A Ezayi 1 - SEBR SÕNGO

Sɩngre

¹ Ad-a Amos biiga, a Izayi, sẽn yãende. Yaa yɛl niyns fãa sẽn na n pak Zɩɩda la Zerizalɛɛm. A yãend-b-la a Zɩɩda dĩm dãmba, a Oziyas, a Zotam, a Akaz la a Ezekiyas wẽnnẽ.

A Israyɛl yaa zɩta

² Soaala-Wẽnd n gomde: Bɩ yĩngr dãmb kelge, tɩ tẽng zug rãmb yoog b tʋba: M yɩta a wãna n wub m kamba, tɩ b tol n bɩ, n wa rat n yi m soolmẽ?

³ Naaf ka yãet a zu-soab n kong ye, bõang me ka kongd a gãag zĩiga, a zu-soab zakẽ ye. A Israyɛl bala n ka mi fɩ, m buuda yam bal n ka weke.

Zɩɩda tẽng sɩbgre

⁴ Bʋk ne foo, bʋk ne foo, yel-wẽn-maandb tẽnga! Fo neba yaa neb sẽn pid ne wẽnem, yaa bi-bees buudu, yaa buud sẽn sãame. B basa Soaala-Wẽnde, b paooga a Israyɛl Nin-sõngo, b wẽnemda b kãare n tees bãmba.

⁵ Y sẽn ket n zãgsd bãmbã, yɛ la b na n le tõog n wẽ yã? Zuga fãa zoe n yaa noada, sũura pãng sɛɛ zãnga.

⁶ Sẽn yi zug tẽnsʋka n wat nao wã, zĩig ka le beẽ n ka sãmpogr ye. Yĩngã bugame, n meede, n feebe, fãa yaa noada, la b ka bãn kaam, b ka vil peend ye.

⁷ Y tẽnga fãa lebga we-raoogo, y zagsa fãa yõoga bugum, la ad tẽn-zẽng rãmba sẽn sãamd y pʋto tɩ y zĩi n getẽ.

⁸ Zerizalɛɛm lebga wala pʋʋg-roogo, wala niir pʋ-wɛɛgẽ ro-zaoko, wala tẽnga, bɛɛb sẽn gũbgi.

⁹ Ad-y Soaala-Wẽnd sã n da pa sʋkẽ neb kẽere, n base tõnd yaẽ la wala Sodom, tõnd yaẽ la wala Gomor.

Waoogr ning Soaala-Wẽnd sẽn pa rate

¹⁰ Yãmba, taoor dãmba, nin-wẽns wa Sodom dãmba, kelg-y Wẽnd koɛɛga! Nin-wẽns wa Gomor dãmba, wʋm-y Wẽnd saglgo!

¹¹ Yãmb maandã, ne b ya ka tɛkã, b maanda maam bõe? Yaa Wẽnd n gomda. M yam yii ne y piisi sẽn kãbd bugmẽ, la ne y nag-bi nobdsa kaam. Y lolsa la y boeesa zɩɩm, m pa le rat ye.

¹² Y wata m taoore, la ãnda n kos-y tɩ y kẽ m zakẽ?

¹³ Vʋʋs-y ne y kũun yoodã, ad-b ka tar yõod ye. Y pa ne tɩ y b bug-zõosã ka tat m yam! Vʋʋs-y ne y kibs rãmbã, kiu-paalle, tig-raase, vʋʋsg daare. Y kibs bɛd la bõonese, fãa lebga m sɩ-lakre tɩ b naaga ne yel-wẽna.

¹⁴ Tigr ninga fãa y sẽn maande, y kibs buud fãa, m yɛɛ ne bãmba, b lebga zɩɩb ne-ma.

¹⁵ Yãmb zẽkda y nusi n na n pʋʋs maam, tɩ mam wẽneg m nenga. Y pʋʋsga sã n pʋʋsdẽ n ka yɛɛdẽ me, ad-y mam ka le kelgd ye. Y nusa mooga ne zɩɩm.

¹⁶ Pek-y y mense, yɩlg-y y mense, zãag-y y wẽnema ne maam, vʋʋs-y ne wẽng maanego.

¹⁷ Zãms-y neer maanego, bao-y zemsgo, zãag-y sẽn dat-ba n maan pãnga; zoe-y kɩɩb nimbãanega, da bas-y tɩ b zãmb pʋg-kõor ye.

Da pa-y ne y wẽnema ye

¹⁸ Soaala-Wẽnd meng n yete: Wã-y tɩ d yẽse, ad-y y yel-wẽna sã moos wa zɩɩm, m tõe tɩ b pelg wa goore, b moos wa nufa, m tõe tɩ b pelg wa lamdo.

¹⁹ Y sã n sɩng m noora reegre, y na rɩ y tẽnga yõodo.

²⁰ Y sã n yet tɩ y kõn sulg y zugu, sʋʋg n na n dɩ yã. Maam a Naaba-Wẽnd n yeele.

Zerizalɛɛm pekre

²¹ M tẽn-sõnga maana a wãna n wa rɩk pʋg-yoodr zʋgo? A Siõ da yaa tẽng sẽn nong sɩda, n da baood zemsgo, la marsã a pida ne nin-kʋʋre.

²² Zerizalɛɛm, ges f sẽn lebge, ad fo wẽnda wanzurf sẽn kalem ne rẽgdo, n wẽnd rã-toos sẽn pul koom.

²³ F nanamsa ka le tũud maam ye, b yõga zoodo ne wagda. B sẽn nong la ligd bala. Kɩɩb la pʋg-kõore kõn paam sõngre b bʋʋd zĩigẽ ye.

²⁴ Yaa rẽ me yĩnga - yaa Soaala-Wẽnd Pãng soabã n gomde, a Israyɛl Wẽndã n gomde: M na tõog m bɛɛbã, m na rok m sũur ne-ba.

²⁵ Zerizalɛɛm, m na n zaba ne-fo, m na n los-f-la boaagẽ, n yiis f namdã, n pek f rẽgda fãa ne safãnde tɩ f lebg yɩlemde.

²⁶ Sẽn bʋʋd-b bʋʋda na n le paama pĩnd dãmba zʋgo, sẽn sagend-ba na n le rɩka pĩnd dãmba nao. Fo na n deega yʋ-paalle: Zemsg tẽnga, Ka mi zãmb tẽnga.

²⁷ A Siõ na paam fãagre a sã n lebg sɩd-baooda, a kamba sã n tuub n baood zemsgo.

²⁸ Sẽn ka sak-bã la yel-wẽn-maandbã, b na n dɩka b zutã n wẽ taaba n sẽege, sẽn bas-b Soaala-Wẽnd na n kiime.

²⁹ N-ye! Yãnd na yõk yã, y sẽn da maand bũmb niyns y tɩɩsa tẽngrã na n waa ne y yãnde, y maand yooda sẽn da kʋʋd y tɩɩsa tẽngrã na n kɩtame tɩ y zug sulgi.

³⁰ Y na n wẽnega wa tɩɩse sẽn ka le tar vãad ye n wẽneg wa zẽed tɩɩs sẽn ka le tar koom ye.

³¹ Tẽnga ned fãa sẽn pid ne pãnga na n lebga gʋmdo, t'a tʋʋm yooda lebg bug-pãrga, tɩ b fãa naag taab n yõk bugum, la bugma kõn yãend ned sẽn na n kiis-a ye.