A Ezayi 10 - SEBR SÕNGO

Sẽn wat ne Wẽnd sũ-puuri

¹ Neb niyns sẽn kõt-b noya sẽn pa segde la sẽn gʋlsd-b sɛb sẽn pa sɛba, yell be-la b rãmb zugu.

² Bãmb n mumd naong rãmb noore tɩ b pa tõe n wilg b sẽn dat ye, bãmb n kɩt tɩ buuda naong rãmb dɩt bõne. Bãmb n fãad pʋg-kõapa la b zɛɛd kɩɩb-bi.

³ La y na n maana bõe n põse, Soaala sɩbgr la tẽn-kũuma raarã? Y na n zoe n kẽnga yɛɛnẽ n paam n tɩlge? La ãnda meng la y na gũnug y paoongã?

⁴ Paka y sulg n deeg y yembd wĩiri, keta y naag sẽn ki-bã n looge. Soaala sũ-puur ket n pʋgda y fãa gilli, b nug ket n zẽkame n na n wẽ.

Asiri konga wʋsgo

⁵ Yell be la f zugu, Asʋr, foom la m sũ-puura zãande la a guugu.

⁶ Maam n tʋm Asiri, nin-wẽnsa sʋka, Maam n kõ-a noore t'a zab ne sẽn da yikd-b mam sũurã, n kõ-a noore t'a fã la a zɛ b laoga gilli, la a fẽd b mensã wa sor zug begdo.

⁷ Mik pa wa Asiri yamẽ tɩ maam n tʋm-a ye; a tagsga yaa toore, a baoodame n na n sãam la a menes buud a taaba wala a sẽn tõe tɛka.

⁸ A waa n yeta a meng woto: «M tãnsoaben-dãmb sẽn tar naam ninga ka yɩɩd dĩm dãmba rẽn sɩda?

⁹ M ka maana ne Kalno tẽnga wala m sẽn maan ne Karkemis bɩ bõe? Yaa Amat la m pa sɩbge wa m sẽn sɩbg a Arpad bɩ bõe? La m pa sɩbga Samari wa m sẽn sɩbg Damas bɩ bõe?

¹⁰ M nug wãa rĩundu, sẽn da waoogd wẽn-naandse, - b wẽn-naandsa togsenda sõor da yɩɩda Zerizalɛɛm la Samari rẽnda, -

da yɩɩda Zerizalɛɛm la Samari rẽnda, -

¹¹ bõe tɩ m pa na n maan ne Zerizalɛɛm wẽn-naandsã wala m sẽn maan ne Samari rẽnna. M ka tõeeme bɩ bõe?»

¹² Soaala sã n wa sɛ b tʋʋma Siõ tãnga zug la Zerizalɛɛm, b na sɩbga a Asʋr, t'a sũur pida ne zẽk-m-menga, la a pa get wa ned toga ne waoogr ye.

¹³ Bãng-y t'a yetame: M nug n tʋm a pãng tʋʋma, m yam n tʋm a yam tʋʋma. M sɩlma yɩɩda m taab rẽnna. M vigsa nanams toose n loog neb arzɛka, la wala gãndaoogo, m sik-b-la b naama goeels zugu.

¹⁴ M nug wʋka tẽnsã arzɛgse wala gɛl sẽn be tʋkẽ; m wʋk-b-la naana-naana, la pɩgs pa laal m zugu, noor pa yaag n kelem ye.

¹⁵ La Soaala-Wẽnd n sokde: Ned na zẽk lare n na n pees bũmbu, tɩ lara lɛɛg n wukd a menga? Ned na kɩ a sʋʋg yẽna n na n wãag bũmbu t'a tãoosd daood wala a wãada a toore? Yaa wala dasaarã n yuumd sẽn yuumda yẽ wã, bɩ kukurã n zẽkd sẽn zẽka yẽ wã.

¹⁶ Dẽ n so tɩ bũmb fãa Wẽndã, dũni fãa Soaala na n kɩt tɩ sẽn tar-b arzɛka fãa Asiri tẽng na n lebga naong rãmba. B sẽn pɩnd ne neerem ninga na n yɩɩ bugum dɩɩbo.

