A Ezayi 15 - SEBR SÕNGO

B kelemda a Moab kʋʋre

¹ Soaala-Wẽnd koɛɛg ne a Moab. Yʋng ning b sẽn tõog-a wã ad-y Ar-Moab rãmb lebga sɩɩ. Ad-y yʋng ning b sẽn tõog-a wã, Kir-Moab me lebga sɩɩ.

² Dibõ neba kẽnga Wẽnd waoogra zĩ-sõngẽ n na n tɩ yãbe. Nebo tãnga zug la Mɛdeba, a Moab kelma kʋʋre. Zug fãa põngame, toɛɛng fãa wõrsame.

³ Neb sẽn yer sũ-pa-noang fuug la b ne tẽnsa pʋgẽ, la bɛɛnda zutu la raasẽ wã yaa kaasg bala la b wʋmda. Sẽn lebẽ fãa yaa nintãm.

⁴ Esbõ ne Eleale rãmb kotame tɩ b wa sõng-ba. Yãbra rãamd sãag n ta Yaas. Yaa rẽ la a Moab tar kaasgo, a pɛleng yɩkame, t'a yam bonnege.

⁵ M boondame tɩ b wa sõng a Moab. A neba zoe n digda Soar, la Eglat-Selisiya. B rʋʋda Luyit ne nintãm, Oronayim sor zugu b wiisdame.

⁶ Nimrim, koom zĩiga, lebga tẽn-koɛɛnga, tɩɩsa kʋɩɩme, mooda wãkame, mo-maas yãeeb lebga toogo, vã-maas ka le ket ye.

⁷ B sẽn da ket n tõe n sõng b mens ne bũmb ningã neba tall-a lame n kẽng taoore, b tall-a lame n dʋʋg tɩ-wogda kʋɩlga.

⁸ A Moab kɛlenga gilga tẽnga fãa n sege. A kɛlenga taa Eglayim, n ta Elim bulga.

⁹ Divõ kʋɩlga na n mooga ne zɩɩm. La Soaala-Wẽnd le paasame: «Sɩbgr n nan ket n wate: sẽn paam-ba n zoe n põse, a Moab kamba sʋka sẽn ka paam-b n zoe n põse, tẽnga pʋgẽ fãa na n yɩɩ bõnyẽeg dɩɩbo.»