2 Tɩmote 1 - SEBR SÕNGO

Sebra soaba la a pʋʋsgo

¹ Maam a Pol sẽn lebga a Zezi Krista Tʋʋm-tʋmda ne Wẽnd daabo la sẽn paam vɩɩm ninga sẽn be a Zezi Krista nengẽ wã pʋlemd noogo,

² maam n pʋʋsd m bi-nongr a Timote. Bɩ Wẽnnaam d Ba la d Soaal a Zezi Krista nimbãan-zoeere la b laafi kũun sig f zugu.

³ M pʋʋsda m Wẽnda barka, Wẽnd ning m sẽn tũud wala m saam-dãmba, ne pʋ-peelem zãnga. M pʋʋsd-b la barka wakat ning fãa m sẽn tẽegd f yelle, m pʋʋsg pʋgẽ, yʋngo wala wĩntoogo.

⁴ Ad-m tẽega f nintãma n dat ne m sũur fãa n le yãend-fo la m kɩdem sũ-noogo.

⁵ M sẽn tar bũmb ning bilgri, yaa f tẽebã sẽn ka keoosdã, tẽeb sẽn deng n kɩ yẽgend f yaab poak a Lois la f ma a Eunis sũurẽ, tẽeb sẽn ket n wit f meng sũurẽ, tɩ m tar a kaseto.

A Timote sẽn paam kũun niynsi

⁶ Yaa rẽ yĩng la m kot-f tɩ f le tẽeg bark ninga Wẽnnaam sẽn ning f sũurẽ ne mam meng nug tikri,

⁷ tɩ f mi tɩ ka rabeem la Wẽnd kẽes d sũurẽ ye, b kõo tõnd b Vʋʋsem sẽn ya pãnga la nonglem la tõog-m-menga.

⁸ Da zoe yãnde ne kaset ninga fo sẽn tog n kõ d Soaala ye; da zoe yãnd ne kaset ning f sẽn tog n kõ maam me sẽn pag roog a ye; sak bal n deeg toog ne maam, Koe-nooga yĩnga. Ad Wẽnd n sõng tõnd ne b pãnga,

⁹ bãmb sẽn fãag tõndo n bool tõnd booll sõngo, tɩ ka tũ ne tõnd tʋʋm-sõma, n tũ ne b yamleoog la b nimbãan-zoeer bala. Bãmb n kõ tõnd b kũuna ne a Zezi Krista tɩ dũni nan ka sɩng ye.

¹⁰ Kũun kãng puka zãnga ne tõnd Fãagd a Zezi Krista waoongo: bãmb n koms kũum zãnga la b kɩt tɩ vɩɩm la vʋʋgr vẽenem bui tõnd ne Koe-noogã.

¹¹ Maam la Koe-no-kãng wilgda, a zãmsda la a moanda.

¹² Yaa rẽ yĩng la m le be namsg pʋgẽ tɩ yãnd pa tar-m ye, tɩ mam mii ned ning m sẽn dell m tẽebã la m miime tɩ yẽ soab tõeeme tɩ m zã bobellã n ta b Raarã.

¹³ Tũ n da bʋdg lɛ-lɛ goam sõma niyns f sẽn wʋm m nengẽ, tũ-b ne tẽebo la Krista a Zezi nonglem.

¹⁴ Tall tẽeba bobelle ne Wẽnd Vʋʋsem Sõng ning sẽn ti a roog d pʋgẽ wã pãnga.

¹⁵ Wala fo meng sẽn mi, Azi neba fãa lak n basa maam; a Fizɛl ne a Ermozɛn be-la b sʋka.

¹⁶ Bɩ Wẽnd bãgb b kũuna a Onezifor ne a zaka, tɩ bãmb n waa n sõng maam naoor wʋsgo la b pa zoe m bãeensa yãnd ye.

¹⁷ A sẽn ta Rom tẽnga a bao ne a sũurẽ n paam n yãend-ma.

¹⁸ Bɩ Wẽnd kɩt t'a me rɩ b nimbãan-zoeer yõodo, Soaala nengẽ, b waoonga raare. Fo meng mii neere sõngr ning a sẽn yaoog maam Efɛɛz tẽnga.