A Ezayi 30 - SEBR SÕNGO

Geels sẽn ya goalma

¹ Wẽnd n gomde: yell bee kom-bi-beesa zugu! B geenda geels sẽn ka mam rẽnd ye, b yõgda ne taaba zood sẽn ka tat m yam ye, la woto b rɩkda kongre n dogl kongr zugu.

² B yit n kẽnda Ezipt n yaool n ka reng n sok-m ye. B kẽnd n na n tɩ soonda Ezipt tãnsoben-doogẽ b kẽnd n na n tɩ soonda Ezipt dĩma maasmẽ.

³ Mik Ezipt tãnsoben-doogo mik Ezipt dĩma sõngre, fãa na n waa ne b yãnde.

⁴ M nee b taoor dãmba sẽn ta Tanis m ne b sẽn tʋm b rãmba sẽn zoe n be Anes.

⁵ B raaba ka na n tõog n pids ye, Ezipt rãmb ka na n tõog n sõng-b ye, b ka na n tõog n maan bũmb b yĩng ye, dẽnd yʋ-sãoongo, dẽnd yãnd tʋkre.

Sẽn baood-b Ezipt sõngre

⁶ Rũms n yõrd ne zɩɩbo n tees nug rɩtgo. B sẽn kẽndã yaa pɛta, sũ-wẽnegr la war tẽngẽ, yaa bõnyẽes sẽn tar kaasg tẽngẽ, yaa boosr la wag-bãnd sẽn yɩgd n kɛɛdẽ tẽngẽ. Yaa be la bõeense ne yʋgma tʋk laogo, n dabda. B rabd n na n tɩ kõo nin-yaals sẽn ka tõe fɩ b yĩnga.

⁷ Yaa rẽ yĩnga la m pʋd a yʋʋr woto: «A Gãe-tẽng-n-zabdẽ.»

Gũusgu tog n gũusame

⁸ Soaala yeela a Izayi: «Kẽng marsã n bao bũmb n gʋlse, n gʋls Zerizalɛɛm dãmb taoore, t'a yɩ beoog raare kaset sẽn kõn menem.»

B pa rat n yãend ye

⁹ Yaa bi-bees buudu, yaa zirẽ-be-rãmba sẽn pa rat n kelg Wẽnd gomd ye.

¹⁰ B yeta sẽn ne-b bõn-bãna: «Sã n ya tõnd yĩnga, da yãend-y bũmb ye.» B yeta bãngdba: «Sã n ya tõnd yĩnga, da paam-y bãngre n wilg sɩd ye. Togs-y tõnd sẽn noom tõndo, belg-y tõnd ne bõn-faado.

¹¹ B sẽn dat tɩ bãngdba maan bũmb ninga, yaa b bʋdg n kẽ moogo yaa b bʋdg n bas so-sõngã. B yet-b lame tɩ b ra yɛs b taoore n tar goama la yaa Israyɛl Wẽnnaama, yaa Israyɛl Nin-Sõnga yell bal la b gomd ye.»

Sãoong ka tõe n ka sãam ye

¹² Yaa rẽ yĩnga la Israyɛl Nin-Sõngã yeel yã: «Yãmb ka rat n deeg m saglgo ye, y sẽn teege, y sẽn dell b rãmba yaa sẽn nong-b n wẽoog b taaba, yaa sẽn nong-b n zãmb b taaba.

¹³ Yel-wẽnd kãng sẽn na n wẽneg a soaba, yaa lalg sẽn tãs mugnum; lalga sẽn ya wokã, a na n põdame, n nuki, a na n kaoogame n lʋɩ vugri.

¹⁴ Yaa woto me la tãnda rʋk wãagda; yaa pees la a tãsda tɩ tɩɩm ka ye; f kõn yãend peesa sʋka, pɛɛg sẽn tõe n mok bugum bug-toaalgẽ, bɩ sẽn tõe n zolg koom bãkẽ ye.»

Tĩig ningri

¹⁵ Yaa rẽ yĩnga la Soaala-Wẽnd yeel yã, rẽ yĩng la a Israyɛl Nin-sõnga yeel yã: «Y zʋga tekre n na n wa ne y fãagre la y laafi. Y sã n ket n teegd Soaala y na pid ne pãng la raoodo. La yãmb ka rat rẽ ye.»

¹⁶ Yãmb leokdame: «Tõnd na n zoee ne weefo!» Y na zoe la d na gese. Y le yeelame: «D na kẽe bilim-bilm sẽn tar tĩiga.» Kato, ad-y sẽn pʋgd-b yãmba n yɩɩd ne tĩiga!

¹⁷ Nin-yend bala, bɛ a ye bala seka a fʋʋs yãmb tusri; neb a nu sã n pʋgd yã, y gill fãa n na n kʋɩ tĩiga, la y wat n wa keesa nin-yende, wa tãb-kaoor sẽn laand a ye, tãng bɩ kunkubr zugu.

