A Ezayi 40 - SEBR SÕNGO

A IZAYI SEBRA BOGR A YIIB SOABA Paas-y m neba raoodo

¹ Yaa yãmb Wẽnda koɛɛga: «Maas-y m neba sũuri, la yɩ tao-tao!

² Gãneg-y Zerizalɛɛm dãmb yam, Yeel-y-b tɩ b yembda sɛɛme, tɩ b yel-wẽna paama sugri, tɩ b paama sɩbgr m nengẽ, n yao b samda naoor a yiibu.»

³ Koɛɛg n moonde: «Ges-y we-raoogẽ wã n segle, n segl sor Soaala-Wẽnd yĩnga. Kõog-y so tɩrg zĩ-peen-daagẽ kõog-y so tɩrg n kõ d Wẽnde.

⁴ Long buud fãa yẽde, tãng la kunkubr fãa sarme, sẽn zẽk fãa lebg bõn-langa, kunkuba lebg tẽn-nabre.

⁵ Yaa wakat kãng marsã la Naaba-Wẽnd na n wilg b ziiri la ninsaalb buud fãa na bãnge, tɩ Soaala-Wẽnd noor n gome.»

⁶ Koɛɛg n yete: «Moone!» Tɩ m leoke: «M moon bõe?» T'a yeele: «Moon woto: moon tɩ ninsaal ne moog zem taaba, moon tɩ ninsaal keglem ne puug zem taaba.

⁷ Moog kʋɩtame, puug zelgdame, Wẽnd pemsma sã n bui-b ne pãnga. N-ye, ninsaal keglem, moog rẽnna!

⁸ Moog kʋɩtame, puug zelgdame, tõnd Wẽnda kãabg bala n yɛs wakat buud fãa.»

Kiba noogo, a Siõ yĩnga

⁹ Zerizalɛɛm dãmba, neb sẽn zao tãn-lug-lugi Siõ rãmba, zẽk-y y koɛɛga. Yaa kiba-noog la y wat n na n togse, bɩ y ra zoe rabeem la y moon tɩ b wʋm-a. Yeel-y Zɩɩda tẽnse: «Baad-y y Wẽnde.

¹⁰ Ad Soaala-Wẽnde, b wata ne pãnga, Bũmb pa tõe tɩ b pa rɩ naam ye, b sẽn zab n paama yãagd-b lame, n watẽ b sẽn nams n paama lʋɩta b taoore.

¹¹ B wẽnda pe-kɩɩma, sẽn kɩɩmd a piisi, n zẽkd a kang bala tɩ b wẽneg n tigim taaba; a põkda pe-bi wã a yãoogẽ, a lekda pe-yãansã sẽn yẽsemd kamba, tɩ b kẽ maasmẽ.»

Wẽnd yama zulum

¹² Ãnda n mak mogrã koom a nug koorẽ? Ãnd n yaag a nus-bi n mak saaga yalem? Ãnda n mag tẽnga tom ne peoogo? Ãnda n mag tãmsã la tãm-bi wã zɩslem?

¹³ Ãnna n mag Soaala yama zulum? Sagend a bõe n zĩnd b sɛɛgẽ n walem-ba? Ãnda la b yɛdg n wilg b sẽn dat n maane?

¹⁴ B zĩnda ne ãnda n yẽse? Ãnna la b zãms t'a bãnge sẽn tog n maane? T'a bãng sẽn tog n bãnge? N bãng tʋʋmda sẽn tʋmd ne bũmb ninga? Ãnna zãms b sɩlem?

¹⁵ Soaala-Wẽnd nifẽ bu-zẽmba ka zem ko-beelle sẽn yi sĩn-bil noorẽ n lʋɩ ye. B zɩslma pa yɩɩd bĩisri beell zɩslem ye. Ad-y Soaala-Wẽnnaam nusẽ tẽn-zãorgẽ dãmba pa yɩɩd tom bilfr bal ne zɩslem ye.

