A Ezayi 27 - SEBR SÕNGO

Koomẽ rũm-bãnde, a Leviatã, kũum

¹ Badaare, Soaala-Wẽnd na n dɩka b sʋ-yalenga, n dɩk b sʋ-kɛgenga, b sʋ-rɩtga, b sʋ-taoko, la b na n sɩbga a Leviatã. Yẽ la koomẽ rũm-bãndã, waaf sẽn ka sɩɩsde. yẽ la waaf ne põada, Ad-y Soaala na n kʋʋ yẽnd me.

Soaala-Wẽnd ne b bugsuntungu

² Baraare, yɩɩl-y m bugsuntunga yɩɩlle, tɩɩg ninga biis sẽn kõgd rã-noogã.

³ Yaa m menga, Soaala-Wẽnd menga, n gũud-a, m zãgsd-a-la koom wala a sẽn date, m gũud-a-la wĩndg la yʋngo, tɩ ned da wa kẽ a pʋgẽ ye.

⁴ M sũur ka le puud ne-a ye, gõose la pulgumdi sã n belg b meng n yi, m na zab ne-ba, m na yõog b bugum zãnga.

⁵ Sẽn kete yaa bɛɛba wa soond mam maasmẽ, yaa b wa maan zood ne maam, n-ye, yaa b bao laafi ne maam!

A Zakoob na n paama sugri

⁶ Sã n yɩ bilfu a Zakoob buuda na n pusa yẽgen-paala, a Israyɛl na n tobame la a na n ninga puudu, la tẽnga gill na n pida ne a biisi.

⁷ Soaala-Wẽnd pãba b buud a Israyɛl wala b sẽn pãb a bɛɛba bɩ? Soaala-Wẽnd kodg-a lame wala b sẽn kood a bɛɛba bɩ? B kʋ-a lame wala b sẽn kʋ a bɛɛba bɩ?

⁸ Ayey! Soaala bʋ-la a Israyɛl kamba bʋʋdo n dig-b bala n yiisi, n dig-b bala n zãage. Daar a ye bala la b tũnug-b ne yaang sobgo n loog ne b pa-weere.

⁹ Ad-a Zakoob yel-wẽnda sẽn na n yẽes to-to marsã, ad sugra sẽn kõ wã yõodo sẽn na n yɩ a soaba. Kug niyns sẽn tall n me maan-kugrã, b na n pãb-b lame n bõgse, la a na n booga wa goore, la b kõn le yãend tɩ b peesd da-lugri, b kõn le yãend tɩ b rõogd wisd laas ye.

¹⁰ Tãnsoben-tẽnga lebga raboogo, ned ka le be a pʋgẽ ye, a lebga wa we-raoogo, wa pʋ-wɛɛga, tɩ nag-bi wat n wãbd yamd be, la b wat n gãe be, la b wat n wãbd tuudu.

¹¹ Wil niyns sẽn kʋɩ-bã, sẽn kao-bã, pagba wat n ning-b-la bugum. Ad-y yaa buud sẽn ka tar yam, dẽ me la a Naanda pa le nong-a, dẽ la sẽn wuba bãmba ka le wat ne sõngr ye.

Pa-weta lebgr da-kãsenga

¹² Baraare, ad-y Soaala-Wẽnd na n pãba b koodo, b na n sɩnga Efrat kʋɩlga n wa baas ne Ezipt kʋɩl-bɛɛga. Wakat kãng marsã, Israyɛl kamba, la b na n dɩgs yãmb a yeyn-ye

¹³ Baraare, b na peeba tõntõ-kãsenga tɩ sẽn menem-ba n be Asʋr tẽnga lɛɛg n wa, sẽn be-b Ezipt tẽnga me na n waame la b na n waooga Soaala-Wẽnde b tãn-sõnga zugu, Zerizalɛɛm pʋgẽ.