2 Sãmwɛlle 9 - SEBR SÕNGO

A Daviid ne a Mefibaal

¹ A Daviid waa n yeelame: «Ned keta a Sol roogẽ tɩ m tõog n maan-a neere, m zooda ne a Zonatã yĩng bɩ?»

² A Sol sõgen a ye n da be, n boond t'a Siba; b tall-a lame n wa a Daviid nengẽ. Dĩma sok-a lame: «Yaa foom la a Siba bɩ?» T'a leoke: «M naaba, yaa maam, y sõgna!»

³ Tɩ dĩma soke: «Ned pa ket a Sol doogẽ tɩ m pids m sẽn kãab ne Wẽnde?» T'a Siba leok: «A Zonatã biig a ye n kete, la a yaa põore.»

⁴ Dĩma sokame: «A bee yɛ?» T'a Siba leoke: «A bee Lo-Debar rao, a Amiyɛl biig, a Makir, yiri.»

⁵ Dĩma a Daviid tʋmame tɩ b kẽng a Makir, a Amiyɛl biiga, yiri, Lo-Debar tẽnga, n tɩ tall-a n wa.

⁶ A Mefibaal, a Sol yagenga, la a Zonatã biiga, waa a Daviid nengẽ n wõgemd a taoore, n fõgneg a neng tẽnga. A Daviid yeelame: «Mefibaal!» T'a sake: «Ad-y y sõgna!»

⁷ T'a Daviid paase: «Da zoe rabeem ye, tɩ mam dat n maan-f la yel-sõmde, f ba a Zonatã yĩnga. Mam na n lebsa foom, f yaaba a Sol pʋtã fãa, la fo na n dɩɩ daar fãa ne maam laag a ye pʋga.»

⁸ A Mefibaal wõgemdame n yeele: «Yãmb yamba zema bõe, tɩ y wẽnemd y neng n tees ba-kɩɩng wala mam to wã?»

⁹ Dĩma boola a Siba, a Sol sõgnã, n yeel-a: «Mam kõta f zu-soaba biiga, a yaab ne a buuda sẽn da so bũmb ning fãa.

¹⁰ Ko pʋtã a yĩnga, foom ne f kamba la f tʋʋm-tʋmdba; la fo na n tɩgsda bõn-koadi wã tɩ f zu-soaba biig paam dɩɩb n dɩ. La f zu-soaba biiga, a Mefibaal, na n dɩ ne maam daar fãa laag a ye pʋga.» A Siba da tara kom-dibli piig la a nu la tʋʋm-tʋmdb pisi;

¹¹ a yeela dĩma: «Yãmb yamba na maan dĩma, a zu-soabã, sẽn kõ noor ningã. Sã n ya ne a Mefibaal, a minim n dɩta ne maam, a sẽn yaa a Sol yagenga yĩnga.»

¹² A Mefibaal da tara bi-ribla a yembre sẽn da boond t'a Mika. Sã n ya yẽ menga yell gesgo, dẽ ra paka a Siba ne sẽn naag-b yẽ a zakẽ wã.

¹³ A Mefibaal sẽn da ya põora yĩnga a tɩ kẽe Zerizalɛɛm, n na n paam n dɩt daar fãa marsã ne dĩma laag a yembr pʋga.