¹⁶ Libã googa rũms ka sekd maoong sẽn tog ne bãmb ziira ye, Libã googa tɩɩs ka sekd maoonga bugum raad ye.

¹⁷ Ninsaalba sẽn naag taaba ket n yaa zaalem bãmb yĩnga, yaa zaalem a nare.

Wẽnd ka tar mak-n-taag ye

¹⁸ Ãnda la y na gese n yeele: woto la Wẽnd wẽnego! Bõe la y na n dɩk m mams ne Wẽnde;

¹⁹ Y na mak-b ne wẽn-naande? Wẽn-naanda yaa yõak n dõoge, tɩ tʋʋm-mit bao sãnem n bole, n bao wanzurf yãndo n ning ka la ka.

²⁰ F pãng sã n ka sek f na rɩk wanzurfu f baooda raoogo, yõgdre sẽn na n wẽneg n kẽ, n bao ra-pɛɛs sẽn mi a tʋʋmde n tõe n pees wẽn-naanda togsende, n tõe n yals-a a nao zutu.

²¹ Y ka mi tɩ ka rẽ la Wẽnd sɩda, y pa wʋm tɩ b gomd b yell sɩda, b ka togs yãmb al sɩngrẽ sɩda? Y ka mi tẽnga sẽn naan to-to sɩda?

²² Soaala-Wẽnd vigla b naama goeel yĩngri; b sã n be be n get tẽng zug rãmba, b yaa wa gũuri. B yɛdga saaga wa peende, peen-kãsenga, b yɛdg-a-la wala peende, wa peend sẽn tar n tiid roto, b ti-a-la wala bãmb me roogo.

²³ Tẽnga soaalba lebga zaalem, tẽnga bʋ-kaoodba lebga zaalem.

²⁴ B pa yãet n paam zĩiga, b pa yãet n zĩnd b zĩigẽ, b pa yãet n kɩ yẽgna la Soaala-Wẽnd sobga sẽn pɩɩsd-b la a kʋɩɩsd-b la a loogd ne b wa mo-pagdo.

²⁵ Ãnda la y na n gese n yeele: Wẽnd wẽneg la woto? Sõmblem Wẽndã n sokd woto: «Maam ne ãnda n zem taaba?»

²⁶ Zẽk-y neng yĩngri la y gese, ãnda n naan ãdsã la sẽn be yĩngrã? Sã n ka Wẽnd ninga sẽn yalsa ned kam fãa a zĩigẽ, n yals-b b zĩigẽ wala tãb-biisi, la b boond ned kam fãa ne a yʋʋre, tɩ ned ba a ye ka be n kɩɩsdẽ ye.

Wẽnd na n waa ne pãng paalga

²⁷ Yaa bõe Zakoob? Yaa bõe Israyɛl, tɩ fo yet tɩ Soaala-Wẽnd ka mi m sẽn na yɩ a soaba? Tɩ b ka ne m sẽn tog ne a soaba?

²⁸ Fo ka mi? Fo ka zãmse, fo ka wʋm tɩ b gomda? Soaala-Wẽnd yaa zamaan buud fãa Wẽnde. Bãmb n naan tẽngã ne a yalma fãa, b ka namse, b pa yãe yaams ye, la ned ka tõe n mage n bãng b yama sẽn ta zĩig ning ye.

²⁹ Yaamsa sẽn kẽ a soaba, b kõta pãnga, pãn-kaoolg soaba, b kõta sõngre.

³⁰ Kom-bɩɩb yaandame, b yam yita ne b menga, b mi n wa pãsd n lʋɩtame.

³¹ Sẽn teeg-b Soaala-Wẽnde, bãmb kõt-b-la pãn-paalle, b paamda pɩgs wala sɩlga, b zoetame n ka mi yaams ye, b kẽnda taoore la b pãng pa woogd ye.