A Ezayi 23 - SEBR SÕNGO

Fenisi tẽn-peelem wãabo

¹ Naaba-Wẽnd koɛɛg ne Tir. «Kelem-y kʋʋre, Tarsis koom-kogendo, tɩ y tẽnga wãame, la roog pa kees ye.» Ad-y yaa b sẽn ta Sipr la b yaool n wʋm rẽnna.

² Yɛɛs-y la mum-y y noore, mogra noorẽ dãmba, Sidõ toandba,

³ toandba, sẽn dʋʋgd mogre. Kood niyns fãa sẽn bʋd Nil kʋɩlga noore yaa Sidõ n da tʋkd n looge. Yẽ n da rɩt ãndũni rãmba fãa yõodo.

⁴ Yãnde, Sidõ, Yãnde! Foo la mogra noorẽ dãmba tãnsoben-doogo! Mogra meng yaaga a noor n gomda: «M zãgsda rogem waood rigbu, m zãgsda rog kamba, m zãgsda wub kom-dibli la kom-pugli.»

⁵ Ezipt rãmba sã n wʋm kibarã, b na n yãee toog wa pag sẽn kũmd rogem, b na n yãee toogo wala b sẽn yãe toog ninga yɛla sẽn waa n pak Tir.

⁶ Mogr noore dãmba, rʋʋg-y mogrã n ta Tarsis n kelem y kɛlenga!

⁷ Y sũ-noog tẽnga n lebg woto? Y tẽnga sẽn ya tẽn-kʋdem-wẽnnẽ tẽnga, t'a kamba sẽeg n kẽed al yɩɩga la woto?

⁸ Yaa ãnda n yals woto Tir yĩnga, tẽng sẽn da ya naam pugli pʋɩta? A toandba ya na-komse tɩ raadba ya tẽng nin-bɛd gilli.

⁹ Ad-y yaa dũni fãa Wẽnde n yals woto, sẽn na yɩ-la n sik wilg-m-menga, sẽn baood-b waoogra wilg-m-menga, la b sik sẽn paamd-b waoogr dũni rãmba nengẽ.

¹⁰ Tir, ko pʋt marsã, tɩ zĩig ka le ket koom-kogenda sẽn na n soond sobg ye.

¹¹ Soaala-Wẽnd yeela mogra t'a maan gũusgu, b kɩtame tɩ nanams dig rabeem, b kõo noore tɩ b menes tao-tao Kanaã tãnsoben-dota fãa.

¹² Bãmb n sɩd yeele: «Da le bao sũ-noog ye, Siõ bi-pugla, tɩ fo sãamame tɩ f nan pa kul sɩd ye. Ba f sã n yik n dɩk sore, f sã n dʋʋg mogrã n ta Sipr f na bao vʋʋsg n konge.

¹³ Ges Sipr dãmba tẽnga: bũmb ka le ket ye. Asʋr da rɩk-a lame n maan a koom-kogend tigsg zĩiga, la b waa n mee ro-lug-lugi n wa tak zabr ne-a; b sɩd waa n wã-la a ro-neeba tɩ fãa lebg raboogo.

¹⁴ Kelem-y, Tarsis koom-kogendo, tɩ y sẽn da soond sobga zĩig ningã tẽn-kãng wãa zãnga.»

¹⁵ Wakat n na n zĩndi, yʋʋm pisopoe pʋgẽ, dĩm a ye naam dɩɩb tõre, b pa na n le tags Tarsis yell ye. La yʋʋm sã n wa maan pisopoe, Tir na n wẽnega pʋg-yoodr ninga b sẽn togsd a soab kibar woto ne yɩɩllã:

¹⁶ Dɩk f pɛndga, ka le tar sõm soaba, saag tẽnga roto n wẽed f pɛndgã, le wẽ-a wa f sẽn mi tɛka, le rɩk f pĩnd yɩɩlã tɩ daare b na le tẽeg f yelle.

¹⁷ Yʋʋm sã n pid pisopoe, ad Soaala na n le gesa Tir yelle la Tir na n le sɩng n deegda a yooba ligdi, a na le rɩka a menga n kõ ãndũni rãmba.

¹⁸ La a yaoodã, a sẽn paamda fãa na n lebga Wẽnd soolem, pa tõe n le bĩng ye, pa tõe n le tisg ye, yaa sẽn tʋmd-b wẽnd dooga tʋʋma n na n soog ligd kãnga, n paam n dɩlgd b menga, n dɩt n tɩgda la b yeelgd fut sẽn ya neeba.