A Ezayi 21 - SEBR SÕNGO

Babilon lʋɩɩse

¹ Ad Naaba-Wẽnd koɛɛg ne Babilon sẽn na n lebg we-raoogo. Bɛɛb n yit we-raoogẽ wã n watẽ, n yit tẽng ning sẽn kẽesd rabeema n watẽ, la a wẽnda Negɛb sob-raoogo.

² Sẽn pa sõmbe tɩ Soaala wilg-ma la woto. Pĩnd zoa wã n lebg zãmb soaba, la bɛ wã zoe n sɩnga wãabo. Dẽ me la Soaala yeta: «Elam dãmba, wa-y Babilon! Mɛd dãmba, wẽ-y gũbri! Yaa rũnna la m na n sik a wilg-m-mengã.»

³ Ad-y m sẽn wʋme, toog sãaga m yĩnga, m digimda waoodo, wala pag sẽn kũmd dogem. M sẽn wʋma leeba m yama zãnga, m sẽn ne wã yɛɛsd-m-la wʋsgo.

⁴ M dat n basa raoodo, m digda rabeem kãsenga. M da gũuda zaabre n na n paam pemsem maasga, la a teemame n lebg yɛɛsg wakato.

⁵ Rɩɩba tall n waa rɩɩba roogẽ, roog manegame n tʋɩ pɛɛla, tɩ b sɩng rɩɩb la yũubu; la koɛɛg lʋɩɩme n yetẽ: «Tãnsoaben-dãmba, yik-y-yã! Dɩk-y y zab-teedo!»

⁶ Ad-y Soaala yeel-m-la woto: «Kẽnge, dʋʋs gũud rooga zugu t'a wilg a sẽn na n yãend bũmb ninga!

⁷ A sã n ne bilim-bilm sẽn sog wiidi zabr yĩnga, n ne bõeens bɩ yʋgma, bɩ a maan gũusgu, a maan gũusg wʋsgo!»

⁸ Gũuda yeelame: «M pa-la m zĩigẽ wã daara tõre, yʋnga tõre m maana gũusgu,

⁹ la ade, ges-y, ned n yi yɩɩg n watẽ. Ned n zao bilim-bilm, la wiidi n tat-a. Nin-kãng n yet woto: ‹Babilon lʋɩɩme, Babilon lʋɩɩme! A wẽnd dãmba togsendã, fãa wãame n dɩg tẽnga!› »

¹⁰ M buudu, Soaala sẽn pãb a soaba wala ki sẽn dʋʋg zɛɛgẽ, ade, m buudu, yaa woto la m wʋm yã, dũni fãa Wẽnda nengẽ, woto la m wʋm Israyɛl Soaala nengẽ, la m waame n na n wilg-fu.

Yʋnga ta-la a wakat bʋgo?

¹¹ Naaba-Wẽnd koɛɛg ne Duma. Koɛɛg n yi al Seyir, m sok ma: «Gũuda, yʋnga ta-la a wakat bʋgo? Yʋnga ta-la a wakat bʋgo?»

¹² Tɩ gũuda leoke: «Zĩiga sɩngda yẽegre la ket n yaa yʋngo, la y sã n dat leokre, y tõe n le lɛɛg n waame.»

Seg-y Dedã la Kedar zoetba

¹³ Bãngda sẽn yeel Arabi poorẽ. Dedã toandba, leb-y weoogẽ wã, leb-y pʋ-weesẽ wã n gũ beoog vẽegre.

¹⁴ Tema kẽedba, wa-y ne koom, yi-y n seg-y ko-yũud sẽn kʋʋd b rãmbã, yi-y ne buri n seg sẽn zoet-bã.

¹⁵ Yaa sʋʋs la b zoeta, sʋʋs sẽn wõos n dat kɛɛb la b zoeta, yaa tãbdo sẽn dõos la b zoeta, tɩ yaa zabre sẽn zabd ne rugdu.

¹⁶ N-ye! Soaala goma ne maam woto: Yʋʋmd a ye yɛsa, yʋʋmd muka, t'a Kedar pãnga la a ziir sɛɛ zãnga.

¹⁷ Sẽn na n kees Kedar tẽnga, a tãb-tãoodb ka tɛkã sʋka, a tãb-biisa sẽn ya gãndaadã sʋka, sẽn na n keesa ka na n zeng bũmb ye. La rẽ yaa Soaala, a Israyɛl Wẽnnaama, n yeele.