A Amoose 6 - SEBR SÕNGO

Da belg-y y mens ye

¹ M yãbd yã, yãmb fãa sẽn teeg-b Siõ taoor dãmbã n gãe n ka bʋʋdẽ. M yãbd yã, yãmb fãa sẽn teeg Samari tãngã. M yãbd-y lame dũni wã na-tẽng a Israyɛl kẽedba, sẽn ya-b taoor dãmbã tɩ neba fãa bʋʋgd-y n gomda:

² «Ta-y Kalne n tɩ gese, y yi be bɩ y ta Amat, tẽn-kãsengã; y sã n yi be bɩ y sig Gat sẽn be Filisti rãmb tẽngẽ. Kẽng-y n ti ges tẽns sẽn pid tẽnse!» Ay! Y kẽng yã y na mik tɩ tẽn-bãmb pa são Siõ, b pa são Samari ye. B tẽnsa pa yalem n yɩɩd ye.

³ Yãmb datame n tadg Naaba-Wẽnd daarã, n yaool n pidsd y zamaana ne pãn-tõogo?

⁴ Y gãee gãas zutu sẽn maneg n pɛ ne wob yẽnna, n gãe loga, n dɩt pe-bi sẽn tũus wubrẽ la nag-bi sẽn tũus bãgrẽ.

⁵ Y yɩɩnda ne y pãng fãa la ne bɛɛla. Y togsda a Daviid n wat ne yʋʋm te-paala.

⁶ Y yũuda rãam wanzurf la-yalems pʋsẽ la y sõod y mens ne ka-noodo tɩ y sũur yaool n pa kiuusd ne yel-beed ning sẽn na n lʋɩ a Zozɛf buuda zuga ye.

⁷ Rẽ n so marsã tɩ m na n wilg yã tɩ yãmb n na n yɩ pipi rãmba n loog pa-weere. Bãng-y yã, kʋɩɩm dãmba, tɩ kibs kõn le zĩnd y yĩng ye.

Samari sãoongo

⁸ Maam, dũni fãa Wẽndã, n yet woto: «M wẽenda ne m menga, t'a Israyɛl wilg-m-menga laka m yam, m yam laka ne a ro-neebã. M na n basa bɛɛba nugẽ bũmb ning fãa sẽn be Samari pʋgẽ, a Israyɛl na-tẽnga pʋgẽ.»

⁹ Neb piig kõn kell vɩɩse zak a ye pʋgẽ ye.

¹⁰ B na n modga sẽn ki-ba roagd a ye t'a sa roog-roogo n yiis kũuma. A sã n ta yaoolem dooga tɩ nin-vɩɩg ket be n sok-a: «Ned keta ne foo bɩ?» A na leok tɩ sɛɛme la a na le paase: «Bas bʋur tɩ ned sẽn tõe n yõk Wẽnd sɛɛg ka ket ye.»

¹¹ Yaa Soaala raab la woto tɩ ro-bedr lʋɩ la ro-bil me tãs mugnum.

Yĩm-y y pĩnd daoodo

¹² Weef zoeta pĩis zut bɩ? Bɩ b warda pĩisa ne nag-koodse? Yaa bõe marsã tɩ yãmb tek zemsg t'a lebg pĩ-zẽnem sẽn wat ne kũum, n tek bõn-sɩɩd t'a lebg toog lig-ligi?

¹³ Yãmb noogda y sũur ne y sẽn tõog Lo-Debar tẽn-yaalgã. Y yetame: «Yaa d sẽn tar pãnga yĩnga la d tõog Karnayim sẽn ya pãng a narã.»

¹⁴ Boto! Ad maam, Naaba-Wẽnd, dũni fãa Soaala, m na n yiisa tẽng a ye t'a nams yã, Israyɛl, al Lebo-Amat noorẽ n tɩ tãag Araba kʋɩlgã. Soaala-Wẽnd n yeele.