A Ezayi 11 - SEBR SÕNGO

Daviid paalle

¹ A Zese tɩɩga na n tãoo will polle, tɩ-polle n na n tãoo a yẽgnẽ n yi.

² Soaala-Wẽnd na n kõ-a-la b meng Vʋʋsem sɩlem la yɛl-welgr yam, saglgo la sũ-keglem yam, bãngre la Wẽnd nif zoees yam.

³ Sɩda b na n wilg-a lame t'a zoe Soaala-Wẽnd nifu. A ka na n tũ a nif sẽn yãend ye, a ka na n tũ a tʋbr sẽn wʋme n kao bʋʋd ye.

⁴ M ba-ka-neng rãmb bʋʋd tũuda tɩrga, tẽnga naong-rãmb paamdame tɩ b bʋʋd tũud sɩda. A gomd lebga daasare t'a tar n pãbd nin-yoodo, a noor pemsem kʋʋd-b lame,

⁵ Zemsgo la a bob n kẽnda, a sɛɛg sẽbdg yaa pʋ-peelem.

⁶ Digd-n-yĩidga ne pe-bila na n vɩɩnda ne taaba, tɩ ãbg gãe n yeg bulla. Nag-bila la bõnyẽ-bila na n wãba bãoog a ye la yaa bi-bilfu n kɩɩmd-ba.

⁷ Nag-yãanga la katre rɩɩb na n yɩ-la a ye tɩ b kamb sõsd maasem yɛnga. Bõnyẽeg na n wãba yamdo wala naafo.

⁸ Yãag reemda ruruug bok noore, a na n dɩka a nugu n ning boosr bokẽ.

⁹ Wẽng buud ka le tʋmde, sãoong buud ka le sãamd Soaala tãn-sõnga zug ye; tẽnga pida zãng marsã ne Wẽnd bãngre wa mogr sẽn pid ne koom.

Pa-weta na n lɛɛg n waame

¹⁰ Wakat n wate t'a Zese yagenga na n lebg wa tãb-kaoore ninsaalb fãa yĩnga la a na n pida ne ziiri.

¹¹ Wakat n wate tɩ Soaala na le zẽk b nugu n fãag b buuda sẽn kellã, sẽn kees-b Asiri la Ezipt, sẽn be-b Patros, Kus, Elam, Sinear, Amat la mogra tẽnsʋk tẽnsã.

¹² Tãb-kaoor n na n zẽk neba fãa yĩnga tɩ Israyɛl pa-weta fãa na n yi ween-vɩɩs a naasã n lɛɛg n wa tigim Zɩɩda.

¹³ A Efrayim Zab-taasma la a zoe-bõna na n sɛɛme, a Zɩɩda bɛɛba na n menesa zãnga, a kõn le zab ne a Efrayim ye.

¹⁴ B na n naaga taaba n kaoog zabre ne nin-taoor dãmba, ne Filisti rãmba; b na n naaga taaba n tɩ zɛ yaang rãmbã. B kams na n tẽega a Edom la Moab zugu la Amon kambã n na n lebg b soolma neba.

¹⁵ Wẽnd na n kʋɩɩsa Rudum mogre. B na n tẽega b nugu Efrat kʋɩlga zugu, b na fʋʋsa a kooma ne b noor pemsem la a na weela nao a yopoe, la b na n dʋʋg-a lame tɩ neooda pa woob ye.

¹⁶ Woto, buuda sẽn kellã, sẽn da paa a Asʋr nugẽ, na n tũu sore sẽn ya naana wala Israyɛl sẽn paam sor ninga a sẽn waa n yit Ezipt tẽnga.