A Ezayi 16 - SEBR SÕNGO

Moab kota Zerizalɛɛm sõngre

¹ Moabitsa yeelame tɩ b zĩnd Sela, al zĩ-peen-daagẽ wã, n tool dĩma pe-bila, dĩm ning sẽn dɩta naam Siõ bi-pugla tãnga zugu.

² Yaa Arno kʋɩlga sẽn tõe n dʋʋg zĩig ningã la Moab pagba ra tigim taaba. B da yaa wa luiili b sẽn yɩk b tʋgdẽ, tɩ b sẽeg yaare.

³ Moabitsa ra kota Zerizalɛɛm woto: «D bõsda y saglgo, leok bũmb tɩ d kelge. Yɛdg f pãnga wa maasem n gũ tõnd wĩntoogo, la wala yʋngo tẽeg f likã n pil sẽn zoe-b n wa kẽ ka wã, da luk sẽn zoet-ba bãong ye.

⁴ Kõ sẽn waa n soond-b ka wã sore, tɩ b kell n pa f tẽngẽ. Sõng-b tɩ b põs sẽn data n kʋ-bã. La ned sã n wa ka le wẽoogd a to, pãn-tõoga sã n wa sɛ fãada sã n wa looge n bas tẽngã,

⁵ wakat kãnga, f nonglma yĩnga, naam zaoor la b na n le maneg n vigl zaoor sẽn tar pãnga, sẽn na n kaoos, a Daviid sɩmannẽ, a Daviid yagenga yĩnga. A na n yɩɩ bʋ-kaooda la bũmba fãa na n tũu sɩd la zemsgo.»

Zerizalɛɛm pa tõe fɩ a Moab yĩng ye

⁶ D mi-la a Moab wilg-m-mengã, a wilg-m-menga yaa wʋsgo. A tɩtaama la a wʋglma waooga, a pa gomd wa bũmb n be t'a pa tõe n maan ye.

⁷ Moab rãmb zĩime n tar waasgo. B fãa yɩɩnda b yɩɩlle, n tẽegd Kir-Erɛs rɩ-noodã sẽn da maan ne bugsuntung biisi. B sũur da zabda wʋsgo tɩ b wiisdẽ.

⁸ Ges-y yel-beedo! Esbõ pʋta sãamdame, pʋt sẽn da zao wa b lolomda tãnga. Sibma bugsuntunda kʋɩtame, bãmb rã-toosa n yaool n da lubd dũni wã soaalba. B ra yɛdgame n ta Yazɛr n tol n kõs weoogã n wa menem be, n tol n tão yagense n wa tãag Yamsem mogre.

⁹ Yaa rẽnna la m naag Yazɛr rãmba n yãbd Sibma bugsuntundu. M yãbd-y lame, Esbõ ne Eleale, tɩ m pa le wʋmd sũ-noog kaasgo, y bugsuntunda tõsb raar ye.

¹⁰ Sũ-noogo la kɩdengo buud fãa sɛɛ y bugsuntunda pʋtẽ. Rʋgd ka le tar rãam ye, sẽn wẽkd-b siba biis ka le tar tʋʋmd ye, b ka le kelemd n deesd taab ye.

¹¹ Yaa rẽ me yĩnga la m yɩɩn n kũmd a Moab wala ruudg sẽn kũmdi, m kũmda a Kir-Erɛs m sũurẽ.

¹² B na n le yãenda a Moab t'a le yẽrd n pʋgd a wẽn-naandsã, t'a le babsd-b tãmsa zutu, n yõkd b sɛɛga, la fɩ ka na n tek ye.

¹³ Woto n yɩ koɛɛg ninga Soaala-Wẽnd sẽn yiis a Moab poorẽ al daar zãra.

¹⁴ Ad-b sẽn yet dũnna: «Ka ne yʋʋm a tã muka, Moab ne a nin-tɩɩsã, ne a zãma wã, na n paama yãnde: sẽn na n kellã na yɩɩ bõn-mɛdga, bũmb sẽn ka sek sõadg ye.»