A Amoose 2 - SEBR SÕNGO

Moab bʋʋdo

¹ Ad Soaala-Wẽnd sẽn yete: «Moab tʋʋm beeda labsa la a ye n yɩɩd ne wẽnem: Moab rãmb yõoga Edom dĩma kõab bugum n maan goore. Woto wã m kõn lebs m zelemd ye.

² M na n sika bugum Moab zugu t'a rɩ Keriyot ro-neebã. A Moab na n paame; na n yɩɩ zabr daare, tɩ zab-zabdba kaasdẽ, tɩ barda peebdẽ.

³ M na n menesa b rĩma, m na n naaga na-komsã n kʋ.» Yaa Soaala-Wẽnd n gomd boto.

Zɩɩda bʋʋdo

⁴ Ad Soaala-Wẽnd sẽn yete: «Zɩɩda tʋʋm beeda labsa la a ye n yɩɩd ne wẽnem: Zɩɩda rãmb pa reeg m zãmsg ye, b pa reeg m noya ye, b basame tɩ wẽn-naandsa kẽes-b moogo, wala b yaab rãmba. Woto wã m kõn lebs m zelemd ye,

⁵ m na n sika bugum a Zɩɩda zugu t'a rɩ Zerizalɛɛm ro-neebã.»

Israyɛl bʋʋdo

⁶ Ad Soaala-Wẽnd sẽn yete: «Israyɛl tʋʋm beeda labsa. La m sẽn yet tɩ m na n sɩbg-a lame wã, m na sɩbg-a. Ad a tʋʋm beed niyns sẽn yɩɩd ne wẽnema: Israyɛl kamb koosda nin-tɩrse n baood ligdi; b koosda a ka-neng rãmba n na n yao b neooda sẽn da, tɩ ligd paooge.

⁷ B nong n paooga naong rãmba. Bʋʋd zĩigẽ a kõn paam bʋʋm ye. Biig ne a ba dooda bi-pugla a ye tɩ m yʋʋr tũud rẽ n sãamnẽ.

⁸ B sẽn gãe wẽnd dotẽ ne fut niynsã, yaa naong rãmba sẽn kɩs-b bobelle. B wẽn-naandsa roogẽ, b sẽn yũud rãam ningã, yaa b sẽn yõg n deese.

⁹ La mam n yaool n da sõng yãmba n wã Amoritsã n kõ yãmba. Da yaa nin-daado, wogd wa gʋmse, kegemse wa pusga. M sãam-b-la zãnga.

¹⁰ Maam n deng n yiis-y Ezipt tẽnga, n kogl-y yʋʋm pis-naas we-raoogẽ n tãag y sẽn waa n tõog Amoritsã.

¹¹ Dẽ sẽn looge, maam n tũus bãngdba y kamba sʋka la m boola yãmb kamb kẽere tɩ b pʋlem la b welg toor mam yĩnga. Ka yɩ boto sɩda, Israyɛl kamba? Maam, Naaba-Wẽnd, n sokde.

¹² Bõe marsã tɩ yãmb yũnugd rã-toose mam sẽn welg b rãmb toore n kõ m mengã, bõe tɩ y gɩdgd bãngdba tɩ b ra taas-y m koeese.

¹³ Y sɩbgra la woto: m na beds-y-la tẽngã wala bilim-bilm gʋl sẽn bedsd moodo.

¹⁴ Sẽn tar-b tĩig kõn tõog n zoe n paam soondg zĩig ye. Sẽn tar-b pãng kõn tõog n wilg b pãng ye. Gãndaoog kõn tõog n fãag a meng ye.

¹⁵ Tãp soab kõn yals ye. Sẽn tõe-a zoees kõn põs ye. Wed-dʋʋd kõn fãag a yõor ye.

¹⁶ Baraare, tãb-biisa gãndaoog na lob a zab-teedo n bas n wudgi.» Naaba-Wẽnd n yet rẽnna.