A Amoose 1 - SEBR SÕNGO

Sebra tʋɩɩsgo

¹ A Amos koeese. A Amos yaa Tekoa dao a ye sẽn da gʋʋnd rũmsi. Yaa vẽnegre la a paam a Israyɛl poorẽ, Zɩɩda dĩm a Oziyas wẽnnẽ. Sã n ya Israyɛl tẽn-peelmẽ yɩɩ dĩm a Zowas biiga, a Zeroboam wakatẽ, tẽnga miuung ket tɩ yʋʋm a yi.

² A Amos ra yetame: «Naaba-Wẽnd rãamd n yit Siõ, Naaba-Wẽnd koɛɛg n sãt Zerizalɛɛm. Rũmsa wãbneg zĩisẽ yaa sũ-sãanga, Karmɛl tãnga zugu yaa ware.»

A Israyɛl yags bʋʋdo: Damas rãmba

³ Ad Soaala-Wẽnd sẽn yete: «Damas tʋʋm beeda labsa la a ye n yɩɩd ne wẽnem: Damas rãmb rɩka b sẽn tar bũmb ning n leebdẽ la b bʋkd b pʋta kaalem, bũmb sẽn kud ne kutu, n leeb la b tab Galaad tẽng rãmba. Woto m kõn lebs m zelemd ye la m na sɩbg-b wa m sẽn da yeele.

⁴ M na n tugla bugum dĩma Azayɛl zakẽ la a na n dɩ-la a Ben-Adad na-yirã.

⁵ M na n kaoo Damas kʋɩlensã bãn-sogdse. Bikeyat-Avɛn, m na n sika tẽnga, dĩm ning sẽn zao-a rẽgda naama goeel zugu, la Bɛt-Eden, sũ-noog tẽngẽ, m na n sika sẽn zãad-a naama dasaarã. M na n wʋka Aram neba n kẽng yembdo al Kir tẽnga.» Soaala-Wẽnd n gomd woto.

Gaza rãmba bʋʋdo

⁶ Ad Soaala-Wẽnd sẽn yete: «Gaza tʋʋm-beeda labsa la a ye n yɩɩd ne wẽnem: Gaza rãmb talla tẽns wʋsg neba n kẽng pa-weer Edom. M kõn lebs m zelemd ye, b na n deega b sɩbgre.

⁷ M na n sika bugum Gaza la bugma na n dɩ-la a ro-neebã.

⁸ M na n menesa Asdod dãmba, n menes Askalõ dĩma. M ka na n vʋʋs ne Ekrõ rãmba, m kõn kees nin-vɩɩg Filisti rãmba tẽngẽ ye.» Soaala n le gomd boto.

Tir dãmba bʋʋdo

⁹ Ad Soaala-Wẽnd sẽn yete: «Tir tʋʋm beeda labsa la a ye n yɩɩd a taab ne wẽnem: Tir dãmba kãsga zooda wĩir sẽn da loe bãmb ne b saam-biig a Israyɛl la b wʋka tẽns wʋsg neba n kẽng pa-weer Edom. M kõn lebs m zelemd ye, m na n sɩbg-b lame wa m sẽn da yalse.

¹⁰ M na sik bugum Tir la bugma na n dɩ-la a ro-neebã.»

Edom dãmba bʋʋdo

¹¹ Ad Soaala-Wẽnd sẽn yete. «Edom tʋʋm beeda labsa la a ye n yɩɩd ne wẽnem: Edom dãmb wõoga b sʋʋse n pʋg b saam-biig a Israyɛl, n kʋɩɩs b sũuri n dɩt beem ne-a, n baood a sãoong bala, beoog sẽn vẽege. M kõn lebs m zelemd ye;

¹² m na n sika bugum Tema la bugma na n dɩɩ Bosra ro-neebã.»

Amon bʋʋdo

¹³ Ad Soaala-Wẽnd sẽn yete: «Amon kamb tʋʋm beeda labsa la a ye n yɩɩd a taab ne wẽnem. B radga tʋtr-pʋse Galaad tẽnga sẽn na n yɩlẽ n paam n yalg b soolem. Woto wã m kõn lebs m zelemd ye.

¹⁴ M na n yõoga Raba, b na-tẽngã, la bugma na n dɩ-la a ro-neebã. Na n yɩɩ zabr daare, tɩ zab-zabdba kaasd b kaasgo, tɩ saag sob-raoog fugda.

¹⁵ B dĩma ne a dĩm-biisa na n wʋk n looga pa-weere.» Soaala-Wẽnd n gomd boto.