A Ezayi 14 - SEBR SÕNGO

Pa-weer sɛɛme

¹ Ade, Soaala na n wilgame tɩ b nonga a Zakoob yagensã. B na n wilgame tɩ bãmb n yãk a Israyɛl. B na n le kẽesa b nebã b saam-dãmb tẽngẽ. Sãamba na n wa naaga ne bãmba, b na n fãooga ne a Zakoob buudu.

² Yaa bu-zẽmbã n na n sõng a Israyɛl t'a leb a tẽngẽ. La zĩig ning Soaala-Wẽnd sẽn yãk tɩ yaa b soolma, a Israyɛl na zã bu-zẽmb kãense wala yem-daado la yem-pogse. A pĩnd soaalba la a na n sooge, sẽn da paga yẽ roogã la a na n lɛɛg n pag roogo.

Babilon dĩma kʋʋr yɩɩlle

³ Ade, Israyɛl, Soaala-Wẽnd sã n le wa kõ-f laafi f pɛta la f nimbãanega poore, f yembda sẽn yɩ tooga poore,

⁴ fo na n pʋda yɩɩn-kãnga n la n kaas Babilon dĩma. Ges-y yel-bãnde! Dĩm toaaga wẽneg n baasa woto, sẽn da tara nebã n wẽoogdẽ wã baasa woto?

⁵ Soaala-Wẽnd kaooga nin-wẽng dasaare. B tõra dĩm toaaga naam dasaare.

⁶ Sɩda, rasaar n da pãbd buud a taabã dasaar sẽn ya zɩsgo la sẽn da pãbd n yɩlemnẽ. Babilon dĩma, foo n da wõrda, foo n da pãbd dĩmd dãmb a taab n ka tol n mi yaamsa bɩ?

⁷ Marsã dũni wã gill yaa n vʋʋsdame, laafi yaa n waame, la neba kaasda b sũ-noog kaasgo.

⁸ Tɩɩsa mens tara sũ-noogo. Wakat n zĩndi tɩ bãmb me ra tar toogo. Tɩ-bɛda naaga ne Libã kʋgsã n tãsdẽ: «Ad-b sẽn maan fo kʋʋr tɛka, b ka le wat n kɛɛd tõnd ye!»

⁹ Bʋg-tẽng me yika ne foo, rĩm toaagã. Ad-a sẽn wʋm f waoongã a neka a kɩɩmsa fãa, a neka sẽn yɩ-b rĩm bɛda, sẽn yɩ-b dũni wã soaalba, fãa yikame n yɛsẽ.

¹⁰ B fãa na n naaga taab n moone: «Õõ! Fo me pãnga sɛɛme, fo me yaa wa tõnd bala!»

¹¹ F naama busa tẽngr-tẽngre n naag ne f ruudsa rãamde. F gãaga yolgo yaa karen-tʋko, zũnzũi la f fu-goabga.

¹² Fo maana wãna n fare n lʋɩ, ka fo taoore la dũni wã ninsaalb da sur laa, tõd-beoog ãdga, puk tɩ zĩig yẽeg soaba? Ad-f sẽn gãe tẽnga, foom, sẽn da lubda dũni nanamse!

¹³ Ka foom n da yet f sũurẽ: «M na dʋʋ yĩngri n zʋʋg Wẽnd ãdse, m na n tɩ zaoonda tãnga wẽnd dãmba ne b kug-zĩidba tãnga, tãng sẽn lug nug goabg, yɩɩg yɩɩga.

¹⁴ M na n dʋʋ sawad-sabla zugu, maam ne yĩngri Soaala na n zenga taaba.»

¹⁵ Maana a wãn marsã tɩ f sigi n sig bʋg-tẽnga, bog-zulung pʋgã?

¹⁶ Be rãmba sẽn ne foom tɩ f watã kolgame n get-fo n ka kamsdẽ la b yetẽ: «Yaa rao-kanga n da rĩmsd tẽnga bɩ? Yẽ n da sikd dĩm dãmba b zaoorẽ wã bɩ?

