A Ezayi 19 - SEBR SÕNGO

Ezipt rãmba ka mi-b sẽn lebdẽ ye

¹ Naaba-Wẽnd koɛɛg ne Ezipt. Ade, Soaala-Wẽnd zomba sawad-faasga n ta Ezipt tɩ Ezipt tẽng wẽnd dãmba, zirẽ-be-wẽnd dãmba digd rabeem, tɩ Ezipt dãmba sũur bendg b pʋgẽ.

² «M na zablga Ezipt rãmba ne taaba: yao na n yika ne a kẽema, tɩ zoa yik ne a noanga, tɩ tẽng yik ne a tẽn-taaga, tɩ rĩung yik ne rĩungu.

³ Ezipt yẽesem sɛɛme, a bãngre sɛɛme, tɩ b na bʋg b zirẽ-be-wẽnd dãmba, n bʋg b bagba, b tɩt rãmba, n sogs b kɩɩmse.

⁴ M dɩka Ezipt rãmba n ning nin-toaag nugẽ; dĩm sẽn kʋʋd nugẽ la m na n ning-ba. Soaala-Wẽnd n yeele, dũni fãa Soaala n yeele.»

⁵ Mogr kooma na n sɛɛme, kʋɩlga koom na n fõogame.

⁶ Ko-soya na n lebga yũugu, Nil kʋɩlgã na yõbgame, a na kʋɩɩme; rudma la bãng-n-sãag na n lʋɩɩme.

⁷ Nil kʋɩlga moodo na n wãkame, b pʋs n sʋʋgame, b kõn le yãend bũmb ye.

⁸ Kʋɩl-zẽ-yẽedba na n kelmame, zĩm-leoosa rãmba na n yãbame, zulumsa rãmba na n waasame.

⁹ Sẽn kood-b lamda ka na n naf ye, gurs-kãna rãmba, sʋnda rãmba, bãmb pa na n dɩ yõod ye.

¹⁰ Sʋnda rãmb sũur sãamame, sʋnda sẽn da rɩlgd b rãmba basda raoodo.

¹¹ Ad-y Tanis nanamsa ka tar yam ye. Sẽn sagend-b Ezipt dĩma yam paooda. B yɩta a wãn n yeel dĩma: «Mam yaa yam vẽenem dãmb biiga, pĩnd dĩm dãmba yagenga?»

¹² Yam vẽenem dãmba bɛɛ? Kos bãmb tɩ b wa wilg-fu dũni fãa Wẽnd sẽn yals Ezipt poorẽ.

¹³ Tanis dĩm biis yaa gãeemse. Memfis dĩm biisi belgda b mense, b taoor dãmba kɩtame tɩ Ezipt tõr saad n tuumnẽ.

¹⁴ Naaba-Wẽnd lob-b-la nen-yilinga dẽ la Ezipt kẽnda n ka le mi a sẽn maande, wala rãam sẽn lub rã-yũuda t'a sãad n wʋbdẽ.

¹⁵ Ezipt ka le tõe fɩ, a taoor dãmb ka le tõe fɩ, a poorẽ dãmb ka le tõe fɩ.

Ezipt baasgo sẽn na n yɩ-la

¹⁶ Badaare Ezipt rãmb na n diga rabeem wa pagba, b na yɛɛsame, b sã n wa yãend dũni fãa Wẽnde sẽn zẽk b nug bãmb zugu.

¹⁷ Zɩɩda soolma na n kẽesa Ezipt rãmb rabeem kãsenga, Ezipt rãmba na n saoo kalwaare, b sã tẽeg Zɩɩda yelle, b sã n tẽeg dũni fãa Wẽnd sẽn dat bãmba ne wẽng ningã.

¹⁸ Badaare tẽn-bɛd a nu n na n gom Ebre rãmb goama la b na n yik n wẽename tɩ b na n kẽe dũni fãa Wẽnde. Ir-Aeres, sãoong tẽnga, na n zĩnda sʋka.

¹⁹ Badaare b na n mee maan-kugri dũni fãa Wẽnd yĩnga, Ezipt tẽnsʋka. Ezipt toaagẽ me, b na vigla kugri, Soaala-Wẽnd yĩnga.

²⁰ Dẽ n na n kõ kaseto, dẽ n na n wilgi tɩ dũni fãa Wẽnd tara waoogdb Ezipt tẽnga. B sã n namsd-b tɩ kelem n tees Soaala-Wẽnde, b na tʋm-b fãagda, b na tʋm ned sẽn na n zab n sõng-ba tɩ b tɩlge.

²¹ Wẽnd na n lika b meng Ezipt rãmba la Ezipt rãmb me na n bãng-b lame. B na n waa ne b maand la b kũuni. B na n pʋlma Soaala-Wẽnde la b na pidsa b pʋlengo.

²² Ba Soaala-Wẽnd sã wa wẽ Ezipt rãmba, b na n sãoog-b lame. B na n pʋga Soaala-Wẽnde la Soaala-Wẽnd na n deega b kosgo la b fãag-ba.

²³ Badaare sor n na n yi Ezipt n dig Asiri tẽnga. Asʋr na n waa Ezipt tɩ Ezipt kẽng Asʋr. B fãa na n naaga taaba n waoog Soaala-Wẽnde.

²⁴ Badaare, a Israyɛl na n naaga Ezipt la Asʋr, tɩ bãmb b tãabã reeg kaseto tɩ b paama Wẽnd barka.

²⁵ Dũni fãa Wẽnd na n ning-b-la bark woto: «M ningda Ezipt, m buuda, barka. M ningda Asiri, m nus sẽn naana barka. M ningda m pʋɩɩr, a Israyɛl barka.»