A Aaze 2 - SEBR SÕNGO

Wẽnd do-paalla neerem

¹ A Dariyus naama yʋʋmd a yiib soaba, kiuug a yopoe soaba pisi la a ye raare, Soaala koɛɛg le taa bãngda Aze:

² «B kos-a lame t'a sok woto a Zorobabɛl, Zɩɩda kombere, a Sealtiyɛl biigã, maan-kʋʋd kãseng a Zozuwe, a Zosadak biiga la pa-wetã:

³ ‹Yãmb sʋka ãnda n ket n tẽr pĩnd wẽnd dooga sẽn da tar ziir ningã? La yãmb sẽn get-a rũnna wã a yaa wãn-wãna? A ka lebg zaalem yãmb nifẽ sɩda?

⁴ Yaa rẽ me la m yet-fo, Zorobabɛl, keng f sũuri! Keng f sũuri, Zozuwe, Zosadak biiga! Keng-y sũuri tẽnga rãmb fãa. Sɩng-y tʋʋma tɩ m bee ne yãmba, maam y Wẽnde, dũni fãa Soaalã.

⁵ M tẽra m sẽn kãab-y bũmb ning m sẽn waa n yiis-y Ezipt tẽnga. M na n kell n paa yãmb sʋka, woto wã da zoe-y rabeem ye.

⁶ Woto la m gomda, maam, Naaba-Wẽnde, dũni fãa Soaala, tɩ sã n yɩ bilfu, m na n miima yĩngr la tẽnga, mogre la tẽn-koɛɛngã.

⁷ M na n leeba bu-zẽmba fãa lɛbla. B arzɛka fãa na n wa sama ka, la m yet-y lame tɩ wẽnd dooga na n le paama a pĩnd ziirã.

⁸ Maam n so dũni wã fãa sãnem la wanzurf.

⁹ Woto wã wẽnd do-paalla ziir na yɩɩg pipi soabã la yaa ro-kãng pʋga la m na n zĩnd n tool yãmb m laafi. Yaa maam n kãabd-y rẽ, maam, Naaba-Wẽnde, dũni fãa Soaalã.› »

Buuda yaa rẽgdo

¹⁰ Dĩma a Dariyus naam yʋʋmd a yiib soaba, kiuug a wɛ soaba pisi la a naas daare, Soaala le goma ne bãngd a Aze.

¹¹ Woto la Naaba-Wẽnde, dũni fãa Soaala, goamda: «Kos maan-kʋʋdba tɩ b leoke yell kãnga poorẽ. Sok-ba n gese:

¹² ‹Ned sã n yondg a fuugẽ nemd sẽn ya maoong nemdo, la a fuuga sɩɩsa wa buri, rɩɩbo, rãam bɩ kaam, rɩɩb buuda fãa, rɩ-kãng me tõe n boolame tɩ rɩɩb sẽn welg toor Wẽnd yĩng bɩ?› » La maan-kʋʋdba leokame tɩ ka tõe ye.

¹³ T'a Aze leb n yeele: «La ned sã n sɩɩs bõn-kɩɩnga, n wa sɩɩs rɩɩbo, rɩɩb kãng na n dẽgmame bɩ?» Maan-kʋʋdba leokame tɩ: N-yẽe!

¹⁴ A Aze yeel-b lame: «Ad Soaala koɛɛga: ‹Ad-y yaa woto me ne tẽn-kãnga rãmb ne b tʋʋma. M sẽn getã, b sẽn wat ne bũmb ning fãa maan-kugra zugu, ad-y b wata ne rẽgdo.› »

Maan-y gũusgu

¹⁵ Soaala le yeelame: «Ges-y bũmb ninga sẽn na n maane marsã tɛka. Y sẽn waa n nan ka sɩng kuga rɩgsgo m dooga meeba yĩngã,

¹⁶ bõe n da maande? Ned sã n da sok tɩ kooda sẽn dʋʋg n na n koosa yaa pet a wãn dẽnna, b yetame tɩ yaa pisi la yaool n yaa piig rẽnna. Sẽn tõsd-b bugsuntunga biis me ra maanda boto; b yetame tɩ b waa n kiiga pet pis-nu, mik yaa pisi bala.

¹⁷ Ad-y yaa maam n wa ne kɩɩms kolkoodo, n wa ne gãnem la sapɩlem n sãam y koodã, la y pa lɛɛg n kẽ maam y Soaala ye.

¹⁸ Maan-y gũusgu neere, ges-y yɛla sẽn na n yɩ marsã, dũnna raara tɛka. Rũnna raarã, dooga sɩngrã, yaa kiuug a wɛ soaba pisi la a naas daare. Ning-y rẽ y pʋtẽerẽ.

¹⁹ Y neeme tɩ bũmb ka le ket baoorẽ ye, bugsuntundu, kankamse, tɩɩs niyns sẽn womd b biisa wa poaloangã, oliviye la tɩɩs a taaba ka wom fɩ. Bãng-y tɩ rũnna tɛka m na n sudga m kũuna y zugu.»

Wẽnd pʋlemde

²⁰ Badaare, kiuuga pisi la a naas raare, Soaala le waa n kõ-la a Aze koɛɛga.

²¹ B yeel-a lame t'a wilg woto Zɩɩda komber a Sealtiyɛl biig a Zorobabɛl: «Maam, Naaba-Wẽnde, dũni fãa Soaala, ad-y m na n miima yĩngri la tẽnga.

²² M na n deega ãndũni rãmba fãa naam la m lub b dĩm dãmbã. M na n luba bilim-bilma ne b soaalba. Wiida na n kiime la wed-dʋʋdba na n kʋʋ taaba.

²³ Badaare, Zorobabɛl, m sõgne, m na n kõ-f-la tʋʋmde. Mam yĩnga fo na n lebga wa bũmb ning m sẽn tar n tikd m sɛba t'a kõt kaset tɩ b yii mam nengẽ; foo la n yãkda tɩ f na yɩ m na-yir-dao-a-ka-yelle. Yaa maam, dũni fãa Soaala n yeele!»