A Amoose 5 - SEBR SÕNGO

Israyɛl zu-bʋko

¹ Israyɛl, kelg gomdã m sẽn na n togse, yaa kʋʋr yɩɩlle la m pʋta, yɩɩll la m pʋt f yĩnga, Israyɛl!

² A Israyɛl lʋɩɩme, a kõn le yik ye, a Israyɛl gãee tẽnga la a meng tẽngẽ a kõn paam tɩ ned wa yik-a ye.

³ Soaala koɛɛg la woto: «Tẽng ninga sẽn tõe n kẽes tãpo tãb-biis tusri tãb-biis koabg bal n na n kelle. Tẽng ninga sẽn tõe n kẽes tãpo tãb-biis koabga, tãb-biis piig bal n na n kelle a Israyɛl doogẽ.»

Teem-y zʋgo

⁴ Woto la Wẽnd gomd ne a Israyɛl: «Bao-y maam tɩ y na vɩɩnde. Sok-y-ma tɩ m leok yã.

⁵ Ka Betɛl wẽnd doogẽ wã la y na n wa sok-m bũmb ye. Da kẽng-y Gilgal ye. Da tɩ gilg-y Beerseba rooga ye. M leokda Gilgal poorẽ t'a na n looga pa-weere. M leokda Betɛl poorẽ t'a na n lebga wẽnem tẽnga.»

⁶ Zozɛf roogo, bao-y Soaala-Wẽnde, bao-y-ba tɩ y na vɩɩnde. Sã n ka boto b bugma na n yõog-y lame. Betɛl na n yõka bugum la ned kõn waa n kiis-a ye.

⁷ Bʋʋda sẽn kaood marsã wã ka le tat ned ba a ye yam ye. Sẽn tar-b bʋʋma la b fabgd tẽnga.

⁸ Yaa Soaala-Wẽnd n naan toadga, n maan susi, n maan yĩngr tãb-biiga. Bãmb n tedgd lika tɩ lebg vẽenem yibeoogo, bãmb n sobd daara tɩ yʋng watẽ. Bãmb n takd mogra koom n yɛdgd-a tẽng zugu. Ad-y bãmb yʋʋre la Soaala-Wẽnde.

⁹ Naaba-Wẽnd saaga yãgdame n lubd nin-daoogo, b saaga sʋʋg wata ne tãnsoben-dooga wãabo.

Soaala Wẽnd teesda b gobre

¹⁰ Bʋʋd zĩigẽ y sũura fõta ne sẽn baooda zemsgo. Y sẽn kis wa fãa-fãa yaa kaset soab sẽn togsd sɩda.

¹¹ Ade, yãmb sẽn namsd pãng-kaoolg soaba la y fãad a koodã, ade, zãmb rãmba, y sẽn pees kug n me rot niynsã, y kõn kẽ b pʋsẽ ye. Bugsuntundã y sẽn selã, y kõn yũ b rãam ye.

¹² Maam, Naaba-Wẽnde, n yete, ad-y m mi-la y tʋʋma fãa, m mii b wẽnema zãnga. Yãmb bɛ la ned ninga sẽn ka tʋk yell a zugu n ya nin-tɩrga. Yãmb deegda ligdi n kedbd bʋʋdo. Yãmb pa sakd tɩ b kõ naong soab bʋʋm ye.

¹³ Zamaana lebga yel-beed zamaana. Marsã ned kam fãa mumda a noore.

Saglgo

¹⁴ Bao-y sẽn be neere la y kisg wẽnga n tõog n vɩɩnde tɩ Naaba-Wẽnde, dũni fãa Wẽndã, zĩnd ne yã wa y sẽn yetã.

¹⁵ Kisg-y wẽnga, nong-y neere, maan-y zemsg tʋʋma tɩ daar ninga Soaala-Wẽnd, Pãng rãmb Wẽnd, na zoe a Zozɛf bu-kellã nimbãanega.

Sɩbgr pẽeme

¹⁶ Soaala-Wẽnd, Pãng rãmb Wẽndã yeta woto: «Zĩis fãa na yɩ kɛleng woo kɛlenga! Wii, wii! Soya fãa zut b na n yeelame: ‹M ba woo! M ma woo!› B na n dooga koaada, n bool kʋ-yãbdba tɩ b wa yãb b yãbrã.

¹⁷ Pʋtẽ wã, bugsuntundẽ wã na n yɩɩ kũnkũm, m sã n wa tũud bãmb sʋk n loogdẽ. Maam, Naaba-Wẽnde, n yete.»

Fãagr daare

¹⁸ M yãbd neb niyns sẽn gũud Soaala raarã. Yaa bõe la raara na n wa kõ yã? Na yɩ sũ-noog sẽn ka naag ne sãmbs bɩ? Ayo, raara na n yɩɩ lik raare.

¹⁹ Na n yɩɩ wa ned sẽn zoet gɩgemde n tɩ ling gɩgem-padre. Ned sẽn kẽed a zakẽ n tik a roog lalga tɩ waaf kɛ-a.

²⁰ Wẽnd daarã kõn yɩ lika, a na yɩ vẽenem sɩda? A na n yɩɩ lik tam, vẽenem kõn tol n zĩnd baraar ye.

Tũudma ka zems ye

²¹ Mam kisa y tẽnsa gilgri, m pa rat n le yãend-y ye. Yaa Soaala n gomd boto. Y sẽn tigimd taab m waoogr yĩnga ka le tat m yam ye.

²² Y sẽn wat n kõt maam y yũ-nood maandã, y kooda kũuna, ad-y m ka le rat-b ye; y rũm-kaama, y nag-bi nobdsã, lagem taab rɩɩbã, mam ka get-b ye.

²³ Serg-y ne y yɩɩlã, m da le wʋm y bɛɛla wẽeb ye.

²⁴ Sõng-y tɩ ned kam fãa paam a sẽn tog n paam tɩ zemsg na tãoos wa ko-bunem.

²⁵ Israyɛl, m sok n gese, yʋʋm pis-naas y sẽn zĩnd zĩ-pɛɛlẽ wã, yãmb kʋʋ maand n kõ maam bɩ?

²⁶ Y ra ka pʋgd wala y sẽn pʋgd dũnna a Sakut la a Kewã ye. Wẽn-bãmb yaa yãmb n yaool n dõoge. Bãng-y tɩ y na tʋk-ba n looge,

²⁷ m sã n wa dig-y n tees Damas tɩ y tɩ y tɩ pa yembd be. Soaala-Wẽnde, dũni fãa Soaala n yet boto.