A Ezayi 25 - SEBR SÕNGO

Soaala yaa b neba tãnsoben-doogo

¹ Soaala, yãmb la m Wẽnnaam, m datame n kils la m pẽg y yʋʋre, m datame n wilg y sẽn yaa a soaba. Sɩda yãmb pidsa y kãab-noogã, kãabgo y sẽn zĩnd n tagse, tɩ bũmb ka be sẽn na teem ye.

² Yãmb kɩtame tɩ tẽnga lebg kug-saongo, y kɩtame tɩ ka sugr dãmba tãnsoben-dooga tek n lebg raboogo, wilg-m-meng rãmb tẽnga ka le ya tẽng ye, b kõn le tõog n me-a n yik abada.

³ Yaa rẽ la buud sẽn tar pãnga na n pẽg y yʋʋre. Bu-zẽmb toosa tẽnsẽ, Soaala, yãmb n na n dɩ naam.

⁴ La rẽ wã yaa y sẽn sõng nin-koam dãmba, n sõng naong sẽn tar b rãmbã, b sẽn da waa n zĩ ne b farã. Yãmb yɩ-la b roogo saag niib wakato, n yɩ b maasem tɩɩga, wĩntoogẽ. Ad-y na-toosa sũura fõta wa saag sobgo,

⁵ tɩ b sũ-puura maand wa wĩntooga tʋʋlem sẽn maand ne tẽn-koɛɛnga. Yãmb sɛɛsda wilg-m-meng rãmba bʋʋre. Wala sawadg maasem sẽn woogd wĩndg waolgo, woto me na-toosa sẽn wat n dat n wilg b pãnga, wakat kãng la b noor ka na n le tõog n yaage.

Kibs bu-zẽmba yĩnga

⁶ Dũni fãa Wẽnd na n segla dɩɩbo, Siõ tãnga zugu, ninsaalb buud fãa yĩnga. Na n yɩɩ nemd sẽn be kaam, la rã-sõma me pa na n paoog ye, nemd sẽn bʋgse la sẽn tar kaam, rãam sẽn pid rãam, n ka tar zurbzutu.

⁷ Bũmb ning sẽn lud b yama wa fuugã bũmb ning sẽn mum bu-zẽmba nina, Wẽnd na pilg-a-la Siõ tãnga zugu.

⁸ Kũum na n menema zãng-zãnga, Soaala-Wẽnd na n yẽesa nensa fãa nintãm, b na peka b buuda rẽgdo n menes zãnga; rẽ yaa Soaala n kãabe.

A Israyɛl sũ-noogo, a Moab lʋɩɩse

⁹ Baraare b na n yeelame: «Bãmb la tõnd Wẽnde. Bãmb nengẽ la d da gũud fãagre, la b sɩd fãag-d lame, bãmb la tõnd teegre, d kɩdem la d lange tɩ b sɩd fãag-d lame.

¹⁰ Wẽnd pãng siga tãn-kãnga zugu.» Sã n yaa a Moab, b tabd-a lame wala b sẽn tabd yamdo b sẽn gãneg bokẽ tɩ põogẽ.

¹¹ A Moab zẽkda a nusi n kabend wa ko-rugsa, la a sẽn maand fãa Soaala na n sɛɛsa a tɩtaama.

¹² Ad-f lal-gũbrã sẽn me ne kug sĩdma la sẽn ka tõe n gãndgã, Soaala-Wẽnd tus-a lame n lub tomẽ.