis ko-yũudu, ko-yũud sẽn kʋɩɩs koɛɛg ninga na n le paam n bʋkame; m na sika m Vʋʋsem f buuda zugu, m na sika m barka f yagensã zutu.

⁴ B na tãoome wala moog sẽn yi koom sʋka, wala kankanga sẽn sel kʋɩlg noore.

⁵ Nin-yend na n yeelame: «Maam la Naaba-Wẽnd soolem,» la a to na n yeelame tɩ b bool-a t'a Zakoob; a to na n gʋlsa a nugẽ: «Naaba-Wẽnd n so maam,» la a kot tɩ b bool-a t'a Israyɛl tɩ rẽ la a zu-zẽkre.

Soaala bal la Wẽnde

⁶ Yaa woto la Soaala, a Israyɛl dĩma, gomda, yaa woto la dũni fãa Wẽnde a Israyɛl Fãagda, gomda: «Maam la sɩngre la baasgo; sã n ka maam bala Wẽnd a to ka ye.

⁷ Ãnda n ya wa maam? A soab yiki la a gome, a wilgi m taoore, a bʋʋma sẽn yɛs zĩig ninga? Ãnna n wilg al sɩngrẽ yɛla sẽn da na n yaool n wa wã? B puk sẽn be beoogo n wilg-du.

⁸ Da zoe-y dabeem, da bas-y raood ye. Ka al daar sẽn zãre la m togs-y la m wilg-y rẽnna fãa? Yãmb la m kaset dãmba. Wẽnd a to beeme sã n ka maam? Ad-y teegd a to ka ye, m ka ne pĩig a to ye!»

Sẽn peesd bɩ sẽn dõogd-b wẽn-naandse

⁹ Bãng-y tɩ neb niyns tʋʋmde sẽn ya nin-naands peesgo, bãmb la tʋʋm yaals rãmba la yaoolg rãmba; sẽn peesd-ba miime, tɩ b sẽn pees b rãmba ka ne ye, b ka tar yam ye, la rẽ lɛɛg n wata ne bãmb meng yãnde.

¹⁰ Pees bɩ rõog wẽnde, sẽn ka be yõodo yaa yalemdo.

¹¹ Neb niyns me sẽn sõngd-bã, bãmb me na n paama yãnde. Sẽn peesd-ba yaa ninsaalb bala. B naag taab n wa sak bʋʋdo, b na rig rabeem la b na paam yãnde.

¹² Sẽyã ningda saala tɩ kuta sã n mooge bɩ a pãb ne zãare. A namsda a menga, kom tar-a lame, ko-yũud tar-a lame, la yaams kẽed-a lame.

¹³ Da-pɛɛsa sɩngda magbo, n karg ne bug-zẽongo a sẽn dat tɩ naanda yɩ a soaba, n yaool n dɩk a pɛsga n tũ sõogrã n pees raoogã, n kõ-a ninsaal yagdo la ninsaal nenga, n wa tol n kẽes-a a waoogr doogẽ.

¹⁴ A ra tɩ kɛɛga kʋka, bɩ pusga, bɩ sãbga, bɩ raoog a to, la rẽ wã, a ra kẽe tʋgr pʋgẽ n bao. Dag n tõe n yɩɩ tɩɩs menga a sẽn sele ne a raab a to, n zãgs koom.

¹⁵ Sã n ya ne ninsaala, raoog fãa tar n widgda bugum. B mi n yãkame n tugl bugum n woode bɩ n segl dɩɩbo. Pɛɛsa nengẽ raoog lebgda Wẽnde, t'a wõg a taoore, a lebgda wẽn-naande t'a kẽnd n yĩgimd a taoore.

¹⁶ Pɛɛsa yãkda daada pʋɩ-sʋka n ning bugum, n sẽed a nemdo, n wãbd n tɩgda. A tõeeme bala n woot bugma la a yetẽ: «M woota bugum, m geta bugma sẽn wit ne sũ-noogo.»

¹⁷ A rɩkda raooga sẽn kellã n pees a wẽnde, n pees a nin-naande, n tat a taoore n sulgdẽ la a wõgemdẽ, la a pʋʋsdẽ, n yetẽ: «Fãag maam tɩ foom la m wẽnde.»

¹⁸ Pɛɛsdba ka tar yam ye, b ka tagsd ye, b ka ne ye, b ka tar b tʋʋmda võor ye.

¹⁹ Ned ba a ye ka tagsd ye, ned ba a ye ka tagsd tɩrg ye, ned ba a ye ka leokd a menga: «M dɩka pʋɩ-sʋka n ning bugum, n dʋg m miisgu, n sẽ m nemdo n wãbe la sẽn kellã n dɩkame n maan wɩɩbdo, m yita a wãna n sulg m meng da-giig taoore?»

²⁰ Yaa tompɛglem marsã la ra-pɛɛsa pʋgda, a belgda a menga n kẽed moogo. A kõn fãag a yõor ye; a ka na n tõog n yeel bada: «M sẽn gãd a soab ne m nugã, sãnd ka belgre bala?»

Da yĩm tɩ f yaa m sõgen ye

²¹ Tẽeg woto, Zakoob, tẽege Israyɛl, fo ya m sõgne, m naan-f lame tɩ f yɩ m sõgne, dɩlla da maan m sẽn pa tẽed ne f ye.

²² M yẽesa f beegra, n yẽes f yel-wẽna wa sobg sẽn loogd ne sawadgo. Lebg n wa mam nengẽ tɩ m yaoome n deeg-fo.

²³ Yĩngr dãmba kaas-y sũ-noogo tɩ Soaala-Wẽnd tʋmame. Tẽnga bog zulungẽ dãmba, lang-y sũ-noogo; tãmse, kelem-y y zu-noogo; tʋgre ne f tɩɩsã fãa, fo me lange? Soaala-Wẽnd n fãag a Zakoob, b wilga b ziirã a Israyɛl.

Sẽn naana dũni wã n so dũni ne a yɛla

²⁴ Woto la Soaala-Wẽnd yeel yã, Wẽnd ninga sẽn naana foom f ma pʋgẽ, n gomde: «Yaa maam, Naaba-Wẽnde, n naan fãa gilli. Mam m ye n yɛdg saaga, maam m ye tãa, maam n kɩt tɩ tẽnga sĩdi la m pa yãe sõaangd ye.

²⁵ Maam n kɩt tɩ bag rãmb bagre yaa zaalem. M lebsda sɩlem dãmba poorẽ, m kɩtame tɩ b bãngra lebg zɩtem.

²⁶ Maam n kõt m tʋʋmd-tʋmdba goama pãnga, mam n kɩt tɩ b sẽn yeela taasdẽ. Maam n yeel tɩ Zerizalɛɛm na paam kẽedba, n yeel tɩ Zɩɩda tẽnsã sẽn wã na le me, la m sɩd na n le yika a lalsã.

²⁷ Maam n yet tɩ mogrã fẽbge; maam n kɩtd tɩ kʋɩlsa koom yõbgdẽ.

²⁸ M yeta a Sirus poorẽ: ‹Yaa m pe-kɩɩma. Sẽn ta m daab fãa, a na pids-a.› M na n leoka Zerizalɛɛm poorẽ: ‹B le maneg-a n me.› n leok wẽnd dooga poorẽ: ‹Le maneg-y n me-a.› »