A Ezayi 17 - SEBR SÕNGO

Damas la Israyɛl rĩunda rabda b lʋɩɩsẽ

¹ Ad Naaba-Wẽnd koɛɛg ne Damas: Yɩ bilfu Damas kõn le sõd tẽn-bɛda sʋk ye, a na n lebga raboogo.

² Tẽns niyns sẽn gũbg yẽ wã, ned kõn le kẽ bãmb me abada. B na n lebga rũms wãbneg zĩiga. Be la b na n vʋʋse la ned kõn dig-b ye.

³ A Efrayim lal-gũbrã na n lʋɩɩme. Damas naam na n sɛɛme. Aram kamb sẽn na n keese pa na n yɩɩg Israyɛl kamb ye. Yaa woto la dũni fãa Soaala gom yã.

⁴ Daar n wate t'a Israyɛl na n faage, a pʋʋra na n woogame.

⁵ Na n yɩɩ wala tigsg wakato tɩ b wʋrd alkam, la b rɩgsd kalse; na n yɩɩ wa tigsgu Refayitsa bãg-faagẽ,

⁶ sẽn kees yaa yiisgu rẽnna; na n yɩɩ wa oliv yagsgo: yiib bɩ tãab sẽn pa yĩngr-yĩngri; naas bɩ nu sẽn pa will poala zugu. Woto yaa Soaala-Wẽnde, a Israyɛl Wẽndã koɛɛga.

⁷ Badaare ninsaal na n gesa a Naanda, a na gesa a Israyɛl Nin-sõngã.

⁸ A kõn le ges maan-kuga sẽn yaa a nus tʋʋmde, a kõn le yãend a nus-bi piiga sẽn dõoge bɩ sẽn peese, wala a sẽn ka na n le ges raadã a sẽn peesã, la a wisda laase.

⁹ Badaare, soond-n-põs kũuma tẽnse na n lebga vɩɩdo, fãa na n lebga raboodo wala Amoritsa la Ivitsa tẽns sẽn lebg to-to, a Israyɛl kamba taoore. Na n yɩɩ we-raoogo.

¹⁰ Ade, Israyɛl, fo yĩma Soaala-Wẽnde, Wẽnd ninga sẽn fãaga fooma. Fo yĩma f pĩ-kɛgengã la lillã. Dẽ la f send tɩɩse n na n waoog f wẽnde la f bʋt f bʋdbo tẽn-zẽng wẽn-naands yĩnga.

¹¹ Fo sẽn bʋd-b daare la b wẽnegd n yi, la vẽkembeoogo b zoe n yaa puudu. F yaool n kõn dɩ f sẽn bʋda yõodo tɩ yel-beed sõor n puki, bũmb ka be sẽn na n tõog n tigsi la rẽ ka be tɩɩm ye.

Bɛɛba waoongo

¹² Ade, neb ka tɛk bʋʋr n sãte, bu-zẽmba bʋʋr n sãt wa mogr sũur sẽn puug bʋʋre, bu-zẽmba bʋʋre, mogr sũur sẽn yik bʋʋre.

¹³ Ade, neb ka tɛk bʋʋr n sãte, bu-zẽmba bʋʋr n sãt wa ko-kẽenga rẽnna. Mik Soaala-Wẽnd na n mooga b nifu, tɩ b kʋɩ tĩiga, n zãage, tɩ b yɩk wala sobgo sẽn dɩkd ka-fɩɩba sẽn yɛdg tãng zugu, tɩ b yɩk wala sɩlmand sẽn loogd ne bõn-faoogo.

¹⁴ Sẽn da yɛɛsd-b neb zaabrã, vẽega beoogo n kaẽ ye, sẽn zɛɛd-b tõndã yell na n yɩɩ woto, sẽn fãad-b tõndã yell baasda yoogo.