A Ezayi 33 - SEBR SÕNGO

Yell be sãamda zugu

¹ Yell ne foom, wãab naab sẽn põs wãabo, zãmb soab sẽn põs zãmbo! Fo sã n wã n sɛ, wakat kãng la b na n wã foom me, fo sã n zãmb n sɛ, wakat kãng bal la b na zãmb foom me.

² Soaala-Wẽnde! Zoe-y tõnd nimbãanega. Tõnd da teega yãmba, yɩɩ-y tõnd pãng beoog sẽn vẽege, yɩɩ-y d fãagre, d sũ-sãanga pʋgẽ.

³ Yãmb tãsame tɩ ninsaalb kʋɩ tĩiga, yãmb yik n yalsa yĩngri tɩ b lob naoore.

⁴ B na n wʋka teedã sẽn bar n lʋɩ wã wala b sẽn wʋkd sʋya la wa sʋʋr sẽn zɛɛd koodo, woto me la b maan ne zɛɛdã.

⁵ Soaala-Wẽnd paam pẽgre, bãmb sẽn zao b yĩngri zaoorã, n pidsd a Siõ ne zemsgo la sõmblem!

⁶ La sã n ya yãmba, Soaala-Wẽnd buudu, Wẽnd na kaoos-y ne laafi! Paam yam vẽenem, paam n bãng Wẽnde, dẽ n wat ne fãagr-yõodo. Bãng Soaala-Wẽnd waoogre, dẽ n na n yɩ f fãa-fãa!

Naaba-Wẽnd sõngre

⁷ Ges-y-yã a Ariyɛl neba sẽn yãbd soya zutu, b sẽn tʋm b rãmba ne laafi koɛɛga lɛɛg n watame la b yãbd yãb toogo.

⁸ Soya lebga vɩɩdo, ned ba a ye ka le lood be ye. Na-toaaga sãama zoodã, a riga zooda yõgb kaset rãmba; a sẽn mi yaa neba sãbsg bala.

⁹ Tẽnga yãbda kʋʋre n faagdẽ, yãnd tara Libã t'a lʋɩtẽ. Sarõ lebga dasempʋɩɩga, Bazã, ne Karmɛl lebga wa zɛɛga.

¹⁰ M yikdame marsã, m yikda yĩngri, Soaala-Wẽnd n gomde.

¹¹ Yãmb dɩka mood pʋga, la y na n doga mo-kila, la wala bugum, m noor pemsem na n dɩ-y lame.

¹² Bu-zẽmbã, ad-y b na n yõog-b-la bugum, b na n dɩɩ bugum wa gõos sẽn kʋʋs n same.

¹³ Sẽn be-b al yɩɩga, kelg-y m sẽn maane! Sẽn pẽ-ba, ges-y m pãnga sẽn tõe bũmb ninga!

¹⁴ Yel-wẽn-maandba zĩi ne yɩɩre, Siõ, sẽn ka zoet-b Wẽnd nifã, digdame. Ãnna n tõe n yals bug-vɩɩga a woto taoore, ãnna n tõe n yals bug-walem a woto taoore, bug-walem a woto sẽn ka boogd taoore?

¹⁵ Yaa sẽn mi a zemsgo, sẽn togsda sɩda, sẽn ka nonga wagdem, sẽn vẽsda a nugu n pa rat n bas tɩ b kõ-a ligdi tɩ bʋʋda tũ rẽ n golme, sẽn ka kelgda zɩɩm na raag goama, sẽn ka rata wẽng gesgo n mumd a nini.

¹⁶ Yẽ soab zak bee yĩngri, a soab kẽe yir sẽn kõn wã, la sẽn me pĩig zugu.

Zerizalɛɛm fãagame

¹⁷ F nin na n yãee dĩm sẽn yɛs ne rasãndlem, f na n yãee tẽng ne yalem.

¹⁸ F na n tẽega bũmb ning sẽn da yɛɛsd fooma: «Sẽn da saada n sogsdẽ wã bɛɛ? Sẽn da saada n sõt fadga ligd bɛɛ? Sẽn da saada n get lal-gũbra manegra bɛɛ?»

¹⁹ F kõn le yãend buud sẽn pid ne tɩtaam ye, sẽn gomd-b goama tɩ b pa tõe n wʋma ye, sẽn gomd gom-zẽnd sẽn ka tar võor ye.

²⁰ Ges Siõ, d kibs bɛda tẽnga, ges Zerizalɛɛm, laafi tẽnga; a yaa wala roog sẽn ti ne pɛɛla t'a biili wã pa na n tol n le feoos bada, t'a wĩr ba a ye ka na n le kaoog bada.

²¹ Yaa tẽng kãng pʋgẽ, la Soaala-Wẽnd na n wilg b pãnga, tẽnga na n paama kʋɩlse, a na n paama kʋɩls sẽn ya yalense, la zab-zabdb koom-kogend kõn kẽ be ye, koom-kogend bɛda ka na n dugs be ye.

²² Soaala-Wẽnd n wilgd tõnd sore, bãmb la tõnd sɩleto bãmb la tõnd dĩma, bãmb la tõnd Fãagda.

²³ Kogenda wĩ wã yolsame n ka le sog da-woka ye, b pa le loet tãb-kaoorã a zug ye. Laoga sẽn paama la b na n zĩnd n pʋɩ. Ba kar-kegda fãa zĩnda zɛɛbẽ wã.

²⁴ Ned ba a ye kõn tõoge n le yeel Zerizalɛɛm pʋgẽ t'a ka keem ye. La neb niyns sẽn be tẽnga pʋgẽ na n paama b yel-wẽna sugri.