Fãagr wakato

¹⁸ Ad-y Soaala-Wẽnd gũuda b wakato n na n yik n maan-y sugri. N na n yik n zoe y nimbãanega, Soaala-Wẽnd yaa zemsg soaba: sũ-noog rãmba la sẽn teeg b bãmba!

¹⁹ N-ye! Siõ rãmba, Zerizalɛɛm rãmba, y kõn le yãb ye. B sẽn wʋm y kosg bala la b sẽn wẽneg n deeg-a.

²⁰ Y pɛta pʋgẽ Soaala-Wẽnd na kõ-y rɩɩbo, la b yũnug-y koom, y sũ-pa-noanga pʋgẽ; sẽn da tog n zãmsa wã kõn le solg a meng ye, y nin na yãend yẽnda soaba.

²¹ F tʋbr na wʋm koɛɛga, n wʋm sã n ya rɩtg bɩ goabg la f tog n kẽnge. Koɛɛgã n na n yeele: «Ad sor ning f sẽn tog n dɩke!»

²² F na n gesa wa rẽgdo wanzurf la sãnem sẽn dɩk n bolg nin-naandsã; fo na n lob-b-la wala bõn-dẽgdo la f na n yeel-b lame: menem-y ka!

Koom la vẽenem

²³ Wẽnd na kõ-y-la saaga y kooda yĩnga, la tẽnga sẽn na n kõ-y rɩɩb ningã na n yɩɩ kũun sẽn ya zembala la sõmbo. Y rũmsa na n paama yamdo b wãbneg zĩ-yalensẽ.

²⁴ Niisa la bõeensa sẽn koodã, bãmb rɩɩb na n yɩɩ yamd sẽn kʋʋse, sẽn welg ne sagdo, sẽn dɩɩme la sẽn ning yamsem.

²⁵ Zɩɩma daagr poore, zaba la ro-wogda lʋɩɩs poore, tãng fãa, tãn-woko, tãn-bil fãa pennẽ, b na yãe koom sẽn zoete n zãgsd pʋto.

²⁶ Kiuuga vẽenem na n yɩɩ wa wĩntooga rẽnna, la wĩntooga vẽenem na n paasa naoor a yopoe, wala dasem a yopoe vẽenem sẽn naag taaba. Yaa wakat kãnga la Soaala-Wẽnd na n tɩp b neba noada la b sãoog pãbra sãmpoagã.

Soaala waa n na n wilga Asiri rãmb yam

²⁷ Ges-y, Soaala-Wẽnd yita al yɩɩg n watẽ. B sũur wita wa bugum, wa bug-toaaga, b noor yiisda b sũ-fõora walem, b zelemda põngda wa barga.

²⁸ B noor pemsem yaa wa kʋɩlg sẽn pid n daannẽ, n limd n tat kokoɛ. B waame n na n go bu-zẽmba ne goaadg sẽn ka basd rẽok tɩ loog ye. B waame n na n ning salbre bɛɛba noorẽ, n paam n tall-ba n zãage.

²⁹ Sã n ya yãmba, Zerizalɛɛm dãmba, yãmb yɩɩlle na n yɩɩ sũ-noog yɩɩlle, a na n yɩɩ wala yʋn-sʋk kibsa rẽnna. Y sũur na pida ne sũ-noogo, wala f sẽn dʋʋd Soaala tãngã, tɩ wɩɩg peebdẽ, n dʋʋd n babsd Soaala a Israyɛl Pĩigã.

³⁰ Soaala-Wẽnd na n basa b koɛɛga t'a sãde wa nin-naab koɛɛg sẽn sãte, la b na n yãenda b nug sẽn zẽke n na n wẽ sũ-puur wẽebo, n na n widg bugum sẽn ka sugri, n na n kiig koom la sapɩlem.

³¹ La Soaala-Wẽnnaam koɛɛga sã n sãde, Asʋr na n yɛɛsame. Soaala na n waa ne dasaare.

³² Soaala-Wẽnd sã n wa pãbd ne dasaarã, yaa yam la b na n wilg ninsaala; gãngãoog bil la pɛndg me na n naagame n kũmdẽ n sokd Soaala-Wẽnd wẽedo.

³³ Yaa al daar zãra la wʋnga segl n yɛsẽ, la a bugma wita Asiri rĩma yĩnga. Wʋnga segla zĩ-vɩʋʋgẽ, zĩ-yalengẽ, wʋnga kɩbga bog-zulungẽ. Buguma sẽn na n widgã raado manegame n tigim, n tigim ka tɛka. Soaala-Wẽnd na n fʋʋsa bugma la a na n widgame, n widg wala kidbri bugum.