2 Zã 1 - SEBR SÕNGO

Pʋʋsgo

¹ Yaa maam, nin-kẽema, n pʋʋsd Tigengu, m Pʋg sõngã, ne a kambã m sẽn nong ne nonglem menga, la ka maam bala n pʋʋsde, yaa neb niyns fãa sẽn bãng-b sɩdã.

² Sɩd kãng yẽne pʋgẽ la d be la d na n kell n pa, n tãag vɩɩm sẽn ka be sɛɛbo.

³ D datame tɩ y kell n pid ne sõmblem, ne nimbãan-zoeere la laafi ning sẽn yit Wẽnnaam Ba nengẽ la a yit a Zezi Krista nengẽ, bãmb Biig, sẽn tar sɩda la nonglem.

Nong taab noore

⁴ M sũur yɩɩ noogo wʋsgo m sẽn yãend f kamb kẽer sẽn tũud sɩd wa Wẽnd Ba sẽn kõ-d noor ningã.

⁵ La marsã Pʋg sõngo, ad ka no paalg la m kõt-f ye, ayoo! Yaa noor ning d sẽn paam al sɩngrẽ, yaa nong taab noorã.

⁶ D nonglem ne Wẽnd yaa d deeg b noya. La y sẽn paam noor ning al sɩngrẽ wã yaa y vɩɩnd ne taaba, nonglem pʋgẽ.

Krista bɛɛba

⁷ Neb n yik zembala n tuut-b taaba n kɩɩsd t'a Zezi Krista lebga Neda: bãmb la Sʋtãana, bãmb la a Zezi Bɛ wã.

⁸ Bɩ y gũus tɩ y tʋʋma ra lebg tʋʋm faad ye, mao-y n dɩ b yõod pidingu.

⁹ Ned ning fãa sẽn yet t'a mii zãnga n yaool n basd a Zezi Krista zãmsgã, yẽ soab ka be ne Wẽnnaam ye. Sẽn gãda Krista zãmsgã n be ne Wẽnnaam Ba la b Biiga.

¹⁰ Ned sã n wat y nengẽ, n ka tar a Zezi zãmsgã, bɩ y ra reeg a soab y yir ye, da pʋʋs ned a woto buud ye.

¹¹ Sẽn pʋʋs-a naag-a la a tʋʋm wẽngẽ.

¹² M da rat n togs-y la koees wʋsgo la m pa tʋlg tɩ yɩ ne sebr ye tɩ m saagda m na paam n wa y nengẽ; m sã n wa, m na paam n togs-y rẽ fãa ne noore, tɩ d sũ-nooga pid zãnga.

¹³ Tigengã, f Tão sõnga kamb tɩ b pʋʋs-fo.