A Ezayi 41 - SEBR SÕNGO

Wẽnd sẽn kɩt tɩ ned ninga rɩk sore

¹ Tẽn-zãorgẽ dãmba, bas-y bʋʋr m taoore, Soaala-Wẽnd n gomde, dũni rãmba, keng-y y pɛlse la y wa tɩ m boond-y-la bʋʋdo. Y na waa n leok-ma. D kolg taaba, yãmb ne y wẽn-naandsã. tɩ bʋʋda sɩnge.

² M yet yaa maam n yiis yaang raoã rao ninga sẽn lubd a bɛɛbã la a tabd-b ne a naoore. A kɩtdame tɩ bu-zẽmba basd raood a taoore, a naoor tabda rĩm dãmba, a sʋʋg kɛɛd-b-la zeremse, a tãp sẽegd-b-la wa sobgo wa sobg sẽn sẽegd mo-pagdo.

³ Ade, a rigda a bɛɛba a pɩʋʋgda a bɛɛba sʋka tɩ rabeem kaẽ ye, a pa sigd a weefã, a nao pa sɩɩsd tẽng ye.

⁴ La yaa ãnda n tagse la a wa ne yɛl niyns d sẽn gomdã? Ad-y yaa ned ninga sẽn deng n gomd bũmb yelle tɩ b nan ket al yɩɩg-yɩɩgã. Ad-y yaa maam, Naaba-Wẽnde. Maam n be bũmba fãa sɩngrẽ. Yaa maam a Wẽnde n so Kãsengo, pipi zamaana rãmb sʋka, n na n le soog Kãsengo ne yaoolem dãmba.

⁵ Tẽns sẽn puk koomẽ dãmb yãenda rẽnna, tɩ rabeem tar-ba, tẽnga yaang rãmb kolgame n digda.

⁶ Ned sõngda a tũud-n-taaga, tʋʋmd zugu, n yet t'a ning pãnga!

⁷ Sẽn yẽnegda kutã kõta yõaka raoodo, sẽn toosda ne zãar sõngda sẽn kut a soabã, a yeta sẽn bolgd a soaba: ning pãnga, yaa sõmbo la a baooda kaadse n ka nin-naandã t'a tõog n yals a nao zugu.

Da le zoe rabeem ye

⁸ Foo, Israyɛl, m biiga, foom Zakoob, m sẽn tũus a soaba, m zoa a Abraam buudu,

⁹ m tɩ yiis-f-la tẽnga yaanga, m tɩ bool-f-la tẽnga sɛtmẽ. M yeel-f lame: «Foom la m Tʋʋmd-tʋmda. M yõga zood ne foom la zoodã pa sãam ye.»

¹⁰ Da maan dabeem ye, m bee ne foom. Bas yɩɩre, tɩ m yaa f Wẽnde. M bɩɩsda f pãnga la m sõngd-f lame, m teend-f-la ne m dɩtg nugu, ne m raood nugu.

¹¹ N-ye! Yãnd na yõk sẽn da yik-ba n na tak zabre ne foom. B na n kiime n menem zãnga sẽn baood-b zabr ne foom.

¹² Fo na n baoo f zabd-n-taasã la f pa na n yãend-b ye; f zabd-n-taasã na n kiime n menem zãnga, bũmb kõn kell ye.

¹³ Yaa maam la Naaba-Wẽnde. M gãd-f-la ne m dɩtgo, m yet-f lame: «Bas rabeem, m wata f sõngre!»

M wata f sõngre

¹⁴ Da zoe rabeem ye, Zakoob, zũnzũur sẽn ka tõe n fãag a menga, da zoe rabeem ye, Israyɛl, bɛdẽng, ka pãng soaba! M wata f sõngre! Maam Naaba-Wẽnde n gomde, a Israyɛl Nin-sõngo la f Fãagda.

