A Ezayi 24 - SEBR SÕNGO

Yaa tẽnga gilli la yell na n pake

¹ Ad-y Wẽnd meng n na n wa sãam tẽngã, n sãam-a t'a nenga tedg fasi, n sẽeg a kamba zĩig zãnga.

² Maan-kʋʋda wala neb a taaba, zu-soab wala yamba, roog-ma wala roog-biiga, sẽn yaa pengda wala sẽn deegda pengrã, sam-dɩta wala b sẽn dɩ a soab samde, fãa na n wẽnega taaba.

³ Tẽnga na n sãama zãnga, zɛɛdba na n zɛɛ-a lame. Soaala-Wẽnd yalsa woto:

⁴ «Tẽnga lebga kʋ-yiri, a lebga raboogo, dũni wã sãamdame, a lebgda raboogo, yĩngra meng naaga tẽngã n teemnẽ.»

⁵ Tẽnga rẽgmame, tẽnga kamb n tʋm dẽnna tẽnga kamb tõdga noore, tẽnga kamb kɩɩsa Wẽnd noore, n sãam zoodã sẽn da yõg daar fãa yĩnga.

⁶ Yaa rẽ yĩnga la kãab wẽng pʋg tẽnga zãnga t'a reeg a sɩbgre, yaa rẽ la bugum dɩt tẽng zug rãmba, tɩ sẽn na n põs-ba sõor lebgd bilfu.

⁷ Rãam ka le kõgd ye, bugsuntunda bẽedame, sũ-nooga rãmba waasda toog waasgo.

⁸ Gãngãad pa le maand noog ye, sũ-noog kaasgo ka le kaasd ye.

⁹ Rã-yũudba ka le yɩɩnd b yɩɩl ye, rã-toosa lebga tɩseng b noorẽ.

¹⁰ Tẽnga lebga vɩʋʋgo, n lebg zũnd-zãnde, zak fãa noor pagame, noor ka bee n kẽedẽ ye.

¹¹ B yãbda soya zutu, tɩ dãam sɛɛme, tɩ sũ-noog buud fãa sɛɛme, sũ-noog digame n zãag ne tẽngã.

¹² Tẽnga pʋgẽ, bũmb ba a ye ka le ket a zĩigẽ ye, tẽnga noor kʋɩlenga kaoome.

¹³ Tẽnga ninsaalb na n lebga yiisgu wala oliviye tɩɩg sẽn tõs n looge, wala sãbse sẽn kao n sɛ.

Kɩdenga wakat nan pa ta ye

¹⁴ Soaala-Wẽnd sẽn fãag b rãmba, n zẽkd b koeese, Soaala-Wẽnd ziira la b kilsd ne yɩɩla, sũ-noog kaasgo la b kaasda; b yii nin-taoor n watẽ, la woto la b yɩɩnda:

¹⁵ «Yaang rãmba, pẽg-y Soaala yʋʋre, moon-y mogra noorẽ tɩ Soaala-Wẽnd la a Israyɛl Wẽnnaam.»

¹⁶ Tõnd wʋmda yɩɩn-kãnga, yaa al tẽnga satmẽ la a yit woto: «Sẽn nonga zemsg soaba, paam pẽgre!» M wʋmame n yeele: «Yel-beed lʋɩ m zugu, yel-beed lʋɩ m zugu! Ad-y lebga bʋk ne bʋko! Zãmb n zãmbde, ned kam fãa zãmba wa a sẽn tõe tɛka.

¹⁷ Y sẽn lebẽ fãa na n yɩɩ yɛɛsgo, loanga, bẽdgo n gũud-y, yãmb fãa, tẽng zug rãmba.

¹⁸ Yɛɛsda bʋ-raasã n wudg n lʋɩ loangẽ, n paam n yi loangẽ, n tees n pa wĩir bẽdgẽ. Kooma rat n dɩɩ tẽngã, tẽnga tara miuungu.

¹⁹ Tẽnga tara pusbu, ad-a sẽn kɩllde, ad-a sẽn lʋɩte.

²⁰ Tẽnga tuumda wala rã-yũuda, a zũndga wala roog sugri, a yel-wẽna zɩsg-a lame, a sẽn lʋɩ, a ka le tõe n yik ye.»

Wẽnnaam sɩnga b naam dɩɩbo

²¹ Baraar me, zabre n na n yiki, n yik ne yĩngr-yĩngr dãmba, n yik ne tẽng zug dĩm dãmba fãa.

²² B na tigs-b lame n kẽes bokẽ, b na n pag-b-la roogo n bas tɩ kaoose n yaool n wa kao bʋʋdo.

²³ Kiuug na n moogame, yãnd n na yõk-a, yãnd n na n yõk wĩntoogo tɩ yẽ me vẽenem booge. Dũni fãa Wẽnd n na n dɩ naam Zerizalɛɛm, Siõ tãnga zugu. B kug-zĩidba taoore, sẽn wat-b bãmb taoor ne koeesa toor-toorã, b na n basame tɩ b ziira yãge.