A Ezayi 34 - SEBR SÕNGO

Edom bʋʋd kaoobo

¹ Kolg-y-yã, bu-zẽmba, kolg-y, yoog-y y tʋba; tẽnga ne sẽn be-b a pʋgẽ wã, fãa yoog b tʋba n kelge!

² Soaala-Wẽnd sũur puuga ne yãmb fãa, b sũur fõta ne bu-zẽmba fãa, tɩ b kãab tɩ b na wã-ba, la b na kood b fãa.

³ Sẽn kood b rãmba, b lobd-b-la sor zugu tɩ yũuga reeg zĩig n yãmbe. Ges-y zɩɩm sẽn zoet n sigd tãmsã!

⁴ Yĩngr teeda fãa na n lebga zũnd-zãnde, saaga na n paga wa sebre b sẽn dat n bĩngi, ãdsa ne b bugma na n sʋʋga zãnga, wala bugsuntung vãad sẽn dʋʋgde bɩ wala kankang vãado.

⁵ Soaala n gomd woto: yĩngri, m sʋʋga tɩga zɩɩm la a tɩga zɩɩm wa ned sẽn tɩg rãam. Ad-a sẽn lʋɩt a Edom zugu, Edom ninga m sẽn kãab sɩbgrã.

⁶ Soaala-Wẽnd sʋʋga lebga zɩɩm, n mad ne kaam, zɩɩma yaa pe-bi la boees dẽnna, kaama yaa pe-raada yɩɩma rẽnna. Maoongo la Naaba-Wẽnd kʋʋd Bosra, koodgo la Soaala-Wẽnd koot Edom.

⁷ Ka yikayã la b na n gãneg ye, yaa ninsaalba, ka niis la b na n kood ye, yaa kom-koeemsã; b na n yɩɩ sʋʋg rɩɩbo, b tẽnga na n tɩga zɩɩm, a toma na n gĩsa ne kaam.

⁸ Yaa Soaala-Wẽnd sũur dokre daare, yaa Siõ gũuda daood yʋʋmde.

⁹ B kʋɩlsã lebga ka-sablgo, tɩ tẽnga tom ya kidbri, tẽnga tõre na n lebga bugum,

¹⁰ yʋng la wĩntoog bugma kõn ki ye, a bug-zõosa dʋʋda yĩngri, wakat buud fãa; tẽnga na n lebga zĩ-peen-daaga, tɩ zamaan pʋg taaba; ned ba ye kõn le tũ be meng ye.

¹¹ Tẽnga na n lebga bakardo la yʋgenpɛl na-tẽnga, viuug la gãoobgo na n kẽe be. Soaala-Wẽnd na n kɩtame t'a lebg ween-vɩʋʋgo, Soaala-Wẽnd na n sarem-a-la zãnga.

¹² Wãams na n ti-la b rot be, na-koms kõn le zĩnd ye, naam kõn le deeg be ye, na-biisa fãa na n kiime.

¹³ Gõos na n yii do-neeba pʋsẽ, sɩlg-nao-yẽese la pulgumdi na n yii be, na n yɩɩ we-baas zaka, na n yɩɩ na-neend vagse.

¹⁴ We-yũus ne kata na n kõo taab sɛk be, wãams na n boola taab be. Be la bõn-nind a Lilit na n wũundi be la yʋng naab a Lilit na n paam n vʋʋse.

¹⁵ Põeere na n paama a roog be n lob a gɛla, n wũnug-ba, n wek-ba. Yɩbrend na n tigma taab be, ned kam fãa ne a tũud-n-taaga.

¹⁶ Lak-y Soaala sebre n karem sẽn gʋlse: B nin-yend meng kõn pa poorẽ ye, ba a ye sũur kõn kiuus a tũud-n-taag poorẽ ye, tɩ yaa Soaala-Wẽnd meng noor n yet tɩ b maan boto; yaa bãmb n tʋlg tɩ b tigim taaba.

¹⁷ Soaala-Wẽnd tũusa pʋɩɩre ned kam fãa yĩnga, b magame n pʋɩ tẽnga zãnga, b neba n na n soog-a la b zĩnd a pʋgẽ zamaan sẽn wate.