A Ezayi 36 - SEBR SÕNGO

Asiri dĩma data zabr ne Zerizalɛɛm

¹ A Ezekiyas sẽn wa n dɩt a yʋʋm piig la a naas naam, Asʋr dĩma, a Senakerib, taka zabre ne Zɩɩda tãnsoben-tẽnse la a tõog-b lame.

² Asʋr dĩma zĩnda Lakis n tʋm Zerizalɛɛm, a Ezekiyas nengẽ, a meng sõgne ne tãb-biis wʋsgo. Sõgna kolga pipi ko-baoora ko-sorã, fu-pɛgdba pʋʋga sor zugu.

³ Neb n yi n tɩ seg-a. Yɩ-la a Ilkiya biiga, a Eliyakim, yẽ n get dĩma zak yelle, n paas a Sebna, yẽ la sɛba gʋlsda, la a Azaf biig a Zoa, yẽ n deegd koeesã n togsdẽ.

⁴ Asʋr tãnsoaba sõgna yeel-b lame: «Kẽng-y n taas a Ezekiyas Asʋr dĩm kãsenga, koɛɛg kãnga. ‹Ãnda soaba la f sẽn dɩk f yɛla fãa n bas a soab nugẽ wã?

⁵ Fo tẽedame tɩ zabre zabda ne wakre goama bala tɩ zĩnd n yẽs ka lʋɩ taoore, tɩ raood ka be sũurẽ? Fo teega bõe n na n yik n zẽk f zugu ne maam.

⁶ M mi tɩ f teega Ezipt la! La Ezipt ka rudum kãoonga laa? A tɛka yaa kõs n sãag nug ninga sẽn palga yẽ wã, la neb niyns fãa sẽn teega yẽ wã.›

⁷ Daare f na n yeel-m lame: ‹Yaa Naaba-Wẽnde la f teeg yã! M sok n gese, ka bãmb waoogr zĩisi la f sẽn wã wã laa? Ka foo n kõ noor Zɩɩda ne Zerizalɛɛm dãmba tɩ b ra le waoog Wẽnd zĩig a to sã n ka Zerizalɛɛm maan-kugra taoor bal laa?›

⁸ Dɩlla, yẽs ne Asʋr dĩma, m zu-soaba, la a sã n sake, m na kõ-f wiidi tus a yi f sã n tõe n paam wed-dʋʋdb sẽn na n zomb-ba.

⁹ La rẽ sẽn ka wã, fo yɩta a wãn tɩ tõnd zu-soaba tãnsoab-bila a ye meng tar n leb poorẽ? Ka Ezipt la fo teeg n na n paam bilim-bilm la wiidi bɩ?

¹⁰ La bũmb a to me la m na n soke: yãmb tẽedame tɩ mam dĩma kẽe yãmb tẽnga n na n wã-a tɩ Naaba-Wẽnd zɩ tiiri la b ka sak bɩ? Yaa Naaba-Wẽnd n yeel-ma: tak zabre ne tẽn-kãnga n wã-a!»

¹¹ Dẽ la a Eliyakim, a Sebna la a Zoa yeel a Rabsas, tãnsoaba sõangda: «D kotame tɩ f gom ne-do ne Aram dãmb goama tɩ d wʋmdame la f ra gomd ne-do ne tõnd buuda goama tɩ neba sẽn zao lal-gũbrã wʋmdame.»

¹² La a Rabsas leokame: «Yaa ne yãmba bɩ ne y zu-soaba la m wa ne koɛɛga laa? M yet yaa sẽn zao-b lalga zugu la b tʋm-m tɩ m wa togse? M yet tɩ yaa tãb-biisã sẽn kong n naag yãmba n dɩt b bĩndu la b yũud b rʋʋdma?»

¹³ Sõgna yika yĩngri, a pora ne Zɩɩda rãmba goama: «Kelg-y dĩm kãsenga koɛɛga, Asʋr dĩma koɛɛga.

¹⁴ Asʋr dĩma tɩ m togs y woto: ‹Da bas-y t'a Ezekiyas belg-y ye. A ka na n tõog n fãag-y ye.

¹⁵ Da bas-y t'a Ezekiyas belg yã n yeel-y tɩ y teeg Wẽnd bala, tɩ b na fãag yã, la tẽnga kõn lebg Asʋr soolem ye.

¹⁶ Da kelg yã a Ezekiyas ye, tɩ Asʋr dĩma yet-y-la woto: Maan-y zood ne maam. Bas-y tɩ m soog yã tɩ woto ned kam fãa na rɩ a bugsuntung la a kankang biisi, la a yũ a bulg koom,

¹⁷ n gũudẽ tɩ m wa tall-y n kẽng tẽng sẽn wẽnd yãmb dẽnna, tẽng sẽn sakd alkam, n tar koodo, n tar bugsuntund la rãam.

¹⁸ Da bas-y t'a Ezekiyas belg yã n yetẽ: Naaba-Wẽnd na fãag-do. M sok n gese buud a taaba wẽnd dãmba tõogame n fãag b meng tẽng Asiri dĩma nugẽ bɩ?

¹⁹ Amat la Arpad wẽnd dãmba bɛɛ? Sefarwayim wẽnd dãmba bɛɛ? B tõog n fãaga Samari mam nugẽ bɩ? Samari wẽnd dãmba bɛɛ? B deega a Samari mam nugẽ bi?

²⁰ Tẽnsa fãa sʋka, tẽn bʋg wẽnd dãmba n tõog n fãag a tẽng mam nugẽ, tɩ yãmb Wẽnd na n fãag Zerizalɛɛm m nugẽ?› »

²¹ B fãa yɛsa sɩɩ n pa tol n leok-a ye, tɩ dĩm a Ezekiyas ra kõ-b-la noore tɩ b ra leok-a tɩ bũmb ye.

²² Sõgen kãsenga a Ilkiya biiga, a Eliyakim, n paas sɛb gʋlsda, a Sebna, la a Azaf biiga, a Zoa, dĩma no-rɛɛsa, taka b fut n kẽese la b lɛɛg n waa a Ezekiyas nengẽ la b wilg-a-la Asʋr daoa sẽn togse.