¹⁵ Ade, m yals-f lame wa bũmb sẽn na n wes tãndaga; m ning-f-la kud-paala la sẽn tar pãnga, f tʋʋmd na n yɩɩ tãmsa werbo la b wesbo wesda kunkunba tɩ b wa lebg bõonese n wa lebg faase wa ka-fɩɩba,

¹⁶ tɩ b yelg tɩ sobg sẽeg-ba, tɩ sɩlmand tall n looge, la foom, fo na kɩdem sũ-noogo, Wẽnnaam maasmẽ, a Israyɛl Nin-sõnga maasmẽ.

Zĩ-peen-daag lebga kʋɩls zĩiga

¹⁷ Nimbãan-dãmba la naong rãmba baooda koom, la fɩ! Ko-yũud kʋɩɩsa b zelemde, la maam, Naaba-Wẽnde, na n deega b kosgo. Maam, a Israyɛl Wẽnnaama, m kõn bas-f ye.

¹⁸ Tãms sẽn ka yit mood b zutu, m na kɩt tɩ kʋɩls tãoos koom, m na kɩt tɩ tãmsa sigdsa pusg koom, m na kit tɩ zĩ-peen-daag lebg bãoogo, m na kɩt tɩ tẽn-koɛɛng bul ko-vɩɩse.

¹⁹ M na n sela kʋk zĩ-peen-daagẽ, n sel dõaaga, n sel lɛɛlga, n sel taanga. M na n sela sãbga, sãbtulga, kagdga tɩɩsa buud toɛ-toɛ, n yegl taaba.

²⁰ Woto b na yãe la b bãnge, b na tags la b wʋme, tɩ Soaala-Wẽnd n maan rẽ fãa, tɩ Israyɛl Nin-sõngã n yiis b fãa.

Bu-zẽmba wẽnd dãmba ka tõe fɩ

²¹ La yãmba, bõn-naandse, bu-zẽmba sẽn boond tɩ b wẽndã wa-y tɩ m bool-y-la bʋʋdo, wa-y n gom tɩ m kelge, Soaala, a Zakoob dĩma, n gomde.

²² Kolg-y n wilg-y-do, n wilg sẽn yɩ pĩnda, n wilg-d tɩ d le tẽege. Ka rẽ bɩ y gom beoog yelle tɩ d bãng sẽn na n yɩ-la.

²³ N-ye! Wilg-y bũmb ning sẽn na n wa tɩ woto d na bãnge tɩ y sɩd yaa wẽnd dãmba. Maan-y bũmb bilfu, yĩngr bɩ tẽnga n yik d pɛlenga, tɩ d kilsi.

²⁴ Yãmb yaa zaalem, y tʋʋma me yaa zaalem, yãmb pʋgb yaa wɩɩbdo.

²⁵ Nug goabg sẽnẽ, al yɩɩga m kɩtame tɩ ned yi n dɩk sore, la ad-a sẽn wate. Al yɩɩga, wĩndga sẽn pukd zĩig ningã, b gomda a yelle, b pʋta a yʋʋre. A tabda kombɛɛmba wa tãndo, wala yagd sẽn nomd a yagdo.

²⁶ Ãnda n deng n wilg yell kãnga tɩ d wʋm-a tɩ ket n zãra? Ãnda n yɩ pipi n gome tɩ d yet t'a togsa sɩda? M miime tɩ ka yãmb nin-yend ye, sẽn tõee rẽ ka be y sʋk ye. Y ned ba a ye ka yaag a noor ye.

²⁷ Maam n yɩ pipi n taas yella Siõ. Maam n deng n tʋm Zerizalɛɛm kibar nooga soaba.

²⁸ M gẽesa wẽnd bãmba sʋka la m pa yãend ye, sagend ka ye, m sẽn tõe n sok a soaba n paam leodre ka ye.

²⁹ B naaga taab n ya zaalem, b tʋʋma yaa zaalem. Bõn-naandsã: sobgo la viʋ-raoogo!