¹⁷ Yaa yẽ n da tekd tẽnsa neng tɩ lebgd we-raada bi? N wãad rotã la a zãgsdẽ t'a kõn yiis a sẽn sui b rãmb rooga bɩ?»

¹⁸ N-ye! Dĩm dãmb a taaba paama b vʋʋsg zĩiga, b yaoogẽ,

¹⁹ Foom bala la b lob yɩnga, n ka paam yaoogo n kõ-fo, tɩ f rɩg wa pa-tare, wala bũmb sẽn ya waoosa, wala kũum b sẽn tabe. Neb sẽn ki la b rɩk n zam foom, bãmb fãa na n wa gãnega yaoogẽ,

²⁰ foom bala n ka na n yãag-ba, b yaada zĩigẽ, tɩ f wã-la f tẽnga, f raaga f soolma rãmb zɩɩm. Abada, b kõn le pʋd f buuda yʋ-yooga ye.

²¹ Bɩ b segl kamba kʋʋbo, b kʋ-b n dolb b ba rãmb tʋʋm wẽna, tɩ b me ra wa yik n le baood n na n soog dũni wã la b le me tẽns ye.

²² Dũni fãa Soaala le paasame: «M na yika zabre, la m na n menesa Babilon yʋʋre, fãa na n sɛɛme, a kõn le paam biiga tɩ b pa gomd yageng ye.

²³ Babilon na n lebga bãoogo la raond na-tẽnga. M na pɩɩsa Babilon ne saaga, ne saag sẽn menesd sagd zãnga.»

²⁴ Dũni fãa Soaala kãaba woto: «M sẽn sed bũmb ninga, n na n yalse, m sẽn yalsã n na n pidsi.

²⁵ M na n luba Asiri m tẽngẽ, m na n tab-a-la m tãmsa zutu. A ra kẽesa m nebã a yembdẽ, m na rig-a n menese; zɩɩb bɛd la a ra zɩlg m kamba, m na tus zɩɩb kãng n lubi.»

²⁶ Woto la Soaala yals dũni wã fãa yĩnga, woto me la b yet ãndũni rãmba tɩ b maan gũusgu.

²⁷ Dũni fãa Soaala sã n yals bũmbu, ãnda n tõe tɩ pa pidsi? B nug sã n zẽk n na n wẽ, ãnna n tõe tɩ wẽed ka wẽ?

Filisti rãmb tog n maana gũusgu

²⁸ Dĩma Akaz sẽn ki yʋʋmd ningã la Soaala yiis koe-kãnga.

²⁹ Yãmb fãa, Filisti rãmba, ad-y dasaar ning sẽn da tar n pãbd yãmba, dasaar kãng sã n kaooge, bɩ y ra yãg n kɩdem ye. Bãng tɩ b sã n kʋʋg wag-maasre a tobda põeere, la põeera na n lebga wag-bãnde sẽn yɩgd n kɛɛdẽ.

³⁰ Ad-y naong rãmba na n paama dɩɩb zĩiga, sẽn tar-b pɛta na n paama vʋʋsem la laafi. Sã n ya foo, Filisti, ad-f bɛ wã na n waa ne kom n sɛɛs f buuda zãnga, a na n kooda koma sẽn na n kees b rãmbã.

³¹ Yãmb fãa, tẽns sẽn tõe n zab n fãag y mense, naag-y taab n kelem Filisti kʋʋre, Filisti rãmb gĩin maagame tɩ b zĩ ne yɩɩre, tɩ b nee bug-zõos sẽn nukd nug goabga sẽnẽ. B nee tãb-biisa sẽn sũ taab gilli n watẽ.

³² Bõe la b na n leok Filisti rãmba? Leok-y-ba tɩ Soaala-Wẽnd mee Siõ; la nimbãan-dãmba na n zĩnda a pʋgẽ ne laafi.