2 Sãmwɛlle 8 - SEBR SÕNGO

A Daviid zaba

¹ Rẽ poore a Daviid tõoga Filisti rãmba. A ning-b-la yãnde n deeg b sẽn da so tẽns niynsã.

² A le tõoga Moabitsã, n gãneg-b tẽnga, n kʋ bãmb neba a yi neb a tãab zugu. Woto Moabitsa kẽ-la a Daviid soolmẽ n yaood fadgo.

³ A Daviid tõoga a Adadezɛr, a Reob biiga, sẽn ya Soba dĩma, a sẽn wa n tʋlg n yalg a soolem n tãag Efrat kʋɩl-kẽengã.

⁴ A Daviid yõga wed-dʋʋdb tusri la kobs-yopoe, n yõg sẽn ka zao b wiidã bãmb tus pisi. A wõrsa wiidi niyns sẽn tat-b bilim-bilma kars gĩini. A keesa bilim-bilm koabg bala a meng yĩnga.

⁵ Aram neb sẽn da kẽed Damas waame n na n sõng a Adadezɛr, Soba dĩma, t'a Daviid kʋ bãmb neb tus pisi la a yiibu.

⁶ Dẽ poore a Daviid zĩndga komber Damas, Aram dãmba yĩnga. Bãmb lebga a Daviid yemse n kɩt-a yõor yaood. A Daviid sẽn kẽng zĩig ning fãa n tak zabre, a tõoga a bɛɛba.

⁷ A Daviid reega sãnem gãnda fãa, a Adadezɛr tãb-biisa sẽn da zãadã la a tall-b lame n wa Zerizalɛɛm.

⁸ A Adadezɛr tẽnsẽ, Beta ne Berotayi, a Daviid wʋka zũud teed wʋsgo.

⁹ A Towu, Amat dĩma, wʋmame t'a Daviid tõoga a Adadezɛr tãb-biisã fãa.

¹⁰ A tʋma a biiga, a Zoram, tao-tao, a Daviid nengẽ n na n pʋʋs-a la a pẽg-a, a sẽn zab n tõog a Adadezɛr yĩnga. A Adadezɛr da rɩta beem ne a Towu. A Zoram waa ne wanzurf, sãnem la zũud teedo n kõ a Daviid.

¹¹ Dĩma a Daviid rɩka rẽ fãa n naag ne tẽns a taaba a sẽn da wõra wanzurf la sãnem n kõ Naaba-Wẽnde.

¹² Kũuna yii Edomitse, Moabitse, Amonitse, Filisti rãmba la Amalesits tẽnsẽ, n paas a sẽn deeg a Adadezɛr nengẽ. A Adadezɛr la a Soba biiga la Soba dĩma.

¹³ A Daviid yʋʋra yii wʋsgo a sẽn tɩ pãb Aram nebã n lɛɛg n wa. Zabra zaba yamsem bãg-faagẽ, la neb tus piig la a nii la a tõog yã.

¹⁴ A ninga komber Edom tɩ Edom neba fãa lebg a Daviid soolem. A Daviid sẽn da kẽndẽ fãa, Soaala-Wẽnd da sõngd-a lame t'a tõog a bɛɛba.

A Daviid na-yira rãmba

¹⁵ A Daviid rɩɩ naam Israyɛl fãa zugu. A ra zãada neba ne pʋ-peelem la zemsgo.

¹⁶ A Seruya biiga, a Zoab, n da yaa a tãnsoaba, t'a Zozafat, a Ayilud biiga, yaa a koe-moanda.

¹⁷ A Ayitub biiga, a Sadok, a Abiyatar biig a Ayimelɛk n da ya maan-kʋʋdba; a Seraya n da ya a sɛb gʋlsda.

¹⁸ A Zoyada biig, a Benaya, n da ya Krɛt la Pelɛt dãmba sẽn da gũud dĩma tãnsoaba. A Daviid kamba da yaa maan-kʋʋdba.