A Ezayi 2 - SEBR SÕNGO

¹ Ad-a Amos biig a Izayi sẽn yãend bũmb ning yɛsa Zɩɩda la Zerizalɛɛm poorẽ.

Dũni wã ninsaalb segda taab Zerizalɛɛm

² Wakat n wate tɩ Soaala roogã sẽn me tãng ning zugã, tãng kãng na lugame n zʋʋg a taaba, n lug n zʋʋg kunkuba fãa. Zamaana buud toɛ-toɛyã neb na n waa be.

³ Buud wʋsgo na n yiime n dɩk sore; b na n yeela taaba: «Wa-y tɩ d dʋ Soaala tãnga, wa-y tɩ d kẽ a Zakoob Wẽnnaam doogẽ, tɩ b wilg tõnd b noya tɩ d dɩk b sore.» N-ye! Yaa Siõ la Wẽnd zãmsga yita, yaa Zerizalɛɛm la Soaala Gomd sigda.

⁴ Bãmb n na n kao dũni rãmba bʋʋdo, bãmb n na n paas b zaba, n deeg b sʋʋsã n kud wãgse, n deeg b kãna n kud goeto. Tẽnsa kõn le yik zabr ne taab ye, la ned ba a ye kõn le zãms zabr takr ye.

⁵ Zakoob buudu, wa tɩ d kẽn Soaala vẽenemẽ.

Soaala raare, bʋʋda raare

⁶ Soaala, y pa le rat y nebã, y pa le rat a Zakoob buuda ye. Yaang rãmba n waa n deeg tẽngã n yãmbe. Filisti rãmba sõor sẽn zem to-to, b bagba me sõor zema boto. Y buuda yõgda zood ne sãamba.

⁷ Tẽnga pida ne wanzurfu la sãnem; arzɛka ka tõe n geelg n sɛ ye. Tẽnga pida ne wiidi. Bilim-bilma ka tõe n sõd n sɛ ye.

⁸ Tẽnga pida ne wẽn-faado, tɩ b wat n yĩgimd b taoore n waoogd b mens nus sẽn naane, b nus sẽn dõoge.

⁹ Yaa rẽ la na n yɩ pakre tɩ b noor turg tom. La yãmba, Soaala-Wẽnde, da sak-y tɩ b le roog ye!

¹⁰ Ninsaalba, bao-y pĩisi n lilli, bao-y bok n kẽ, n põs Soaala-Wẽnde, tɩ b pãnga na n kẽes-y-la rabeem la b ziira na n yɛɛs-y lame.

¹¹ Ninsaal zẽk-m-meng na n sikame, a tɩtaam na n sɛɛ daar a ye, la baraare, Soaala-Wẽnd yʋʋr bal n na n zẽke, bãmb b ye tãa.

¹² Sɩda daar n na n zĩndi, Wẽnd-Pãng-Soaba raare. Baraare la nagra sɛɛb raare, tɩtaama sɛɛb raare, zẽk-m-menga sikr raare.

¹³ Na n yɩɩ Libã tɩ-bɛda lʋɩɩs raare, Bazã tɩ-bɛd wa kʋgsa tõrb raare,

¹⁴ tãm-bɛda la tãm-bi sirgri raare,

¹⁵ ro-lug-lug la lals sẽn ka tõe n gãndg boogre raare,

¹⁶ Tarsis koom-kogend bɛda ne b arzɛka lisb raare.

¹⁷ Ninsaal zẽk-m-menga na n sigame, a tɩtaama na n sɛɛme, badaare Soaala-Wẽnd yʋʋra na n zẽkame, bãmb b ye tãa.

¹⁸ Bõn-naandsa fãa sẽn da paamd waoogrã, fãa na n tus n menesame.

¹⁹ Bao-y pĩisa pẽkse, sig-y tãmsã bogdẽ n paam n tɩlg Soaala-Wẽnd sũ-fõore. Ad-y badaare, b ziira na kẽesa rabeem kãsenga, b na kɩtame tɩ tẽnga fãa digimdi.

²⁰ Badaare ninsaal na n dɩk a sẽn waoogd b rãmba, n lob sãbtõaase la zãnkiti. A yaool n da yagb-b-la ne sãnem la wanzurfu n na n yĩgimd b taoore.

²¹ B na n bas-b lame n zoe n tɩ soond tãms bogdẽ la pĩis pẽgsẽ n paam n tɩlg Wẽnd ziira la b sũ-puura sẽn wat ne rabeem ningã, tɩ badaare, b na n yik n kɩtame tɩ tẽnga digimdi.

²² Vʋʋs-y ne ninsaal teegre, bãng-y t'a yõor koɛɛma. A yaẽ bõn-koosem a ka beẽ saag-toog ye.