A Ezayi 28 - SEBR SÕNGO

Samari yãeta toogo

¹ A Samari la a Efrayim naam pugla, yẽ la a rã-yũudba na-tẽnga la b zu-zẽkre, la yell be-la a zugu! A zao yĩngri n get a bãg-faagã. Bãg-faaga ra tog n pidẽ la ne yõodo, la bũmb sẽn kete yaa puud sẽn zelge a kamba sẽn tɩg rãama sẽn dɩk n bɛ b zutu.

² Ade, buud sẽn tar pãng n na n wa, la Soaala-Wẽnd n tʋmd-a; a na n waa wala sapɩlem-saaga, wala saag sẽn lubd fãa, a sor zugu, wala sa-ko-bɛd saaga, saag ne koom sẽn na n dɩ tẽnga zãnga. Soaala-Wẽnd nugã n na n tus tẽngã n lubi.

³ B na taba naama pugl ne nao, n tab a Efrayim rã-yũudba na-tẽng la b zu-zẽkrã.

⁴ B na n taba ne nao, Samari faonga sẽn zelgã wa puugã, Samari sẽn zao yĩngr n get a bãg-faaga, bãg-faag sẽn togẽ n pidẽ ne yõodo. Samari na n wẽnega kankamde, kankamd sẽn bɩ tɩ wakat nan pa ta ye. Sẽn deng-a a yãeebo, fãsgd-a-la a nugẽ la yaa leems vuka.

⁵ Daar n wate tɩ dũni fãa Wẽnda na n waa ne naam pugla, pugl sẽn be neere, bu-kella yĩnga.

⁶ Bãmb n na kɩt tɩ bʋ-kaood fãa bʋ a bʋʋda ne zemsg yam, bãmb n na n kõ tãb-biig fãa raoodo, t'a zãag bɛɛba ne tẽnga noor kʋɩlenga.

Rã-yũudba laada bãngda

⁷ Ad-y neb n be tɩ rãama kẽesd-b moogo, neb n be tɩ rãama kɩt tɩ b kẽnd n lagsdẽ: yaa maan-kʋʋdba la bãngdbã. Rãam sẽn tar pãnga la b yũ n kẽed moogo, rãama kɩtame tɩ b kẽnd n lagsdẽ n ka le mi b goabg la b rɩtg ye. Rãama sẽn tar pãng la b yũ n tuumnẽ, b pa le tẽr Wẽnd sẽn lik bãmba n yeel-b tɩ bũmb ning ye. Dẽ la b gomd b bãngra goama n kalemd taaba.

⁸ Rɩɩba zĩig rẽgma ne wʋbdo, zĩ-yɩleng ka le ket ye.

⁹ Dẽ me la b sokda: «Ãnda la Izayi rat n karme? Ãnda la a rat n wilg a sẽn yãenda võore? Daare yaa kamb sẽn nan bas bĩisri paalem, yaa kamb sẽn nan ka yi b ma roogẽ.

¹⁰ Kelg-yã a goma: ‹S-A-S-A, S-A-S-A, T-A-T-A, T-A-T-A, pĩnd boto, marsã woto.› »

¹¹ N-ye, yaa ne bidg noore, yaa ne goam sẽn ka tõe n wʋme yaa ne bu-zẽnd goam bala la Soaala-Wẽnd na n gom ne b buudã.

¹² Wẽnnaam yaool n da yeel-b lame: «Vʋʋsg tõe n vʋʋsa ka, bas-y sẽn yɛɛ t'a vʋʋse tɩ kaalẽ ka be bʋʋr ye.» La b pa tʋlg n kelg ye.

¹³ Yaa rẽ yĩnga la Wẽnd gomda na n wẽneg bãmb rẽnna n ka tar võor ye: «S-A-S-A, S-A-S-A, T-A-T-A, T-A-T-A, pĩnd boto, marsã woto.» Tɩ b sã n tarẽ, bɩ b wa lɛɛg n lʋɩ zãmbɛɛla, n kaoog-b sɛɛga, tɩ wĩir sog b nao.

Meeb kugri

¹⁴ Kelg-y Soaala-Wẽnd koɛɛga, yãmb fãa sẽn laad y taaba, la sẽn ya-b Zerizalɛɛm soaalba.