¹⁷ Soaala-Wẽnde, a Israyɛl vẽenema, na n lebga bugum; a Israyɛl Soaala na n lebga bug-witem n dɩ tʋga la gõosa daar a yembre bala.

¹⁸ Kãoonga maasem, zẽeda bʋgsem, neba fãa sẽn pẽgdã, rẽ fãa na n sɛɛ zãnga; yita wa bãada, kũum sẽn loogd ne.

¹⁹ Tɩɩs niyns sẽn na n põs-ba b sõor na yɩɩ bilfu, põadg meng tõe n sõd-b lame.

A Israyɛl bu-kelle

²⁰ Badaar tɛka a Israyɛl la a Zakoob zakẽ dãmba sẽn paam-ba n põsã, b yam na n laka ne Asiri sẽn da zãad-b toogã. Yaa Soaala-Wẽnde, a Israyɛl Nin-sõngã nengẽ la b na n bao sõngre.

²¹ Bilfra sẽn põs a Zakoob zakẽ wã na n lɛɛg n kẽe Pãng soaba Wẽnde.

A Israyɛl sãoongo

²² Ade, Israyɛl, ba fo kamba sõor da taẽ bĩisri sẽn sam mogr noore, yaa bilfr bala n na n lɛɛg n wa kẽ Soaala-Wẽnde. Buuda wãab yals n sɛɛme. Sẽn tog la sẽn zems la d na n maane.

²³ Bũmb fãa Soaala-Wẽnda na n waa ne sãoong ning b sẽn kãabe.

Da zoe-y Asiri rabeem ye

²⁴ Ne rẽ fãa, Soaala-Wẽndã, dũni fãa Soaalã gomda woto: «M buuda sẽn kẽed Siõ, da zoe a Asʋr sẽn pãbd-f ne guugu la zãande, wala f sẽn yãend Ezipt tẽnga ye.

²⁵ Kõn le kaoos tɩ m sũura maag ye. La yaa ne bãmb marsã la m na n pa, n kʋ-b zãnga.»

²⁶ Wẽnd na n pãba Asiri rãmba ne kaase wala b sẽn maan ne a Madiã, Orɛb tãnga zugu, b na n zẽka b dasaare n va sẽn be-b mogra sẽnẽ, wala b sẽn maan ne Ezipt.

²⁷ Badaar tɛka, f bãgd na tɩlg ne zɩɩbo, f zug na vʋʋs ne tʋkre. Raoog ning sẽn palgd nag-koodsa yublã na n yãkame n lob yɩɩg-yɩɩga.

Bɛ wã tata Zerizalɛɛm

²⁸ Bɛ wã rʋʋda Samari a tata Ayat, n pɩʋʋgd Migrõ, n wat Mikmas n bĩngd a teeda be.

²⁹ Bɛ wã wẽdga so-sẽka n ta Geva, n yeele: «D gãand ka. Rama rãmb gãeeme n digda, tɩ Gibea rãmb ning tĩiga, t'a Sol tẽng rãmb sɩng zoeese.

³⁰ Kelem-y-yã, Bat-Galim dãmba, wẽ-y no-bɩnga. Layisa rãmba modg-y ne kelgre, Anatot rãmba, sak-y boole!»

³¹ Madmena rãmb zoetame, tɩ Gebim dãmb baood zĩig n soondẽ.

³² Baraar bala, bɛ wã taa Nob n yals be, n zẽk a nug gilgu n na n yeel Siõ, la a yeel Zerizalɛɛm tɩ b maan gũusgu.

³³ Mik bũmb fãa Soaala, dũni fãa Naanda na n tusa tɩɩsa wil n lub ne pãnga; tɩ-wogda fãa rʋʋgame, b fãa rʋʋgame.

³⁴ Googa tɩɩse, lar n lub-b fãa gilli. Libã kʋgsa ne b rasãndlma dʋra tẽnga.