A Aaze 1 - SEBR SÕNGO

Wẽnd doog meebo

¹ Dĩm a Dariyus naam yʋʋmd a yiib soaba, kiuug a yoob soaba, kiuuga pipi daare, Soaala-Wẽnd goma ne bãngd a Aze. Soaala yeel-a lame t'a taas b koɛɛg a Zorobabɛl, a Sealtiyɛl biiga, Zɩɩda kombere, n paas maan-kʋʋd kãsenga a Zosadak biiga a Zozuwe:

² «Yaa woto la dũni fãa Soaala gomda: ‹Buud kãnga neba yetame tɩ wakat ninga b sẽn na n le maneg n me m dooga nan pa ta ye.›

³ Ad maam, Naaba-Wẽnd, leokre:

⁴ ‹Y sẽn getã, segdame tɩ yãmb kẽed zag-neeba, tɩ m dooga yaool n lʋɩ zãng n dɩg bɩ?

⁵ Rẽ n so tɩ m yet tɩ y tags y sũur pʋgẽ n ges yɛla sẽn ya to-to.

⁶ Yãmb bʋda wʋsgo la y pa tigs wʋsg ye. Y pa tar sẽn na rɩ n tɩge, y pa tar sẽn na yũ n noog y sũur ye. Y pa tar sẽn na yeelge n dig y waood zãng ye. Y sẽn tog n yao y tʋʋm-tʋmdba ne ligd ninga yaa waa y rɩk-a lame n sui kor-wurung pʋgẽ.

⁷ Dẽ la maam, y Wẽndã, dũni fãa Soaala, yet tɩ y tags n ges y yɛla sẽn be zĩig ninga.

⁸ Modg-y n dʋ y tãnga zugu n wa ne raado n le yik m doogã. Maam n wilgd-y, maam, Naaba-Wẽnd, tɩ ya ro-kãng pʋg la m na n deeg ne sũ-noogo, waoogr ning y sẽn tog n waoog-ma.

⁹ Yãmb da gũuda tɩgre, la kood faagame; yãmb ninga y kood baoorẽ, tɩ m kẽes bugd y baoorẽ la yaa bõe yĩnga? Maam n sokde, maam, Naaba-Wẽnde, dũni fãa Soaala. Ad-y ka bũmb a to, yaa m dooga sẽn lʋɩ zãnga tɩ yãmb ned kam fãa bas-a n yaool n manegd a roog n ka vʋʋsdẽ ye.

¹⁰ Yaa rẽ yĩng la saag mong a koom, tɩ tẽng me tõdg biis wombo.

¹¹ M waa ne ware y tẽnga pʋgẽ, y tãms zutu, y oliviye pʋtẽ, y alkam pʋtẽ, y bugsuntund pʋtẽ, y wãk sẽn kõrgd zĩig ning fãa. Yɩɩ naong ne ninsaalba, n yɩ naong ne rũmsi; y tʋma zaalem.› »

¹² A Zorobabɛl, a Sealtiyɛl biiga, n paas a Zozuwe, maan-kʋʋd kãsenga, a Zosadak biiga, n paas pa-wetã, fãa kelga Soaala-Wẽnd koɛɛga, bãngda Aze sẽn taas bãmbã. B kelg-a-la wa bũmb sẽn sɩd tog ne kelgre. Yɩɩ woto la bãngda Aze pids tʋʋmd ning a sẽn deeg Soaala nengẽ la buuda sakame n deege.

¹³ Buuda sẽn sak kelgrã la Soaala leok a Aze woto: «M na zĩnd ne yãmba, maam n kãabd-y rẽ, maam, Naaba-Wẽnde, yãmb Soaala.»

¹⁴ Soaala-Wẽnd pidsa ne raoodo Zɩɩda komber a Zorobabɛl, n paas maan-kʋʋd kãseng, a Zozuwe, la pa-weta fãa la b yikame n sɩng n na n le maneg n me Wẽnnaam, dũni fãa Soaala roogo.

¹⁵ Meeba sɩnga yʋʋmd kãng bala, kiuug a yoob soaba pisi la a naas daare.