¹⁵ Y yetame: «Tõnd yõga zoodo ne kũum, la d maana sardo ne bʋg-tẽng rãmba. Y yetame tɩ yel-beed ning sẽn wata kõn ta yãmb ye tɩ yãmb tara y soondg zĩiga, y mii y sẽn na n yag zirẽ ninga n põse, y mii y sẽn na n padem padeng ninga.»

¹⁶ Ad-y Soaala-Wẽnd yet-y lame: M na n vigla kug-kɛgeng Siõ pʋgẽ, yaa kugr sẽn maneg n pees meeb yĩnga, yaa kug-neere sẽn vigl sõmbo. Kug kãng la sẽn teeg-b maama na n wẽnege, n wẽneg ne neerem la keglem.

¹⁷ Wĩir ning m sẽn na tall n mage tɩ bũmb da yõsg a to, bũmb ning m sẽn na n tall n ges tɩ meeba ra kɩll goabg bɩ rɩtgo, na n yɩɩ zemsgo ne y meng la y taaba. Yaa roog la y me n na n kẽ, yaa bũmb la y me n na n soond a pʋgẽ, ad-y m sã n pa yãend zemsg a pʋgẽ, sapɩlem n na n pãb n sẽeg y zirẽ-be-roogã la koom n na n looge ne soondg zĩigã.

¹⁸ Woto yãmb ne m ba kũum zooda na sɛ, yãmb sarda ne bʋg-tẽnga ka na n yals ye. Yel-beed ninga sẽn na n fõd wa koom n wa wã la sẽn na n kãag bũmb fãa n loogã, na n wẽneg n bedsa yãmb zãnga.

¹⁹ Yel-beeda segd-y yibeoogo, a segd-y wĩntoog bɩ yʋngo a na n yẽeg-y lame. Y sẽn bãng a waoong raar fãa na n yɩɩ yɛɛsgo.

²⁰ Ade wala yelbũnda sẽn togsde Gãaga na n yɩɩ koɛɛga tɩ pa tõe n tẽeg n gãand ye, fu-goabga na n yɩɩ bilfu tɩ pa tõe n yɛdg n pil ye.

²¹ N-ye, wala Perazim tãngẽ, Soaala-Wẽnd na n yikame, wala Gabaõ pʋtẽ, b na n sɩngame n tʋm b tʋʋmde, n yals b sẽn sede, la tʋʋmda yaa tʋʋm-bãnde, ka beoog-beoog fãa tʋʋmd ye.

²² Woto wã, bɩ laada rãmba, bas-b laado tɩ b ra wa sãrg wĩ niyns sẽn pid b kokorã n paas ye. M wʋma dũni fãa Soaala nengẽ, tɩ tẽnga fãa wãab ya bũmb b sẽn yalse.

Koaad yam la Wẽnd dẽnna

²³ Maneg-y tʋba n kelg m koɛɛga, wʋm-y m sẽn na n togsa neere!

²⁴ Wala y sẽn mi wã, ka-koaad sã n tʋmnẽ a ka tar a pʋʋga koob bal ye, a ka maand vugs bala, ka mooga bal la a tar pĩngr ye,

²⁵ A sã n sarem kaalma n sɛ a bʋta kood buud toor-toore. A rengda ne puudã, n wat zẽ-biisã sẽn tar yũ-noogo, n wat alkam pɛɛlga, la alkam pugsgu, ned kam fãa ne zĩig ning sẽn tog ne-a, n yaool marsã n bʋd alkam kɛgeng n gilgi.

²⁶ Ka-koaad zãmsa a tʋʋma a Naanda nengẽ, b sẽn zãms-a wã la a tũuda.

²⁷ Ypuda ka tabd n beds ye, bilim-bilma nao ka sɩɩsd zẽ-biisa sẽn tar yũ-nooga ye, b sʋʋgd-b-la ne rabãande.

²⁸ Alkam pɛɛlga, bilim-bilma n tabd rẽ, la ka tar tabr tɩ wa beds ye. Bilim-bilma tabdame n looge la bũmb ka bedsd ye.

²⁹ Dẽ me yaa Soaala-Wẽnd n wilgi. Woto me la d ne tɩ bũmb fãa tara a zĩiga, la b bãngra me ya zulunga.